އެމްއެންޔޫއިން އިނގިރޭސިވިލާތުގެ ކިއުއޭއޭ އެކްރެޑިޓޭޝަން ކާމިޔާބުކަމާއެކު ދަމަހައްޓައިފި

އިނގިރޭސިވިލާތުގެ މަތީ ތަޢުލީމުގެ ފެންވަރު ކަށަވަރުކޮށްދޭ މިނިވަން އިދާރާ، ކޮލިޓީ އެޝުއަރެންސް އެޖެންސީ ފޯ ހަޔަރ އެޑިއުކޭޝަން (ކިޔުއޭއޭ) އިން ދޭ "އިންޓަރނޭޝަނަލް ކޮލިޓީ އެކްރެޑިޓޭޝަން" (އައިކިޔުއޭ) ގެ މިޑް-ސައިކަލް ރިވިއު، ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން މާރިޗު 2026 ގައި ކާމިޔާބުކަމާއެކު ފުރިހަމަކޮށްފިއެވެ. މިއާއެކު، 2023 ވަނަ އަހަރު އެ ޔުނިވަރސިޓީއަށް ލިބުނު ބައިނަލްއަޤުވާމީ ދަރަޖަ ވަނީ ދަމަހައްޓާފައެވެ.

މި ކާމިޔާބީގެ މުހިންމު ބައިތައް:

• އެކްރެޑިޓޭޝަންގެ މުއްދަތު އިތުރުވުން: މި ރިވިއުއިން ފާސްވުމާ ގުޅިގެން، އެމް.އެން.ޔޫގެ ބައިނަލްއަޤުވާމީ އެކްރެޑިޓޭޝަންގެ މުއްދަތު މިހާރު ވަނީ އޮކްޓޫބަރު 2028 ގެ ނިޔަލަށް އިތުރުވެފައެވެ.
• ބައިނަލްއަޤުވާމީ މިންގަނޑުތަކަށް ފެތުން: މި އެކްރެޑިޓޭޝަނަކީ ޔޫރަޕުގެ މަތީ ތަޢުލީމީ ދާއިރާގެ ފެންވަރު ހިފެހެއްޓުމަށް ކަނޑައަޅާފައިވާ "ސްޓޭންޑަޑްސް އެންޑް ގައިޑްލައިންސް ފޯ ކޮލިޓީ އެޝުއަރެންސް އިން ދަ ޔޫރަޕިއަން ހަޔަރ އެޑިއުކޭޝަން އޭރިއާ" (އީއެސްޖީ) މިންގަނޑުތަކަށް ބިނާކޮށް ދެވޭ ދަރަޖައެކެވެ.

މި އެކްރެޑިޓޭޝަނަކީ ފަސް އަހަރުގެ މުއްދަތަށް ދެވޭ އެކްރެޑިޓޭޝަނެއް ނަމަވެސް، އެ މުއްދަތުގެ މެދުތެރެއިން ކުރިއަށްގެންދާ "މިޑް-ސައިކަލް ރިވިއު" އަކުން ފާސްވާންޖެހެއެވެ. ކިޔުއޭއޭގެ ރިވިއު ޓީމުން ފާހަގަކޮށްފައިވާ ގޮތުގައި، 2023 ވަނަ އަހަރު އެންމެ ފުރަތަމަ އެކްރެޑިޓޭޝަން ލިބުނު ފަހުން، އެމްއެންޔޫ އިން ވަނީ ތަޢުލީމީ ފެންވަރު މަތިކުރުމުގައި ފާހަގަކޮށްލެވޭ ފަދަ ބޮޑެތި ކުރިއެރުންތަކެއް ހޯދާފައެވެ.

މިކަމާ ގުޅޭގޮތުން ކިޔުއޭއޭގެ ހެޑް އޮފް އިންޓަރނޭޝަނަލް ކޮލިޓީ އެޝުއަރެންސް އެންޑް އެންހާންސްމަންޓް، ޕިއަރސް ވޯލް ވިދާޅުވީ، ދިވެހިރާއްޖޭގެ ޤައުމީ ޔުނިވަރސިޓީގެ ބޭފުޅުންނާއެކު މަސައްކަތް ކުރުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް ކަމަށެވެ. އަދި މި އުފެއްދުންތެރި، ބަދަހި ގުޅުން ކުރިއަށް އޮތް ތަނުގައިވެސް ދެމިއޮންނާނެ ކަމަށް އުންމީދު ކުރައްވާ ކަމަށެވެ.

