ލޭ އަޅަން ޖެހޭ މިންވަރާ އަޅާބަލާއިރު، ލޭ ހޯދަން ދަތިވަނީ އެކަމަށް އެކަށީގެންވާ ހޭލުންތެރިކަން ނެތީމައެވެ. އަމިއްލަ އިސްނެގުމަށް ދަރުމައަށް އެދިގެން ލޭ ހަދިޔާ ކުރާ މީހުން މަދުވީމައެވެ. އެކަމަށް ހައްލެއް ހޯދަން އިސްނެގީ ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ)ގައި ބެޗްލާސް އޮފް އާރޓްސް ކިޔަވާ ދަރިވަރުންނެވެ. އެ ދަރިވަރުން އެފަދަ ކެމްޕެއިނެއް ފެށީ، ލެއަކީ ކޮންމެ އިންސާނެއްގެ ފުރާނައާ ގުޅިފައިވާ މުހިންމު ކަމަކަށްވާތީ، އެކަން ހައްލުކުރަން ޤައުމީ ފެންވަރުގައި އަތުކުރި އޮޅާލަން ޖެހޭތީއެވެ.
މި ކެމްޕެއިނުގެ މަޤްޞަދުތަކުގެތެރޭގައި ޞިއްޙީ މިފަދަ ކަމެއްގައި އެންމެން އެކުގައި ގުޅިގެން މަސައްކަތްކުރުމާއި ލޭ ދިނުމަށް ޞިއްޙަތު ރަނގަޅު ޖީލެއް ބިނާކުރުމަށް ހޭލުންތެރިކުރުން ވެސް ހިމެނެއެވެ.
"އަތުކުރި އޮޅާލަމާ" ކެމްޕެއިން ޓީމުން ބުނީ، އަންނަ މަހުގެ ތެރޭގައި ލޭ ހަދިޔާ ކުރުމުގެ ކޭމްޕެއް ވެސް ބާއްވަން ތައްޔާރު ވަމުން އަންނަ ކަމަށެވެ. އެގޮތުން ލޭ ހަދިޔާކުރުމާއި ލޭ ހަދިޔާ ކުރުމުގެ ފައިދާއާއި އެއާ ގުޅުން ހުރި މައުލޫމާތު ފޯރުކޮށް ދިނުން ވެސް އެ ކޭމްޕްގެ ތެރެއިން ކުރިއަށް ދާނެ ކަމަށެވެ.
"ހޭލުންތެރިކަން އިތުރުކޮށްގެން އަމިއްލަ އިސްނެގުމާއެކު ގަވާއިދުން ލޭ ހަދިޔާކުރާ މީހުން އިތުރުވުން އަޅުގަނޑުމެން ބޭނުންވަނީ" ކޭމްޕެއިން ޓީމުން ބުންޏެވެ.
"އަތުކުރިއޮޅާލަމާ" ކެމްޕެއިން މިހާރު ކުރިއަށް ގެންދަނީ ސޯޝަލް މީޑިއާ ކެމްޕޭނެއްގެ ގޮތުގައެވެ. ގިނަ ބަޔަކު އަންނަނީ އެ ކެމްޕޭނުގައި ބައިވެރިވަމުންނެވެ. އެކަމުގައި ވަކި ފަންތިއެއް ނެތެވެ.
ރާއްޖޭގައި ލޭ ހޯދަން ޖެހޭ ނިސްބަތަށް ބަލާއިރު، އެވްރެޖް ގޮތެއްގައި ކޮންމެ ސައުވީސް ގަޑިއިރަކަށް 30 ޕައިންޓްގެ ލޭ ބޭނުންވެއެވެ. އެއީ މަހަކަށް ބަލާއިރު 900 އެއްހާ ޕައިންޓްގެ ލެއެވެ. ލޭ އެންމެ އާންމުކޮށް ބޭނުންވާ ތަލެސީމިއާގެ ބަލި މީހުންގެ ގޮތުގައި ވެސް 650 މީހުން ރަޖިސްޓްރީ ކޮށްފައިވެއެވެ. ކޮންމެ ދުވަހަކު ލޭ ނޭޅި ނަމަވެސް އެފަދަ ބަލި މީހުންނަށް ބޭނުންވާ ލޭ ވެސް ލިބުން ފަސޭހައެއް ނުވެއެވެ. މި ކެމްޕޭނުގެ ބޭނުމަކީ ޤަވާއިދުން ލޭ ދޭނެ މީހުން އިތުރުކުރުމެވެ.
advertisment
ހިޔާލު