އެލައިޑް އިންޝުއަރެންސްގެ "އެލައިޑް ތަކާފުލް" އާއި "ކަމަނަ ތަކާފުލް"އަށް ބައިނަލް އަޤްވާމީ ދެ އެވޯޑެއް

11 ވަނަ އިސްލާމިކް ފައިނޭންސް ފޯރަމް އޮފް ސައުތު އޭޝިއާ (އައި.އެފް.އެފް.އެސް.އޭ) އެވޯޑްސް 2026 ގައި އެލައިޑް އިންޝުއަރެންސް ކޮމްޕެނީ އޮފް ދަ މޯލްޑިވްސް އިން ޝަރަފުވެރި ދެ އެވޯޑެއް ލިބިއްޖެއެވެ.

އެލައިޑްގެ އިސްލާމިކް ވިންޑޯ ކަމަށްވާ "އެލައިޑް ތަކާފުލް" އަށް 'އިސްލާމިކް ފައިނޭންސް އެންޓިޓީ އޮފް ދަ އިޔަރ' ގެ ލަގަބު ލިބިފައިވާއިރު، "ކަމަނަ ތަކާފުލް" އަށް ވަނީ 'އިސްލާމިކް ފައިނޭންސް ޕްރޮޑަކްޓް އޮފް ދަ އިޔަރ' ގެ އެވޯޑް ލިބިފައިވެއެވެ.

މި އެވޯޑް ދިނުމުގެ ރަސްމިއްޔާތު ބާއްވާފައިވަނީ އޮކްޓޯބަރު 20 ވަނަ ދުވަހު، ސްރީލަންކާގެ ކޮލަމްބޯގައި ހުންނަ ޝަންގްރިއްލާ ހޮޓަލުގައެވެ. ޔޫޓީއޯ އެޑިއުކޮންސަލްޓްގެ ފަރާތުން "ބިލްޑިންގް ލެގަސީސް" މި ތީމްގެ ދަށުން އިންތިޒާމުކުރި މި ހަފުލާއަކީ ދެކުނު އޭޝިއާ ސަރަހައްދުގެ އިސްލާމިކް ބޭންކިންގާއި ފައިނޭންސް ދާއިރާގައި ފާހަގަކޮށްލެވޭ ކާމިޔާބީތައް ހޯދާ މުއައްސަސާތަކާއި ފަންނީ މާހިރުންގެ އަގުވަޒަންކުރުމަށް ބޭއްވި ހަރަކާތެކެވެ.

މި އެވޯޑްތަކަކީ 2025 ވަނަ އަހަރުގެ ތެރޭގައި އެލައިޑްގެ ތަކާފުލް ވިޔަފާރި ފުޅާކޮށް ތަރައްގީކުރުމަށް މެނޭޖްމަންޓުން އެޅި ހަރުދަނާ ފިޔަވަޅުތަކުގެ ނަތީޖާއެވެ. މީގެ ތެރޭގައި، ކޮންވެންޝަނަލް ލައިފް އިންޝުއަރެންސް ވިއްކުން ހުއްޓާލައި، އޭގެ ބަދަލުގައި "ފެމިލީ ތަކާފުލް" އަކީ ހަމައެކަނި ފޯރުކޮށްދޭ ހިމާޔަތްކަމުގައި ހެދުމަށް ނިންމި ނިންމުން ފާހަގަކޮށްލެވެއެވެ. މީގެ އިތުރުން، އެލައިޑް މޮބައިލް އެޕްލިކޭޝަން މެދުވެރިކޮށް އަލަށް ހިދުމަތް ހޯދާ ކަސްޓަމަރުންނަށް ކޮންވެންޝަނަލް އިންޝުއަރެންސްގެ ބަދަލުގައި ހަމައެކަނި ތަކާފުލްގެ ހިދުމަތް ފެންނާނެހެން ހަމަޖައްސައި، ޑިޖިޓަލް ވަސީލަތްތަކުގައި ތަކާފުލްއަށް އިސްކަންދިނުމަށް ކުރި މަސައްކަތް ހިމެނެއެވެ.

ރާއްޖޭގެ ބޮޑެތި ސިޓީތަކުގައި ކުރިއަށްގެންދިޔަ މާކެޓިންގ ހަރަކާތްތަކާއި، ކަސްޓަމަރުން ހޭލުންތެރިކުރުވުމާއި، އިޖުތިމާއީ ހަރަކާތްތަކާއެކު، 2024 އިން 2025 އަށް ތަކާފުލް އާމްދަނީއަށް ބޮޑު ކުރިއެރުމެއް ވަނީ ލިބިފައެވެ. އެލައިޑް ތަކާފުލް އަދި ކަމަނަ ތަކާފުލް އަށް ލިބުނު މި ބައިނަލްއަގުވާމީ ކުރިއެރުމަކީ ތަކާފުލްގެ ހިދުމަތް ފުޅާކޮށް، އާންމުން ހޭލުންތެރިކުރުވައި، ރާއްޖޭގެ އިސްލާމިކް ފައިނޭންސް ދާއިރާ ކުރިއެރުވުމަށް އެލައިޑުން ބަހައްޓާ ސާބިތުކަމުގެ ހެއްކެކެވެ.