އެމްއެންޔޫއިން ފަށާ ރާއްޖޭގެ ފުރަތަމަ އޮކިއުޕޭޝަނަލް ތެރަޕީ ކޯހަށް ޑަބްލިޔުއެފްއޯޓީގެ އެކްރެޑިޓޭޝަން ހޯދަނީ

ދިވެހިރާއްޖޭގެ ރިހެބިލިޓޭޝަން ދާއިރާއަށް ބޭނުންވާ ދިވެހި ފަންނީ މަސައްކަތްތެރިން ބިނާކުރުމަށްޓަކައި، ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން ވަނީ ރާއްޖޭގެ ފުރަތަމަ "ބެޗްލަރ އޮފް އޮކިއުޕޭޝަނަލް ތެރަޕީ (އޮނަރސް)" ޕްރޮގްރާމަށް ކުރިމަތިލުމުގެ ފުރުޞަތު ރަސްމީކޮށް ހުޅުވާލާފައެވެ. ހަތަރު އަހަރުގެ މުއްދަތަށް ކުރިއަށްގެންދާ މި ޑިގްރީ ޕްރޮގްރާމަކީ ރާއްޖޭގައި މި ދާއިރާއިން ފޯރުކޮށްދޭ ޚިދުމަތްތައް ދެމެހެއްޓެނިވި ގޮތެއްގައި ކުރިއަށްގެންދިއުމަށް އެޅޭ ވަރަށް މުހިންމު ފިޔަވަޅެކެވެ.

މި ޕްރޮގްރާމަކީ މޯލްޑިވްސް ކޮލިފިކޭޝަން އޮތޯރިޓީ (އެމް.ކިއު.އޭ) އިން އެކްރެޑިޓްކޮށްފައިވާ، އަދި މޯލްޑިވްސް އެލައިޑް ހެލްތު ކައުންސިލް (އެމް.އޭ.އެޗް.ސީ) އިން ޤަބޫލުކުރާ ޤައުމީ ފަންނީ މިންގަނޑުތަކަށް ފެތޭ ޕްރޮގްރާމެކެވެ. މީގެ އިތުރުން، މި ދާއިރާއިން ލައިސަންސް ހޯދުމަށް ބޭނުންވާ 1,000 ގަޑިއިރުގެ ކްލިނިކަލް ޓްރެއިނިންގް (ސުޕަވައިޒްޑް) މި ކޯހުގެ ތެރޭގައި ފުރިހަމަކުރެވޭނެއެވެ.

ބައިނަލްއަޤްވާމީ މިންގަނޑުތަކަށް ފެތޭ ގޮތަށް ދިވެހި މާހިރުން ފަރުމާކޮށްފައިވާ ޕްރޮގްރާމެއް
މި ޕްރޮގްރާމަކީ މި ދާއިރާގެ ދިވެހި ފަންނީ މާހިރުންގެ ޓީމަކުން ފަރުމާކޮށްފައިވާ ޕްރޮގްރާމެކެވެ. މި މަސައްކަތުގެ ކޮންސަލްޓެންސީ އިސްކޮށް ބަލަހައްޓަވާފައިވަނީ މި ދާއިރާގައި 10 އަހަރަށްވުރެ ގިނަ ދުވަހުގެ ތަޖުރިބާ ހުރި އޮކިއުޕޭޝަނަލް ތެރަޕިސްޓް ތޫހާ އަދުލީއެވެ.

ތޫހާ ފާހަގަކުރެއްވި ގޮތުގައި، އޮކިއުޕޭޝަނަލް ތެރަޕީއަކީ ޤައުމީ ފެންވަރުގައި އިސްކަންދޭ ދާއިރާއެއްގެ ގޮތުގައި މިހާރު ވަނީ ކަނޑައެޅިފައެވެ. "ރާއްޖޭގައި މިފަދަ ޕްރޮގްރާމެއް ފެށުމަކީ މުޖުތަމައުގެ ބޭނުންތައް ފުއްދުމަށްޓަކައި ގާބިލު ދިވެހި މަސައްކަތްތެރިން ބިނާކުރުމަށް ކުރެވޭ މުހިންމު އިންވެސްޓްމަންޓެކެވެ. މަގްސަދަކީ މި ދާއިރާއަށް ނުކުންނަ އާ ޖީލުގެ ތެރަޕިސްޓުންނަކީ އޯގާތެރި، އަދި ހޯދުންތަކުގެ މައްޗަށް ބިނާކޮށް ފަރުވާދޭ ބަޔަކަށް ވެގެންދިއުމެވެ،" އޭނާ ވިދާޅުވިއެވެ.

އެމް.އެން.ޔޫ އިން ދަނީ އޮކިއުޕޭޝަނަލް ތެރަޕީ އެސޯސިއޭޝަން އޮފް މޯލްޑިވްސް (އޯ.ޓީ.އޭ.އެމް) އާ ގުޅިގެން، ވޯލްޑް ފެޑެރޭޝަން އޮފް އޮކިއުޕޭޝަނަލް ތެރަޕިސްޓްސް (ޑަބްލިޔު.އެފް.އޯ.ޓީ) ގެ ބައިނަލްއަޤްވާމީ އެކްރެޑިޓޭޝަން ހޯދުމަށް މަސައްކަތް ކުރަމުންނެވެ. މީގެ ސަބަބުން މި ކޯސް ނިންމާ ދަރިވަރުންގެ ސަނަދު ބައިނަލްއަޤްވާމީ ފެންވަރުގައި ބަލައިގަނެވޭނެއެވެ.

