ސަމާ އިބްރާހީމް ދީދީ
މިއަދުގެ ވާދަވެރި ތަޢުލީމީ މާހައުލުގައި، ގިނަ ދަރިވަރުންނަށް ކުރިމަތިވާ އެންމެ ބޮޑު އެއް ގޮންޖެހުމަކީ އިމްތިޙާނުތަކާއި ފިލާވަޅުތަކުގެ ސަބަބުން ކުރިމަތިވާ ނަފްސާނީ ފިއްތުންތަކެވެ. ކިޔެވުމުގައި އެދެވޭ ނަތީޖާއެއް ހޯދުމަށްޓަކައި ހަމައެކަނި ފޮތްތަކަށް ސަމާލުކަން ދިނުމަކުން ނުފުދެއެވެ. އޭގެ ބަދަލުގައި، އަމިއްލަ ނަފްސުގެ ދުޅަހެޔޮކަމަށް އިސްކަންދިނުމަކީ ކޮންމެ ދަރިވަރަކަށްވެސް ކޮންމެހެން ބޭނުންތެރި ކަމެކެވެ.
އަމިއްލަ ނަފްސަށް އަޅާލުން (Self-care) އަކީ ކޮބައި؟
އަމިއްލަ ނަފްސަށް އަޅާލުމަކީ ތިމާގެ ޖިސްމާނީ، ނަފްސާނީ އަދި ރޫޙާނީ ދުޅަހެޔޮކަން ބެލެހެއްޓުމަށްޓަކައި އަމިއްލައަށް ކުރާ ކަންކަމެވެ. މީގެ މާނައަކީ ހަމައެކަނި އަރާމުކުރުމެއް ނޫނެވެ. މިއީ ދިރިއުޅުމުގެ ބުރަތަކާއި ހާސްކަން ކުޑަކޮށް، ސިކުނޑި ތާޒާކޮށް ބެހެއްޓުމަށް އެޅޭ މުހިއްމު ފިޔަވަޅެކެވެ. ދަރިވަރަކު އަމިއްލަ ނަފްސަށް އަޅާލުމުން، ކަންކަމަށް ސަމާލުކަން ދެވޭ މިންވަރު އިތުރުވެ، އުނގެނުމުގެ ޤާބިލުކަން ވަރުގަދަވެގެންދެއެވެ.
ނަފްސާނީ ދުޅަހެޔޮކަން އިތުރުކުރުމަށް 5 ޢަމަލީ އިރުޝާދެއް:
ދަރިވަރުންގެ ދިރިއުޅުން ހަމަޖެހޭ، އުފާވެރި ދިރިއުޅުމަކަށް ހެދުމަށްޓަކައި ތިރީގައިވާ 5 ކަންތައް ކުރެވިދާނެއެވެ:
- އަޅުކަމުން ހިތްހަމަޖެހުން ހޯދުން:ނަމާދުތަކަށް ފަރުވާތެރިވުމާއި ޤުރުއާން ކިޔެވުމަކީ ހިތުގެ ނުތަނަވަސްކަން ފިލުވައިދޭ އެންމެ ބޮޑު ބާރެވެ. ﷲ މަތިން ހަނދުމަކުރުމުން ނަފްސަށް އަމާންކަމާއި ހަމަޖެހުން ލިބިގެންދެއެވެ.
- ނިދި ހަމަކުރުމާއި ދުޅަހެޔޮ ކެއުން:ކޮންމެ ރެއަކުވެސް މަދުވެގެން 7 ގަޑިއިރު ނިދުމަށް އާދަކުރާށެވެ. ނިދި މަދުވުމަކީ ހަނދާން ބަލިވެ، މީހާ ފަސޭހައިން ރުޅިއަންނަ ކަމެކެވެ. ހަށިގަނޑަށް ފައިދާހުރި ކާނާ ކެއުމަކީ ސިކުނޑީގެ މަސައްކަތް ހަލުވިކޮށްދޭ ކަމެކެވެ.
