ޖަމާލުއްދީން ސުކޫލުގެ ގްރޭޑް 8ގެ ދަރިވަރުންނަށް އަމާޒުކޮށްގެން، ދިވެހިރާއްޖޭގެ ގައުމީ ޔުނިވަރސިޓީ (އެމް.އެން.ޔޫ) އިން ކެރިއަރ ގައިޑަންސް ސެޝަނެއް މިއަދު ކުރިއަށް ގެންގޮސްފިއެވެ.
މި ސެޝަންގެ މައިގަނޑު މަގުސަދަކީ ދަރިވަރުންގެ ތައުލީމީ ކުރިމަގާއި، މާއްދާތައް އިޚްތިޔާރުކުރުމާއި، އަދި ކުރިމަގުގެ ވަޒީފާއާ ގުޅޭގޮތުން ހޭލުންތެރި ނިންމުންތައް ނިންމުމަށް އެހީތެރިވުމެވެ.
އެމްއެންޔޫގެ ކެރިއަރ ގައިޑަންސް މާހިރުން ނަގައިދިން މި ސެޝަންގައި، ދަރިވަރުންނަށް ހުރި ތައުލީމީ ފުރުސަތުތަކާއި، އެކުދިންގެ ޝައުގުވެރިކަމާއި ގާބިލިއްޔަތާ ގުޅޭ ދާއިރާތައް ދެނެގަންނާނެ ގޮތްތަކުގެ މައްޗަށް އަލިއަޅުވާލާފައިވެއެވެ. އަދި ތައުލީމީ ދާއިރާ އިޚްތިޔާރުކުރުމާއި، ހުނަރު ތަރައްގީކުރުމާއި، ވަޒީފާގެ ފުރުސަތުތަކާ ހުރި ގުޅުން ދަރިވަރުންނަށް އޮޅުންފިލުވައިދީފައިވެއެވެ. މީގެ އިތުރުން، އަމިއްލަ ނަފްސުގެ ހުރި ކުޅެދުންތެރިކަން ދެނެގަނެ، ތަފާތު ތައުލީމީ ދާއިރާތައް ހޯދައި ބެލުމަށާއި، އުންމީދުތަކާ ގުޅޭ ފަދަ ވަޒީފާގެ ދާއިރާތަކަށް އަމާޒު ހިފުމަށް ދަރިވަރުންނަށް ހިތްވަރު ދީފައިވެއެވެ.
ޖަމާލުއްދީން ސުކޫލާއެކު އެމްއެންޔޫ އިން ކުރިއަށް ގެންދިޔަ މި ހަރަކާތަކީ، ސާނަވީ ތައުލީމުގެ މުހިންމު މަރުހަލާތަކުގައި ދަރިވަރުންނަށް އެހީތެރިކަން ފޯރުކޮށްދިނުމަށް އެ ޔުނިވަރސިޓީން ކުރަމުންދާ މަސައްކަތުގެ ބައެކެވެ. މިފަދަ ޕްރޮގްރާމްތަކުގެ ސަބަބުން ސާނަވީ ތައުލީމުން މަތީ ތައުލީމަށާއި ވަޒީފާގެ މާހައުލަށް ދަރިވަރުން ބަދަލުވުމުގައި ހުރި ގޮންޖެހުންތައް ކުޑަވެގެންދާނެއެވެ.
މިފަދަ ހަރަކާތްތަކުގެ ޒަރީއާއިން، އެމް.އެން.ޔޫ އިން ދަނީ ސުކޫލުތަކާއި މުޖުތަމައާ ގުޅިގެން، ޒުވާނުންނަށް ބޭނުންވާ މައުލޫމާތާއި އިތުބާރު ހޯދައިދީ، އުޖާލާ މުސްތަގުބަލެއް ބިނާކުރުމަށް މަގުދައްކައިދެމުންނެވެ.
advertisment
ހިޔާލު