އެމްއެންޔޫގައި މިއަދު ބޭއްވި ނޫސްވެރިންގެ ބައްދަލުވުމުގައި ވައިސް ޗާންސެލަރ ޑރ. އައިޝަތު ޝެހެނާޒް އާދަމް ވިދާޅުވީ، ދިވެހިރާއްޖޭގެ ޤައުމީ ޔުނިވަރސިޓީގައި، ކިޔަވައިދިނުމާއި، އުނގެނުމާއި، އަދި ދިރާސާކުރުމުގެ ހުރިހާ ދާއިރާއަކުންވެސް އަޅުގަނޑުމެން އެންމެ ބޮޑު އިސްކަމެއް ދެނީ ފެންވަރު ހިފެހެއްޓުމަށެވެ. ކިޔުއޭއޭ އިން ލިބުނު މި އެކްރެޑިޓޭޝަންއަކީ، އެމް.އެން.ޔޫގެ ސްޓްރެޓީޖިކް ޕްލޭން 2026-2030 ގައި ވެސް ކަނޑައަޅާފައިވާ ފަދައިން، ހަމައެކަނި ތަޢުލީމީ ގޮތުން ޤާބިލު ބައެއްގެ ބަދަލުގައި، މުޖުތަމަޢަށް އިންގިލާބީ ބަދަލުތަކެއް ގެނައުމަށާއި ޤައުމު ބިނާކުރުމުގައި ހަރަކާތްތެރިވުމަށް ބޭނުންވާ ހުނަރާއި، އަގުތަކާއި، އަދި ސިފަތައް ލިބިފައިވާ 'ފެންވަރު ރަނގަޅު މީހުން' ބިނާކުރުމަށް ކުރަމުންދާ މަސައްކަތަށް ލިބުނު އިތުރު ބާރެއް ކަމަށެވެ.

ޑރ. ޝެހެނާޒު ވިދާޅޫވީ، އެ ޔުނިވަރސިޓީން ދަސްވެނިވާ ކޮންމެ ދަރިވަރަކަށްމެ، ފާޑުކިޔުމާއެކު ވިސްނުމާއި، އައު އީޖާދުތައް އުފެއްދުމާއި، އަޚްލާޤީ ޒިންމާދާރުކަމާއި، އިސްނެގުމާއި، އަދި ދުނިޔެއަށް ހޭލުންތެރިވުމަށް ބާރުއަޅާ އަޅުގަނޑުމެންގެ 'ގްރެޖުއޭޓް އެޓްރިބިއުޓްސް' ނުވަތަ ދަސްވެނިންގެ ކިބައިގައި ހުންނަންޖެހޭ ސިފަތަކުގެ މައްޗަށް ބިނާވެފައިވާ، ބައިނަލްއަޤުވާމީ ގޮތުން ބަލައިގަންނަ ފެންވަރު ރަނގަޅު ތަޢުލީމެއް ލިބޭނެކަމުގެ ޔަޤީންކަން އޮންނާނެ ކަމަށެވެ. ޔުނިވަރސިޓީގެ ފެންވަރު ކަށަވަރުކުރާ ނިޒާމުތަކާއި ތަޢުލީމީ އުސޫލުތައް މެދުނުކެނޑި ހަރުދަނާކުރުމުގެ ސަބަބުން، އެމްއެންޔޫ އަކީ ތަޢުލީމީ ފެންވަރުގެ އެންމެ ކުރީ ސަފުގައި ދެމިއޮންނަ، އަދި ރާއްޖެއާއި މުޅި ދުނިޔެއަށް ހެޔޮ ބަދަލުތަކެއް ގެނައުމުގެ ޤާބިލުކަން ހުރި ދަސްވެނިން ބިނާކުރާ ތަނެއްކަން ކަށަވަރުކުރުމަށް އިސްކަމެއްދޭ ކަމަށް ވެސް ޑރ. ޝެހެނޒު ވިދާޅުވިއެވެ.

"ދުނިޔޭގެ ފެންވަރުގައި ބަލައިގަންނަ މި ޝަރަފުވެރި އެކްރެޑިޓޭޝަން ދެމެހެއްޓުމާއެކު، ދުނިޔޭގެ ފެންވަރުގެ ތަޢުލީމު ފޯރުކޮށްދިނުމަށާއި، ރާއްޖެއާއި ރާއްޖޭއިން ބޭރުގައި ތަޢުލީމީ ފެންވަރުގެ ގޮތުން ކުރީ ސަފުގައި ހިމެނޭ ތައުލީމީ މުވައްސަސާއެއްގެ ގޮތުގައި އޮތް މަޤާމު އެމް.އެން.ޔޫ އިން ދެމެހެއްޓުމަކީ އަޅުގަނޑުމެންގެ އަމާޒު" ޑރ. ޝެހެނާޒު ވިދާޅުވިއެވެ.

މި ކާމިޔާބީއާއެކު، ކިޔުއޭއޭ ކޮމިއުނިޓީގެ ފުރިހަމަ ބައިނަލްއަޤުވާމީ މެންބަރުކަންވެސް އެމްއެންޔޫއަށް ވަނީ ލިބިފައެވެ. މިކަމާ ގުޅޭ ތަފްޞީލީ  ރިޕޯޓު ކިޔުއޭއޭ ގެ ވެބްސައިޓުންނާއި އެމްއެންޔޫގެ ވެބްސައިޓުން މިހާރު ފެންނަން ހުންނާނެއެވެ.