ކެޔޮދޫ ސްކޫލުގެ ބަޑީސް ޕްރޮގްރާމް މި އަހަރުވެސް ފަށައިފި

ގުރޭޑް 7ން ފެށިގެން މަތީގެ ކުލާސްތަކުގެ ބައެއް ދަރިވަރުންނަށް ހިންގާ ބަޑީސް ޕްރޮގްރާމުގައި ޓިއުޓަރއެއްގެ ގޮތުން ކިޔަވައިދެނީ އެ ސްކޫލުގެ މަތީ ސާނަވީގެ ދަރިވަރުން

ވ. ކެޔޮދޫ ސްކޫލުން ކުރިއަށް ގެންދާ ބަޑީސް ޕްރޮގްރާމް މި އަހަރު ފަށައިފިއެވެ. 2021 ވަނަ އަހަރުން ފެށިގެން މި ޕްރޮގްރާމް އެ ސްކޫލުގައި ކުރިއަށް ގެންދެއެވެ.

ބަޑީސް ޕްރޮގްރާމް ކުރިއަށް ގެންދަނީ ގުރޭޑް 7ން ފެށިގެން މަތީ ގުރޭޑް ތަކުގެ ދަރިވަރުންގެ ތެރެއިން އެ ޕްރޮގްރާމުގައި ބައިވެރިވާން ހުޅުވާލުމުން އެކަމަށް އެދޭ ދަރިވަރުންނަށެވެ.

"ދެވަނަ ޓާމުގެ ނަތީޖާ ރަނގަޅު ކުރުމުގެ ގޮތުން އަޅުގަނޑުމެން ހުޅުވާލަނީ ބަޑީސް ޕްރޮގްރާމުގެ ދަށުން މާއްދާތައް ވަކިން ކިޔަވަން. އެ ޕްރޮގްރާމުގައި ކިޔަވަން ބޭނުންވެގެން ނަންނޯޓް ކުރާ ހުރިހާ ދަރިވަރުންނަށް ފުރުޞަތު ދެން" ކެޔޮދޫ ސްކޫލު ޕްރިންސިޕަލް ޒައީމާ ހުސައިން ދަރިވަރު ނޫހަށް ވިދާޅުވިއެވެ.

އޭނާ ވިދާޅުވީ، ބަޑީސް ޕްރޮގްރާމުގައި ޓިއުޓަރއެއްގެ ގޮތުގައި މަސައްކަތް ކުރަން 11 އަދި 12 ވަނަ ގުރޭޑްގައި ކިޔަވަމުންދާ ދަރިވަރުންގެ ޝައުޤުވެރިކަން ބޮޑު ކަމަށާއި އެކަމަށް ހުޅުވާލުމުން ކުރިމަތިލާ ކުދިން ވެސް އިތުރުވަމުން އަންނަ ކަމަށެވެ.

"ސްކޫލުގެ ޓީޗަރަކަށްވުރެ ބޮޑަށް ދަރިވަރަކު އައިސް ކުދިންނާއެކީގައި ރައްޓެއްސެއްގެ ގޮތުގައި ކިޔަވާދިނީމާ ކުދިންނަށް ކިޔަވަން ވެސް ފަސޭހަވޭ. އޭގެ ނަތީޖާ ވެސް ފެންނަމުން ދަނީ" ކޮންމެ އަހަރަކު ވެސް ފަހު ޓާމުގައި އެއް މަސް ދުވަހުގެ މުއްދަތަށް ކުރިއަށް ގެންދާ ޕްރޮގްރާމާ ބެހޭ ގޮތުން ޒައީމާ ވިދާޅުވިއެވެ.

"ކިޔައިދޭން ޓިއުޓަރއެއްގެ ގޮތުގައި މަސައްކަތް ކުރަން ޝައުޤުވެރިވާ ދަރިވަރުންގެ އަދަދުވެސް އިތުރުވަމުން އަންނައިރު، އޭގެ ސަބަބުން ކިޔަވައިދިނުމަށް ދަރިވަރުންގެ ޝައުޤު އުފެއްދުމަކީ ވެސް މި ޕްރޮގްރާމުގެ އެއް މަޤްޞަދު" ޒައީމާ ވިދާޅުވިއެވެ.

އެ ޕްރޮގްރާމް ނިންމައި، ޓިއުޓަރއެއްގެ ގޮތުގައި މަސައްކަތް ކުރާ ދަރިވަރުންނަށް އެ ސްކޫލުން ސެޓްފިކެޓެއް ދެއެވެ.

ކެޔޮދޫ ސްކޫލުގައި 206 ދަރިވަރުން އޭލޭވެލްއާ ހަމައަށް ކިޔަވަމުން ދެއެވެ.