އޮކިއުޕޭޝަނަލް ތެރަޕީއަކީ ކޮބާ؟
އޮކިއުޕޭޝަނަލް ތެރަޕީއަކީ ހުރިހާ އުމުރެއްގެ މީހުންނަށްވެސް، އެމީހެއްގެ އާންމު ދިރިއުޅުމުގައި ކުރަންޖެހޭ މުހިންމު ކަންކަން އަމިއްލައަށް ކުރުމުގެ އިތުބާރާއި ގާބިލުކަން ހޯދައިދޭ އަމަލީ ފަންނެކެވެ. މީގެ ތެރޭގައި އަމިއްލައަށް ކަންކަން ކުރުމާއި، އުނގެނުމާއި، ވަޒީފާ އަދާކުރުމާއި، ކުޅިވަރުގެ ހަރަކާތްތަކުގައި ބައިވެރިވުން ހިމެނެއެވެ. މި ކޯހުގެ ދަރިވަރުންނަށް ބޭނުންތައް ދެނެގަންނާނެގޮތާއި، ރިހެބިލިޓޭޝަންގެ އުކުޅުތަކާއި، އެހީތެރިވެދޭ ޓެކްނޮލޮޖީ ބޭނުންކުރާނެ ގޮތްތައް ދަސްވާނެއެވެ. މި ދާއިރާއިން ކިޔަވާ ނިމޭ ދަރިވަރުންނަށް ހޮސްޕިޓަލްތަކާއި، ސްކޫލްތަކާއި، މެންޓަލް ހެލްތު ސާވިސްތަކާއި، ނުކުޅެދުންތެރިކަން ހުންނަ މީހުންނަށް އެހީތެރިވާ މަރުކަޒުތަކުގައި ވަޒީފާ އަދާކުރުމުގެ ފުރުސަތު އޮންނާނެއެވެ.

ޤައުމީ ފެންވަރުގައި އޮތް ހުސްކަމަކަށް އޮތް ފަރުވާއެއް

ރާއްޖޭގައި ތަމްރީނު ލިބިފައިވާ އޮކިއުޕޭޝަނަލް ތެރަޕިސްޓުންގެ ދަތިކަން އިންތިހާއަށް އެބައޮތެވެ. މީގެ ސަބަބުން ކުޑަކުދިންގެ ތަރައްޤީއަށް ބޭނުންވާ ފަރުވާއާއި، އަނިޔާގެ ސަބަބުން ނުވަތަ ބަލިމަޑުކަމެއްގެ ސަބަބުން ނުކުޅެދުންތެރިކަން މެދުވެރިވާ މީހުންނަށް ބޭނުންވާ ފަރުވާ ދިނުމުގައި ބޮޑެތި ގޮންޖެހުންތަކެއް ހުރެއެވެ. މި ޕްރޮގްރާމަކީ މި ފަޅުކަން ފޫބެއްދުމަށް ފެށޭ މުހިންމު މަސައްކަތެކެވެ.

ކޯސް ލީޑަރ މުޙައްމަދު ނިމާލް ފާހަގަކުރެއްވި ގޮތުގައި، މި ކޯހުގެ ދަރިވަރުން ކިޔަވަމުންދާއިރު އެކި ދާއިރާތަކުގައި އަމަލީ ތަޖުރިބާ ހޯދާނެއެވެ. މީގެ ސަބަބުން ކޯސް ނިމޭއިރު ދަރިވަރުންނަށް ވަޒީފާގެ ޔަގީންކަން ލިބިގެންދާނެއެވެ.

އާ ޕްރޮގްރާމްތައް އިފްތިތާޙްކުރުމަށް ބޭއްވި ނޫސްވެރިންގެ ބައްދަލުވުމުގައި ވައިސް ޗާންސެލަރ ޑރ. އާއިޝަތު ޝެހެނާޒް އާދަމް ވިދާޅުވީ، މިއީ ހަމައެކަނި އާ ކޯހެއް ފެށުން ނޫން ކަމަށާއި، މިއީ ރާއްޖޭގެ ޞިއްޙީ ދާއިރާގެ މުސްތަޤުބަލު ބައްޓަންކުރުމަށް ކުރެވޭ މަސައްކަތެއް ކަމަށެވެ.

ކޯހަށް އެދި ހުށަހެޅުން:
މިހާރު ވަނީ މި ކޯހަށް ފުރުޞަތު ހުޅުވާލާފައެވެ. ޝައުޤުވެރިވާ ފަރާތްތަކުން ވީހާވެސް އަވަހަކަށް ކުރިމަތިލުމަށް ޔުނިވަރސިޓީން އިލްތިމާސްކުރެއެވެ.

• ސުންގަޑި: 30 ޖުލައި 2026، މެންދުރުފަހު 14:00 އަށް
• ކުރިމަތިލާނެ ގޮތް: އެމް.އެން.ޔޫ ސްޓޫޑަންޓް ޕޯޓަލް (portal.mnu.edu.mv) މެދުވެރިކޮށް
• އިތުރު މަޢުލޫމާތަށް: އެމް.އެން.ޔޫ ހޮޓްލައިން 1445 އަށް ގުޅުއްވުން