ދަރިންގެ މައްސަލަތައް މައިންބަފައިން ހައްލުކޮށްދިނުން: ހެޔޮއެދުމުގެ ނިވާފަތްގަނޑުގައި ދެވޭ "ވިހައެއް"!

މޫސާ ނިމާލް

ކޮންމެ މަޔަކާއި ބަފައެއްގެވެސް އެންމެ ބޮޑު އުންމީދަކީ އަދި ދުޢާއަކީ ތިމާގެ ލޮލުގެ ފިނިކަން ކަމުގައިވާ ދަރިފުޅަށް އުފާވެރި، ފާގަތި އަދި ހުރަސްތަކެއް ނެތް އޮމާން ހަޔާތެއް ލިބުމެވެ. ދަރިފުޅަށް ދެރައެއް، ހިތާމައެއް ނުވަތަ ނާކާމިޔާބީއެއް ކުރިމަތިވާން އެއްވެސް މަޔަކާއި ބަފަޔަކު ޔަގީނުންވެސް ނޭދޭނެއެވެ. ނަމަވެސް، މި ލޯތްބާއި ހެޔޮއެދުމުގެ ތެރެއިން މިއަދުގެ މުޖުތަމައުން ފެންނަމުންދާ އެންމެ ނުރައްކާތެރި އެއް އާދައަކީ، ދަރިފުޅަށް ދިމާވާ ކޮންމެ ކުޑަކުޑަ ގޮންޖެހުމަކާއި މައްސަލައެއްގައި މައިންބަފައިން "ސުޕަރހީރޯއިން" ފަދައިން މެދުވެރިވެ، އެ މައްސަލައެއް ހައްލުކޮށްދިނުމެވެ. މިއީ ހަގީގަތުގައި ލޯތްބެއް ހެއްޔެވެ؟ ނުވަތަ ހެޔޮއެދުމުގެ ނިވާފަތްގަނޑުގައި ދަރިންގެ މުސްތަގުބަލަށް ދެވޭ "ވިހައެއް" ހެއްޔެވެ؟ މިއީ މިއަދު އަޅުގަނޑުމެން ފުންކޮށް ވިސްނާލަންޖެހިފައިވާ މުހިންމު މައްސަލައެކެވެ.

"އަހަރެންގެ ދަރިފުޅަށް އެކަމެއް ނުވާނެ!" – ނޭނގި ދެވޭ ނުބައި މެސެޖު

މަޝްހޫރު ނަފްސާނީ މާހިރު ޑރ. ބްރެޑް ޖޯންސް ވިދާޅުވާ ގޮތުގައި، ދަރިންނަށް އަމިއްލައަށް ހައްލުކުރެވޭނެ ފަދަ ކަންކަމުގައި (އެއީ ސްކޫލްގެ ފިލާވަޅެއް ނުވަތަ ރަހުމަތްތެރިއަކާ ޖެހޭ މައްސަލައެއް ކަމުގައިވިޔަސް) މައިންބަފައިން ދެމެދަށް ވަދެގަންނަ ކޮންމެ ފަހަރަކު، ދަރިފުޅުގެ ސަބްކޮންޝަސް ނުވަތަ ކުއްޖާގެ ވިސްނުމުގެ ފުންމިނަށް ނޭނގި ނަމަވެސް މެސެޖެއް ފޮނުވައިދެއެވެ. އެ މެސެޖަކީ: "ދަރިފުޅާއެވެ! މިއީ ކުޑަކޮށްވެސް ދަރިފުޅަށް އަމިއްލައަށް ހާޒިރުވެ، ހައްލުކުރެވޭނެ ވަރުގެ ކަމެއް ނޫނެވެ. ދަރިފުޅުގެ ކިބައިގައި އެ ގާބިލުކަމެއް ނެތެވެ." މިފަދަ މެސެޖުތައް ތަކުރާރުވަމުން ދިއުމުން، ކުއްޖާގެ އަމިއްލަ ނަފްސަށް އޮންނަ އިތުބާރު މުޅިން ފުނޑުފުނޑުވެގެންދެއެވެ. އަދި ދިރިއުޅުމުގައި ދިމާވާ ކޮންމެ ކަމެއްގައި އަބަދުވެސް އެހެން މީހަކަށް ބަރޯސާވާންޖެހޭ "ޑިޕެންޑެންޓް" ކުއްޖަކަށް އެކުއްޖާ ބަދަލުވެއެވެ.

