ހުޅުމާލޭ ދެވަނަ ފިޔަވަހީގައި އަލަށް ހުޅުވާ ޝަހީދު ޢަލީ ސްކޫލަށް ޑެޕިއުޓީ ޕްރިންސިޕަލަކު ހޯދަނީ

ހުޅުމާލޭގައި އަލަށް ހުޅުވާ ޝަހީދު ޢަލީ ސްކޫލަށް ޑެޕިއުޓީ ޕްރިންސިޕަލަކު ހޯދަން އިއުލާން ކޮށްފިއެވެ.

މިނިސްޓްރީ އޮފް އެޑިޔުކޭޝަނުން އިއްޔެ ކުރި އިއުލާނުގައި ބުނެފައިވަނީ، އެ މަގާމަށް ހުށަހަޅަންޖެހޭ ލިޔެކިޔުންތައް ހުށަހަޅާނީ 21 ޖަނަވަރީ ވާ ބުދަ ދުވަހުގެ 13:30 ގެ ކުރިން، އޮންލައިން ލިންކު މެދުވެރިކޮށެވެ. އިޢުލާނުގެ ސުންގަޑި ހަމަވުމުގެ ކުރިން ސަރުކާރުން އަލަށް ބަންދު ދުވަހެއް ކަނޑައަޅައިފިނަމަ، އެ ކަނޑައަޅާ ދުވަހުގެ ޢަދަދަށް ވަޒީފާއަށް އެދޭ ފޯމު ބަލައިގަންނާނެ ކަމަށް އެ އިއުލާނުގައި ބުނެފައިވެއެވެ.

ޑެޕިއުޓީ ޕްރިންސިޕަލުގެ ޝަރުޠެއް ކަމަށް އެ އިއުލާނުގައި ބުނެފައިވާ ގޮތުގައި، ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޚާއްސަކުރެވިފައިވާ ދާއިރާއަކުން ޤައުމީ ސަނަދުގެ އޮނިގަނޑު ލެވެލް 7 ނުވަތަ 8 ގެ ސަނަދެއް ޙާޞިލްކޮށްފައިވުމާއި، ސްކޫލެއްފައި ކިޔަވައިދިނުމުގައި މަދުވެގެން 2 އަހަރު ޚިދުމަތް ކޮށްފައިވުމާއި،ތަޢުލީމުދޭ ނުވަތަ މަތީ ތަޢުލީމުދޭ އިދާރާއެއްގެ ހިންގުމުގެ ދާއިރާގައި 4 އަހަރު ޚިދުމަތްކޮށްފައިވުން ނުވަތަ ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޙާއްސަކުރެވިފައިވާ ދާއިރާއަކުން ޤައުމީ ސަނަދުގެ ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމާއި، ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޙާއްސަކުރެވިފައިވާ ދާއިރާއަކުން ޤައުމީ ސަނަދުގެ އޮނިގަނޑު ލެވެލް 9 ގެ ސަނަދެއް ޙާޞިލުކޮށްފައިވުމާއި، ސްކޫލެއްގައި ޓީޗަރެއްގެ ގޮތުގައި 2 އަހަރު ޚިދުމަތްކޮށްފައިވުމާއި، ތަޢުލީމުދޭ ނުވަތަ މަތީ ތަޢުލީމުދޭ އިދާރާއެއްގެ ހިންގުމުގެ ދާއިރާގައި 4 އަހަރު ޚިދުމަތްކޮށްފައިވުމެވެ. އަދި ޑެޕިއުޓީ ޕްރިންސިޕަލް ރޭންކް 1 ގައި 6 އަހަރު ޚިދުމަތްކޮށްފައިވާ ފަރާތްތަކަށް ވެސް ޝަރުތު ހަމަވެއެވެ.

އެއްވަނަ ރޭންކު ނަމަ އަސާސީ މޫސާރައަކީ މަހަކު 13,809 ރުފިޔާއެވެ. އެލަވަންސަކީ 6,444 ރުފިޔާއެވެ. ހާޒިރީ އެލަވަންސަކީ 174 ރުފިޔާއެވެ. ދެވަނަ ރޭންކު ނަމަ މުސާރައަކީ 15,460 ރުފިޔާއެވެ. އެލަވަންސަކީ 7،215 ރުފިޔާއެވެ. ހާޒިރީ އަލަވަންސަކީ 195 ރުފިޔާއެވެ.

ވަޒީފާއަށް އެންމެ ޤާބިލު ފަރާތެއް ހޮވުމަށް އެންމެ ގިނަ މާކްސް ލިބެނީ އިންޓަވިއުއަށެވެ. ދެން އަސާސީ ޝަރުޠަށާއި ޕްރެކްޓިކަލްއަށެވެ.

ޝަހީދު ޢަލީ ސްކޫލުގެ ކިޔަވައިދޭން ފަށާއިރު އެ ސްކުލުގެ އާބާދީ 2000 އާ ކައިރިކުރާނެ ކަމަށް ބެލެވެއެވެ. މިހާތަނަށް 1900 އަށްވުރެ ގިނަ ދަރިވަރުންނަށް އެ ސްކޫލުން ޖާގަ ދީފައިވެއެވެ.