ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ)ގެ ސްޓްރެޓީޖިކް ޕްލޭން އިފްތިތާޙްކޮށްދެއްވައިފިއެވެ.
މި ޕްލޭން އިފްތިތާޙުކޮށް ދެއްވީ އެ ޔުނިވަރސިޓީގެ ޗާންސެލަރު ޑރ. މަޙްމޫދު ޝައުޤީއާއި ވައިސް ޗާންސެލަރު ޑރ. އާއިޝަތު ޝެހެނާޒު އާދަމެވެ.
އެމްއެންޔޫ ސްޓްރެޓީޖިކް ޕްލޭން 2026-2030 އަކީ، ކުރިއަށް އޮތް ފަސް އަހަރަށް ޔުނިވަރސިޓީގެ ސްޓްރެޓީޖިކް ޑައިރެކްޝަން ކަނޑައަޅައި، ކިޔަވައިދިނުމާއި އުނގެނުމާއި، ރިސާރޗް އެންޑް އިނޮވޭޝަން، ގަވަރނަންސް، ދަރިވަރުން ބާރުވެރިކުރުވުމާއި އެކްސެލެންސް، ކޮމިއުނިޓީ އެންގޭޖްމަންޓް، ދެމެހެއްޓެނިވި ތަރައްޤީ އަދި އެހެނިހެން މުހިންމު އިންސްޓިޓިއުޝަނަލް ޕްރިއޯރިޓީތައް ކުރިއެރުވުމަށް މަގުފަހިކޮށްދިނުމެވެ. ސްޓޭކްހޯލްޑަރުންނާއެކު ފުޅާ ދާއިރާއެއްގައި މަޝްވަރާ ކުރުމަށްފަހު އެކުލަވާލާފައިވާ ސްޓްރެޓީޖިކް ޕްލޭނަކީ ރާއްޖޭގެ އެންމެ ކުރިއަރާފައިވާ މަތީ ތަޢުލީމު ދޭ މަރުކަޒުގެ ގޮތުގައި އެމްއެންޔޫގެ ދައުރު ދައްކުވައިދޭ ޕްލޭނެކެވެ.
މި ސްޓްރެޓީޖިކް ޕްލޭންގެ މައިގަނޑު 10 ލަނޑުދަނޑިތަކުގެ ތެރޭގައި ހިމެނެނީ ތަޢުލީމީ ފެންވަރުގައި ކުރިއެރުން ހޯދުމާއި، ދިރާސާތަކާއި އީޖާދުތައް ހަރުދަނާކުރުމާއި، މަތީ ތަޢުލީމުގެ ދާއިރާއިން ދިވެހިންގެ ޝަޚްޞިއްޔަތު އިތުރުކުރުމާއި، މަތީ ތަޢުލީމުގެ ދާއިރާއިން ދިވެހިން ބާރުވެރިކުރުވުމާއި، ދެމެހެއްޓެނިވި އަދި ހަރުދަނާ ޔުނިވަރސިޓީއެއް ބިނާކުރުމާއި، ގަވަރނަންސް އެންޑް ލީޑާޝިޕް ހަރުދަނާކުރުމާއި، މުޖުތަމަޢުގެ ގުޅުން އިތުރަށް ފުޅާކުރުމާއި، މަސައްކަތްކުރުމާއި އުނގެނުމުގެ މާޙައުލެއް ޤާއިމުކުރުމާއި، ދަރިވަރުންގެ މެދުގައި ތަޢުލީމީ ފެންވަރުގައި ކުރިއެރުން ހޯދުމެވެ. އަދި ރާއްޖެއާއި ބައިނަލްއަޤުވާމީ ހަރަކާތްތައް ފުޅާކުރުމެވެ. މި ލަނޑުދަނޑިތަކަކީ އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް (އެސްޑީޖީ) އާ ގުޅިފައިވާ ލަނޑުދަނޑިތަކެކެވެ.
ސްޓްރެޓީޖިކް ޕްލޭން ނެރުމަށް މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުން ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވީ، އެ ޕްލޭން އިފްތިތާޙް ކުރެވިގެން ދިޔައީ، ހަމައެކަނި އެމްއެންޔޫގެ މުވައްޒަފުންނާއި ދަރިވަރުންގެ އިޚްލާޞްތެރިކަމާއި، ކޯވިޑް-19 ގެ ބަލިމަޑުކަމުގެ ތެރޭގައި ވެސް ހޯދާފައިވާ ކާމިޔާބީތައް ފާހަގަކުރުމުގެ އިތުރުން ކުރިއަށް އޮތް ފަސް އަހަރަށް އަމާޒުތަކެއް ކަނޑައެޅުމުގެ ގޮތުން ކަމަށެވެ.