ކެތްތެރިކަމާއި ރެސިލިއަންސް ބިނާވަނީ ހާލަތުގެ ތެރެއިން

ނަފްސާނީ އިލްމުގެ ހޯދުންތަކުން ދައްކާގޮތުގައި، އިންސާނާގެ ކިބައިގައި ހުންނަންޖެހޭ އެންމެ މުހިންމު އެއް ސިފައަކީ "ރެސިލިއަންސް" ނުވަތަ ނާކާމިޔާބީއާއި ހިތާމަތަކުން އަރައިގަނެ، އަލުން ކޮޅަށް ތެދުވުމުގެ ގާބިލުކަމެވެ. މި ސިފައަކީ އުފަންވާއިރު ހުންނަ ސިފައެއް ނޫނެވެ. މިއީ ދިރިއުޅުމުގެ ތަޖުރިބާތަކުގެ ތެރެއިން "ދަސްކުރާ" ސިފައެކެވެ. ކުދިންގެ ކިބައިން ފެންނަން އަހަރެމެން އެދޭ ސިފަތައް ކަމަށްވާ – އަމިއްލަ ނަފްސަށް އޮންނަ އިތުބާރާއި، ކެތްތެރިކަމާއި، ޒިންމާދާރުކަމުގެ އިތުރުން މިނިވަންކަމަކީ، ދިރިއުޅުން ފަސޭހައިން އޮންނަ އޮމާން މަގުތަކުން ބިނާކުރެވޭނެ ސިފަތަކެއް ނޫނެވެ. އެ ސިފަތައް ބިނާވަނީ، ކުދިންނަށް ގޮންޖެހުންތަކާ ކުރިމަތިވެ، އެއިން އަރައިގަނެވޭނެކަން އެކުދިންނަށް އަމިއްލައަށް ވިސްނޭ ހިސާބުންނެވެ.

ކުއްޖާ ނާކާމިޔާބީއާ ކުރިމަތިލާންޖެހޭނެއެވެ. ރޮވޭނެ ހާލަތްތަކާއި، މާޔޫސްވާނެ ފަހަރުތައްވެސް އަންނާނެއެވެ. އެ ހުރިހާ ހާލަތަކުން ކުއްޖާ "ރައްކާތެރިކުރުމަކީ" ހަގީގަތުގައި އެކުއްޖާގެ ނަފްސާނީ ދިފާއީ ނިޒާމު ބަލިކަށިކޮށްލުމެވެ. ދިރިއުޅުމުގެ ހޫނުގަދަ އަވިން ސަލާމަތްކުރަން އަބަދު ކުޑައެއް އަޅައިގެން ގެންގުޅޭ ކުއްޖާ، ބޮޑުވެގެން އަމިއްލަ ފައިމައްޗަށް ތެދުވާއިރު ކުޑަކުޑަ ވައިރޯޅިއަކުންވެސް ބިންމައްޗަށް ވެއްޓިދާނެއެވެ.

އަމިއްލަ ޒިންމާ: ކޮންމެ އަމަލަކަށް ނަތީޖާއެއްވޭ!

ދަރިން ބޮޑެތިވަމުން އަންނައިރު ދަސްކުރަންޖެހޭ އެންމެ ބޮޑު އެއް ފިލާވަޅަކީ އަމިއްލަ ޒިންމާ އުފުލުމެވެ. ކުއްޖާ ކުރާ ނުބައި ކަމަކުން ނުވަތަ އިހުމާލަކުން ނުކުންނަ ނަތީޖާއިން އަބަދު މައިންބަފައިން އެކުއްޖާ ސަލާމަތްކޮށްދޭނަމަ، އެކުއްޖާއަށް ދަސްވާނީ ކޮންމެފަދަ ކަމެއް ކުރިޔަސް އެކަމުން ސަލާމަތްވާނެ މަގެއް އޮންނާނެކަމެވެ.

