އޭލެވެލްގައި ޏ. އޭއީސީން ހޯދީ އުއްމީދު ކުރިވަރަށްވުރެ ވެސް ރަނގަޅު ނަތީޖާއެއް

އެ ސްކޫލުގެ 14 ދަރިވަރުން ގަދަ ދިހައެއްގައި ހިމެނި އެއް ދަރިވަރަކު އެއްވަނަ ހޯދާފައިވޭ

އޭލެވެލްގައި ޏ. އަތޮޅު ތައުލީމީ މަރުކަޒު (ޏ.އޭއީސީ)ން މި ހޯދީ އުއްމީދު ކުރިވަރަށްވުރެ ވެސް ރަނގަޅު ނަތީޖާއެއް ކަމަށް އެ މަރުކަޒުން ބުނެފިއެވެ.

މިދިޔަ އަހަރު ބޭއްވި އޭލެވެލް އިމްތިޙާނުގައި އެ ސްކޫލުގެ 43 ދަރިވަރުން ބައިވެރިވެ އޭގެ ތެރެއިން 14 ދަރިވަރުން ޤައުމީ ގަދަ ދިހައެއްގައި ހިމެނި، އެއް ދަރިވަރަކު އެއްވަނަ ހޯދާފައިވެއެވެ. އެއީ އައިޝަތު ލީން އަބްދުﷲ އެވެ. އަދި އެ މަރުކަޒުގެ ތިން ދަރިވަރުންނަށް ހައި އެޗީވާސް ސްކޮލަރޝިޕް ލިބެއެވެ.

ރީޗެކް ކުރުމުން މި ނަތީޖާއަށް ބަދަލު އައުމަކީ އެކަށީގެންވާ ކަމެކެވެ.

ޏ. އޭއީސީގެ ޕްރިންސިޕަލް އަސްލަމް ހުސައިން ދަރިވަރު ނޫހަށް އިއްޔެ ވިދާޅުވީ، އެ މަރުކަޒުގެ އޭލެވެލް ނަތީޖާ އުއްމީދު ކުރިވަރަށްވުރެ ވެސް ރަނގަޅު ކަމަށާއި ނަތީޖާ ރަނގަޅުވީ ޓީމެއްގެ ގޮތުގައި ގުޅިގެން، ކުދިންނަށް ވަކިވަކިން އަމާޒުކޮށްގެން ކުރި މަސައްކަތްތަކެއްގެ ސަބަބުން ކަމަށެވެ.

"ރަނގަޅު ނަތީޖާއެއް ހޯދައިދޭން ކުދިންގެ ނަތީޖާ ވަޒަންކުރަމުން އަޅުގަނޑުމެން ދިޔައީ. ހުރިހާ ޓީޗަރުން ގުޅިގެން ކޮންމެ ކުއްޖެއްގެ ނަތީޖާ އެނަލައިޒްކޮށް ރަނގަޅު ކުރަންޖެހޭ ކަންތައްތައް ފާހަގަކޮށް ކޮންމެ ކުއްޖަކަށް ވަކިން ސަމާލުކަން ދީގެން މަސައްކަތް ކުރެވިފައި ހުރީ. އެގޮތަށް މަސައްކަތް ކުރުމުން ގިނަ ކުދިންގެ ނަތީޖާއަށް ބަދަލުވެސް އައި" އަސްލަމް ވިދާޅުވިއެވެ.

އަސްލަމް ވިދާޅުވީ، މިދިޔަ އަހަރުގެ ނަތީޖާ ދަމަހައްޓައި އެއަށްވުރެ ރަނގަޅު ނަތީޖާއެއް ހޯދުމުގެ މަސައްކަތް މިހާރުވެސް ފަށާފައިވާ ކަމަށެވެ.