އދ. އޭއީސީގެ 45 ދަރިވަރުން ޓްރެފިކް މޮނީޓަރުންނަށް

އދ. އަތޮޅު ތަޢުލީމީ މަރުކަޒުގެ 45 ދަރިވަރުން ޓްރެފިކް މޮނީޓަރުކަމުގެ ތަމްރީނު ފުރިހަމަކޮށް ހުވާކޮށްފިއެވެ.

ޓްރެފިކް ޕޮލިސް އެންޑް ރޯޑް މެނޭޖްމަންޓާއި އދ. އަތޮޅު ތައުލީމީ މަރުކަޒު އަދި މަހިބަދޫ ޕޮލިސް ގުޅިގެން ކުރިއަށް ގެންދިޔަ މި ޕްރޮގްރާމުގައި އަންހެން 23 ދަރިވަރުންނާއި ފިރިހެން 22 ދަރިވަރުން ބައިވެރިވިއެވެ.

ޓްރެފިކް މޮނީޓަރުންނަށް ސެޓްފިކެޓް ދިނުމުގެ ރަސްމިއްޔާތު އޮތީ މި މަހުގެ 20 ވަނަ ދުވަހު، މަހިބަދޫގައި އދ. އޭއީސީގައެވެ. މި ރަސްމިއްޔާތު ޝަރަފްވެރިކޮށްދެއްވައި ދަރިވަރުންނަށް ސެޓްފިކެޓް ހަވާލުކޮށްދެއްވީ ހެޑް އޮފް މާލެ ޕޮލިސް އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް އެވެ.

މި މަހު 15 އިން ފެށިގެން ފަސް ދުވަހުގެ މުއްދަތަށް ކުރިއަށްގެންދިޔަ މި ޕްރޮގްރާމުގައި އެއްގަމު ދަތުރުފަތުރުގެ ގާނޫނާއި ގަވާއިދުތަކާއި ދަރިވަރުންގެ އަމިއްލަ ނަފުސުގެ ސަލާމަތާއި ރައްކާތެރިކަން އަދި އަމިއްލަ ނަފުސު ތަރައްގީކުރުމަށް ކުރެވިދާނެ ކަންކަން ދަސްކޮށްދީފައިވެއެވެ. އަދި ފަސްޓް އެއިޑް ސެޝަންތަކާއި ސްކޫލު ސަރަހައްދާއި މަގުމަތީގައި ޓްރެފިކް މޮނީޓަރުންގެ ގޮތުގައި ދަރިވަރުން ހަރަކާތްތެރިވާއިރު މުއާމަލާތުކުރާނެ ރިވެތި ގޮތްތަކަށް ދަރިވަރުން އަހުލުވެރިކުރުވައި ޓީމް ބިލްޑިންގ ހަރަކާތްތައް ކުރިއަށް ގެންގޮސްފައިވެއެވެ.