- ވަގުތު ތަރުތީބުކޮށް ބްރޭކް ނެގުން:މެދުނުކެނޑި ގިނަވަގުތު ފޮތްކިޔަން އިނުމުގެ ބަދަލުގައި، ކޮންމެ 45 މިނެޓަކުން 10 މިނެޓުގެ ކުޑަ ބްރޭކެއް ނަގާށެވެ. މި ވަގުތުކޮޅުގައި ކުޑަކޮށް ހިނގާލާ ނުވަތަ ފެންފޮދެއް ބޯލުމުން ސިކުނޑީގެ ވަރުބަލިކަން ފިލައިދާނެއެވެ.
- ސްކްރީން ވަގުތު މަދުކުރުން:ފޯނާއި ސޯޝަލް މީޑިއާގައި ހޭދަކުރާ ވަގުތު މަދުކޮށްލާށެވެ. އޭގެ ބަދަލުގައި ބޭރުތެރޭގެ ތާޒާ ވައި ލިބޭ މާހައުލެއްގައި ވަގުތު ހޭދަކުރުމުން މީހާގެ މޫޑު ރަނގަޅުވެ، ހާސްކަން ކުޑަވެއެވެ.
- އިތުބާރު ހުރި މީހަކާ ވާހަކަ ދެއްކުން:ހިތްދަތިވާ ކަމެއް ދިމާވުމުން ނުވަތަ ކިޔެވުމުގެ ބުރަކަން ބޮޑުވުމުން އެކަމެއް ހިތުގައި ފޮރުވައިގެން ނުހުންނާށެވެ. މައިންބަފައިން ނުވަތަ ޓީޗަރެއް ފަދަ އިތުބާރު ކުރެވޭ މީހަކާ ޝުޢޫރުތައް ހިއްސާކުރުމަކީ ނަފްސާނީ ބުރަ ކުޑަކޮށްދޭ ކަމެކެވެ.
ނިންމާލަމުން ދަންނަވާނީ، ކިޔެވުމުގައި ކާމިޔާބު ހޯދުމަކީ ހަމައެކަނި ފޮތްތަކުން ލިބޭ އެއްޗެއް ނޫނެވެ. އެއީ ތިމާގެ ނަފްސާނީ އަދި ޖިސްމާނީ ދުޅަހެޔޮކަމާ ގުޅިފައިވާ ކަމެކެވެ. އަމިއްލަ ނަފްސަށް އޯގާތެރިވެ، ދުޅަހެޔޮ އާދަތަކަށް އިސްކަންދިނުމަކީ މާދަމާގެ އުޖާލާ މުސްތަގުބަލަށް އެޅޭ އެންމެ ވަރުގަދަ ބިންގަލެވެ.
ނޯޓް: ސަމާ އިބްރާހީމް ދީދީ – ކެރިއަރ ނެވިގޭޝަން އަދި ގްރޯތް ޕާތްވޭ ކޯޗް – ކުއެރޯ ގައިޑަންސް ސެންޓަރ
ސަމާ އިބްރާހީމް ދީދީ އަކީ ދަރިވަރުންގެ ނަފްސާނީ ދުޅަހެޔޮކަން އިތުރުކުރުމަށްޓަކައި ލިޔުންތެރިކަމަކީ ބޭނުންކުރެވިދާނެ ވަރަށް މުހިންމު ވަސީލަތެއްކަން އަބަދުވެސް ފާހަގަކުރައްވާ ބޭފުޅެކެވެ. އޭނާ ދެކޭގޮތުގައި ލިޔުންތެރިކަމުގެ ތެރެއިން ދަރިވަރުންގެ އިހުސާސްތައް ބޭރުކޮށްލުމަކީ ނަފްސާނީ ހަމަޖެހުން ހޯދުމަށް އެހީތެރިވެދޭނެ ކަމެކެވެ. މިގޮތުން ދަރިވަރުންގެ އުފެއްދުންތެރިކަން އިތުރުކޮށް، އަމިއްލަ ނަފްސަށް އޮންނަ އިތުބާރު ބޮޑުކުރުމަށް ސަމާ އަންނަނީ ތަފާތު ޕްރޮގްރާމްތަކުގެ ތެރެއިން ބާރުއަޅުއްވަމުންނެވެ.
advertisment
ހިޔާލު