ސްޓްރެޓީޖިކް ޕްލޭން 2020-2025 ގެ ދަށުން އެމްއެންޔޫ އިން ވަނީ ގަވަރނަންސް އަދި ކޮލިޓީ އެޝުއަރެންސް ހަރުދަނާކޮށް، މަތީ ތަޢުލީމުގެ ފުރުޞަތު މުޅި ރާއްޖެއަށް ފުޅާކޮށް، ރިސާރޗް އަދި ޕޯސްޓް ގްރެޖުއޭޓް ޕްރޮގްރާމްތައް ފުޅާކޮށްފައެވެ. މީގެ އިތުރުން 16 ޕީއެޗްޑީ ޕްރޮގްރާމެއް ފެށުމާއި، އެގްރިކަލްޗަރ، ފިޝަރީޒް އަދި ސެކިއުރިޓީ ސްޓަޑީޒް ފަދަ އާ ފެކަލްޓީތައް އުފެއްދުމާއި، އީޖާދީ އަދި އިންޑަސްޓްރީ ގުޅިގެން އެމްއެންޔޫ އިނޮވޭޓް ހަބް ފަދަ ހަރަކާތްތައް ހިންގުން ހިމެނެއެވެ. ޕީއެޗްޑީ ސްކޮލަރޝިޕްތައް އިތުރުކޮށް، ބައިނަލްއަޤުވާމީ ތަމްރީނުގެ ފުރުސަތުތައް އިތުރުކޮށް، ކިޔަވާދިނުމާއި އުނގެނުމުގެ އާދަތައް ރަނގަޅުކޮށް، ދަރިވަރުންގެ ބައިވެރިވުން އިތުރުކޮށް، ސްޓޫޑެންޓް ކްލަބް ޕޮލިސީއެއް ތަޢާރަފްކޮށް، މުވައްޒަފުންނާއި ދަރިވަރުންގެ ތަރައްޤީއަށް އިންވެސްޓް ކުރެވިފައި ވެއެވެ. ސްޓްރެޓީޖިކް ޕްލޭންގެ މައިގަނޑު މަޤްޞަދަކީ އިންސާނީ ޤާބިލުކަން އިތުރުކުރުމާއި، މުސްތަޤްބަލަށް ތައްޔާރުވެފައިވާ ހުނަރުތައް ދަރިވަރުން ދަސްކޮށްދިނުމާއި، މަތީ ތަޢުލީމުގެ ދާއިރާގައި އެމްއެންޔޫ އިން ދެމިއޮތުމަށް މަސައްކަތްކުރުމެވެ.
ސްޓްރެޓީޖިކް ޕްލޭން 2026-2030 ބިނާވެފައި ވަނީ އެމްއެންޔޫ ސްޓްރެޓީޖިކް ޕްލޭން 2020-2025 ގެ މައްޗަށް ބިނާކޮށެވެ. އެއީ ކޮލިޓީ، ރިލޭޝަންސް، އިންކްލޫސިވިޓީ، ސަސްޓެއިނަބިލިޓީ އަދި ޕާޓްނަރޝިޕްގެ ތެރެއިން ކުރިއެރުވުމަށް އިސްކަންދޭ ކަމެކެވެ. މި ސްޓްރެޓީޖިކް ޕްލޭނުން ޤައުމީ ތަރައްޤީއާއި، ތަޢުލީމީ ފެންވަރާއި، ރިސާރޗް ކުރުމާއި އީޖާދީ ވިސްނުމާއި ޑިޖިޓަލް ކުރިއެރުމާއި، ޤައުމީ ތަރައްޤީއަށް އެއްބާރުލުން ދިނުމާއި، އަންނަން އޮތް ޖީލުތަކުގެ ލީޑަރުންނަށް ހިތްވަރު ދިނުމުގެ ގޮތުން ޤައުމީ ޔުނިވަރސިޓީއިން ދެއްވާ އަހަންމިއްޔަތު ރަމްޒުކޮށްދެއެވެ. ޔުނިވަރސިޓީގެ ސްޓްރެޓީޖިކް ލަނޑުދަނޑިތައް ކޮލެޖްތަކާއި، ފެކަލްޓީތަކާއި، ސެންޓަރުތަކާއި، ސްކޫލްތަކާއި، ކެމްޕަސްތަކާއި، އެޑްމިނިސްޓްރޭޓިވް ޔުނިޓްތަކުގައި ޙަރަކާތްތެރި އިނީޝިއޭޓިވްތަކަކަށް ބަދަލުކޮށް، އެ ޔުނިވަރސިޓީގެ ސްޓްރެޓީޖިކް ލަނޑުދަނޑިތައް ތަންފީޒު ކުރުމުގެ މަރުޙަލާއަށް ބަދަލުވެގެންދާނެ ކަމަށް އެމްއެންޔޫއިން ބުނެއެވެ.
advertisment
ހިޔާލު