ޗައިނާ ޔޫތު އެކްސްޗޭންޖް ޕްރޮގްރާމުގައި 11 ސްކޫލަކުން 12 ދަރިވަރުން

ޗައިނާ ޔޫތް އެކްސްޗޭންޖް ޕްރޮގްރާމުގައި 11 ސްކޫލަކުން 12 ދަރިވަރުން ބައިވެރިވާނެއެވެ.

މި ޕްރޮގްރާމުގައި ރާއްޖެއިން ބައިވެރިވާ ދިވެހި ދަރިވަރުންނާ މިނިސްޓަރ ޑރ. އިސްމާޢީލް ޝަފީޢު ވަނީ ބައްދަލުކުރައްވާފައެވެ.

ޔޫތް އެކްސްޗޭންޖް ޕްރޮގްރާމް ކުރިއަށްދާނީ މާދަމާއިން ފެށިގެން މި މަހު 9ން ފެށިގެން 12 އަށް ޗައިނާގެ ސިޗުއާން ޕްރޮވިންސްގައެވެ.

މި ޕްރޮގްރާމްގައި 11 ސްކޫލަކުން ޖުމްލަ 12 ދަރިވަރުން ބައިވެރިވެއެވެ. އޭގެ ތެރޭގައި ހިމެނެނީ 6 އަންހެން ދަރިވަރުންނާއި، 6 ފިރިހެން ދަރިވަރުންނެވެ.

މި ޕްރޮގްރާމުގެ ތެރޭގައި ދަރިވަރުންނަށް ޗެންގުއާ ޕްރައިމަރީ ސްކޫލާއި، ސަންސިންގްޑޫއީ މިއުޒިއަމް ގެ އިތުރުން ޑުޖިއާންޖިއަން ރިސާޗް ސެންޓަރ ފޯ ޖަޔަންޓް ޕަންޑާސްއަށް ޒިޔާރަތްކުރުމުގެ ފުރުޞަތު ލިބިގެންދާނެއެވެ. މީގެ އިތުރުން ޗައިނާގެ ސަގާފީ ޙަރަކާތްތައް ބަލާލުމުގެ ފުރުޞަތުވެސް ދަރިވަރުންނަށް ލިބިގެންދާނެއެވެ.

މި ޕްރޮގްރާމްގައި ބައިވެރިވާ ދަރިވަރުންނަށް ޗައިނާގެ ސަގާފަތާއި ތާރީޚާ ގުޅޭ ގިނަ މަޢުލޫމާތުތަކެއް ލިބިގެންދާއިރު, އެ ޤައުމުގައި ދިވެހިރާއްޖޭގެ ސަގާފަތް ދައްކާލުމަށް މަގުފަހިވެގެންދެއެވެ. އެހެންކަމުން, މިފަދަ ޕްރޮގްރާމްތަކުގެ ސަބަބުން ދިވެހިރާއްޖެއާއި ޗައިނާގެ ދެމެދުގައި ޒަމާނުއްސުރެ އޮތް ގާތްގުޅުން އިތުރަށް ބަދަހިވެގެންދެއެވެ.