5ލައްކަ ރުފިޔާއާ ހަމައަށް މާލީ އެހީދޭ އިމަރޖިން ރިސަރޗް ސްކީމަށް އައިޔޫއެމްއިން ހުޅުވާލައިފި

5ލައްކަ ރުފިޔާއާ ހަމައަށް މާލީ އެހީދޭ އިމަރޖިން ރިސަރޗް ސްކީމަށް ދިވެހިރާއްޖޭގެ ޤައުމީ ޔުނިވަރސިޓީ (އައިޔޫއެމް)އިން ހުޅުވާލައިފިއެވެ.

މިއީ ދިރާސާ ކުރުމަށް އެކުލަވާލި ނެޝަނަލް ރިސަރޗް ފަންޑުން އައިޔޫއެމްއަށް ލިބިފައިވާ 1.5 މިލިއަން ރުފިޔާގެ ތެރެއިން ހުޅުވާލާފައިވާ ސްކީމެކެވެ. މި ސްކީމަށް ޕްރޮޕޯސަލް ހުށައަޅަން ޖެހެނީ އަންނަ ޑިސެމްބަރު 7 ވަނަ ދުވަހުއެވެ.

އައިޔޫއެމްގެ އިމަރޖިންގ ފަންޑު އިއުލާން ކުރީ މިއަދު އެ ޔުނިވަރސިޓީގައި ބޭއްވި ބައްދަލުވުމެއްގައެވެ.

މަތީ ތައުލީމާ ބެހޭ ވުޒާރާއިން އެކުލަވާލާފައިވާ ޤައުމީ ފަންޑަށް މި އަހަރު 4.5 މިލިއަން ރުފިޔާ ކަނޑައަޅާފައިވެއެވެ. މި ފަންޑުގެ ގްރާންޓް މެނޭޖަރުންގެ ގޮތުގައި ކަނޑައަޅާފައި ވަނީ އައިޔޫއެމްގެ އިތުރުން އެމްއެންޔޫގެ އިތުރުން ވިލާކޮލެޖެވެ.

މި ސްކީމުގެ ތެރެއިން ރިސަރޗް ކުރުމަށް ކަނޑައަޅާފައި ވަނީ މައިގަނޑު ހަތަރު ދާއިރާއެކެވެ.  އެއީ، ވެރިކަން ހިންގުމާ ރައްކާތެރިކަމާ ދުޅަހެޔޮކަމާއި އާންމު ރައްކާތެރިކަމާއި ސިއްޙަތާ ދުޅަހެޔޮކަމުގެ އިތުރުން އިޤްތިޞާދީ ކުރިއެރުމާއި ދެމެހެއްޓެނިވި ތަރައްޤީއެވެ. މިއިން ކޮންމެ ދާއިރާއެއް އަތައް ބަޔަކަށް ބަހާލައި ރިސަރޗްކުރަން ކަނޑައަޅާފައިވެއެވެ.

އައިޔޫއެމްގެ ޑެޕިއުޓީ ވައިސް ޗާންސެލަރު ޑރ. ވިސާލް މޫސާ ވިދާޅުވީ، ރިސަރޗް ސްކީމުން އެންމެ ގިނައިން އެއް ފަރާތަކަށް ދޫކުރާނީ 5ލައްކަ ރުފިޔާ ކަމަށާއި ރިސަރޗް ކުރަން ދެވޭނީ 18 މަސްދުވަސް ކަމަށެވެ. އަދި އޭނާ ވިދާޅުވީ، އެ ޔުނިވަރސިޓީން ބާރުއަޅަނީ ކޮލަބްރޭޓްކޮށް ރިސަރޗް ކުރިއަށް ގެންދަން ކަމަށެވެ.

"ރިސަރޗް ކުރުމުގައި ލީޑްކުރާނީ އައިޔޫއެމްގެ މުވައްޒަފެއް. އޭގެ އިތުރުން ރިސަރޗްގެ ޓީމުގައި އައިޔޫއެމްގެ ބޭރުން، އެހެން ޔުނިވަރސިޓީއެއް ނުވަތަ ރާއްޖެއިން ބޭރުގެ ފަރާތްތައް ވެސް ބައިވެރިކުރަން ޖެހޭ. އެއީ އަޅުގަނޑުމެންގެ އަތުގައި ނެތް އެކްސްޕަޓީސްތައް ހޯދުމުގެ ގޮތުން" ޑރ. ވިޝާލް ވިދާޅުވިއެވެ.

ޑރ. ވިޝާލް ވިދާޅުވީ، ޑިސެމްބަރު މަސް ނިމުމުގެ ކުރިން ރިސަރޗް ގްރާންޓް ސްކީމަށް ހުށައަޅާ ޕްރޮޕޯސަލް ދިރާސާކޮށް ނިންމައި، އެވޯޑްކުރަން މަސައްކަތް ކުރައްވާނެ ކަމަށެވެ.