ސްކޫލަށް ގެންދަންޖެހޭ ފޮތް ހަނދާންނެތިގެން ބޭއްވުމުން، މައިންބަފައިން އޮފީސް މަސައްކަތް ދޫކޮށްލާފައި ދުވެފައި ގޮސް ފޮތް ހަވާލުކޮށްދިނުމަކީ ކުއްޖާއަށް ވެވޭ އެހީއެއް ނޫނެވެ. އެ ފޮތް ނުގެންދިއުމުގެ ސަބަބުން ސްކޫލުން ލިބޭ ނަސޭހަތް ނުވަތަ ފުރިހަމަކުރަންޖެހޭ އިޖުރާއަތްތައް ތަހައްމަލުކުރަން ޖެހޭނެއެވެ. އޭރުން ދެވަނަ ދުވަހު ފޮތް ދަބަހަށްލާން އެކުއްޖާ ހަނދާން ހުންނާނެއެވެ.

"ނޫނެކޭ" ބުނުމަކީވެސް ލޯތްބެކެވެ!

މައިންބަފައިން ގަބޫލުކުރަންޖެހޭ ހަގީގަތަކީ، ދަރިން ބަލާބޮޑުކުރުމުގެ އަސްލު ބޭނުމަކީ އެކުދިންގެ ދިރިއުޅުން އަބަދު ފަސޭހަކޮށްދިނުން ނޫންކަމެވެ. އޭގެ ބަދަލުގައި، މިއަދު އަޅުގަނޑުމެން ދަރިން ބޮޑެތި ކުރަންވީ، މާދަމާ އަޅުގަނޑުމެން ދުނިޔޭގައި ނެތް ދުވަހެއްގައިވެސް، އަމިއްލައަށް ކަންކަމާ ކުރިމަތިލާންކެރޭ، މޮޅު އަދި ޒިންމާދާރު ބަޔަކަށް ހެދުމަށެވެ. އެހެންކަމުން، ބައެއް ފަހަރު ދަރިންދެކެ ލޯބިވާލެއް ބޮޑުކަމުންވެސް މިހެން ބުނަންޖެހެއެވެ:

"ނޫނެކެވެ" (ބޭނުންވާ ކޮންމެ އެއްޗަކީ ހޯދައިދެވޭނެ އެއްޗެއް ނޫންކަން ދަސްކޮށްދިނުމަށް)

"މިފަހަރަކު ނޫނެވެ." (އެދޭ ކޮންމެ ކަމެއް ވަގުތުން ނުވިޔަސް، ކެތްކުރަން ދަސްކޮށްދިނުމަށް)

"މިކަން ކުރާނެ ގޮތެއް ދަރިފުޅު އަމިއްލައަށް ހޯދާށެވެ." (އަމިއްލައަށް ވިސްނައިގެން ކަންކަން ކުރަން ދަސްކޮށްދިނުމަށް)

ދަރިންނަށް ލޯތްބާއި، އަޅާލުމާއި، ހިތްވަރު ދޭށެވެ. އެކުދިންގެ ފަހަތުގައި އަބަދުވެސް ހުރިކަމުގެ ޔަގީންކަން ދޭށެވެ. ނަމަވެސް، އެކުދިންގެ ބަދަލުގައި މައްސަލަތަކުގެ ކުރިމައްޗަށް ނުކުމެ، ހަނގުރާމަ ކުރާ މީހަކަށް މައިންބަފައިން ވެގެން ނުވާނެއެވެ. ކުދިންނަށް އިންތަކެއް ކަނޑައަޅައި، އެކުދިން ޒިންމާދާރުކުރުވާށެވެ.

ތަހައްމަލުކުރުމާއި، ނާކާމިޔާބީއާ ކުރިމަތިލުމާއި، ކަންކަން ރަނގަޅުކޮށް އަލުން މަސައްކަތް ކުރުމުގެ ފުރުސަތު އެކުދިންނަށް ދޭށެވެ. ދަރިންނަށް ދެވޭނެ އެންމެ ބޮޑު ހަދިޔާއަކީ، އެކުދިންނަކީ އަމިއްލަ ފައިމައްޗަށް ތެދުވެވޭނެ ފަދަ "ލާމަސީލު" އިންސާނުންނަށް ހެދުމެވެ.