ތެދެކެވެ. އަޅުގަނޑުމެން އެންމެންނަކީ، ފެންވަރުގެ ގޮތުން ހަމަހަމަ ބަޔަކަށް ނުވެދާނެއެވެ. އެކަމަކު އަޅުގަނޑުމެން އެންމެންގެ ޒިންމާއަކީ ހެޔޮލަފާ ޖީލެއް ބިނާކުރުމުގެ މަސައްކަތްކުރުމެވެ. ނަމާދަށް އަހުލުވެރި ޖީލެއް ބިނާކުރެވިގެން ނޫނީ ދުނިޔެއާއި އާޚިރަތުގައި ހެވެއްނެތެވެ. ރޭ ފޭދޫސްކޫލްގައި އޮތީ އައްޑޫގެ ދީނީ ޢިލްމުވެރިޔާ އައްޝައިޚް އަޙުމަދު ނާޒިޙު އިސްވެ ހުންނަވައި ހިންގި ފޭދޫގެ "ކޮންމެ ކުއްޖަކީ، ނަމާދުކުރާ ކުއްޖެއް" މިޕްރޮގްރާމް ނިންމުމުގެ ރަސްމިއްޔާތެވެ.
މި ޕްރޮގްރާމްގައި ބައިވެރިވި 100 އަށް ވުރެ ގިނަ ކުދިންގެ ތެރެއިން 93 ކުދިން ރޭ ވަނީ ގުރެޖުއޭޓް ވެފައެވެ. އެކުދިންނަށް ރޭ ސެޓްފިކެޓް ދެއްވީ އައްޑޫސިޓީގެ މޭޔަރ ޢަލީ ނިޒާރެވެ.
ފޭދޫ އަވަށުއޮފީހުގެ ކައުންސިލް އެގްޒެކެޓިވް އަލްއުސްތާޛް ހަސަން ޒަރީރު ދެކެވެޑައިގެންނެވި ގޮތުގައި ނަމާދާމެދު ކުދިންގެ ހިތްތަކުގައި ޝައުގުވެރިކަން އުފައްދާ އެކުދިން މިސްކިތަށް އަހުލުވެރިކުރުވަން ޖެހެއެވެ. އަވަށުއޮފީހުން އިސްނަންގަވައިގެން ރަށުގެ އިމާމުންނާއި ޝައިޚުންގެ މަޝްވަރާ ހޯއްދަވައި މިޕްރޮގްރާމް ރޭވީ އެހެންވެއެވެ. ޕްރޮގްރާމް ކުރިއަށް ގެންދިއުމަށް ރަށުގެ ޤުރުއާން ޓީޗަރުންނާއި އިމާމުންގެ އެހީތެރިކަން ލިބުނެވެ. އަދި ބެލެނިވެރިންގެ ވަރަށް ބޮޑު އެހީތެރިކަމާއި، ކިޔަވައިދިނުމުގައި އެތައް އަހަރެއްގެ ތަޖުރިބާ ހުރި ސައީދާ މިސްގެ އެހީތެރިކަންވެސް ލިބުނެވެ.
ހަސަން ޒަރީރު ވިދާޅުވީ، މި ޕްރޮގްރާމްގެ ބޭނުމަކީ، ކުދިންގެ ހިތުގައި ނަމާދު ކުރުމަށް ލޯބި ޖެއްސުމާއި ނަމާދުގެ އަހައްމިއްޔަތު ކުދިންނަށް ކިޔައިދިނުމާއި، ޒުވާން ހިތްތައް މިސްކިތާ ގާތްކޮށްދިނުމެވެ.
"ބޭނުމަކީ، ނަމާދަށް އަހުލުވެރި އަޚުލާޤު ރަނގަޅު ޖީލެއް ތަރުބިޔަތު ކުރުން." ހަސަން ޒަރީރު ވިދާޅުވިއެވެ.
އައްޝައިޚް އަޙުމަދު ނާޒިޙު ވިދާޅުވީ، މި ޕްރޮގްރާމުން ކުދިންނަށް ދަސްކޮށްދިނީ، ނަމާދުގެ ހަރަކާތްތަކާއި، ވުޟޫކުރާނެގޮތާއި، ނަމާދުގައި ކިޔާތަކެއްޗެވެ. އަދި ޤުރުއާނުން ކޮންމެވެސް މިންވަރެއް ހިތުން ދަސްކުރުވިއެވެ. އަދި އަޤީދާ އާއި ގުޅޭ މައުލޫމާތު ކުދިންގެ އުމުރާއި ގުޅޭ މިންވަރަށް ކިޔައި ދެއްވުމެވެ.
ފޭދޫގެ މިސްކިތްތަކުގައި އިމާމުވެ ނަމާދުކުރާނެ ޒުވާން އިމާމުންނާއި ޒުވާން ޚާޠީބުން އުފެއްދުމަށް ފޭދޫ އޮފީހުން މީގެކުރިން ވަނީ ކާމިޔާބު ޕްރޮގްރާމްތައް ހިންގާފައެވެ.
advertisment
ހިޔާލު