ށ. މިލަންދޫގައި އިމާމުވެ ހުކުރުނަމާދު ކުރުމުގެ ޝަރަފު އެރަށު ސްކޫލުގެ ގުރޭޑް 10ގައި ކިޔަވަމުން އަންނަ އަޙްމަދު އަފްރަސް ޙަލީމް ހޯދައިފިއެވެ. މިލަންދޫގައި ހުންނަ މަސްޖިދުލް އިކުރާމުގައި އިމާމުގެ ހުކުރު ނަމާދު ކުރީ އޭނާއެވެ.
އަފްރަސްއަކީ ޒުވާން ޚަޠީބުން ތަމްރީނު ކުރުމަށް އެންމެ ފަހުން ކުރިއަށް ގެންދިޔަ ކޯހުން ފާސްވި ދަރިވަރެކެވެ.
އަފްރަސް ދަރިވަރު ނޫހަށް ބުނީ، އިމާމުވެ ނަމާދު ކުރުމަށް ކުޑައިރުއްސުރެ ޝައުޤު ހުންނަކަމަށެވެ. އެ ރަށު މިސްކިތުގެ މުދިމުންނާ ވާހަކަ ދައްކައިގެން ފުރަތަމަ ލިބުނީ ބަންގި ގޮވުމުގެ ފުރުޞަތެކެވެ. އޭގެ ފަހުން ޖަމާއަތުގައި ނަމާދު ކުރުމުގެ ފުރުޞަތުވެސް ލިބުމުން އޭނާ އައީ އެ ފުރުޞަތުގެ ބޭނުން ހިފަމުންނެވެ.
އެކަމުގައި އޭނާއަށް އެންމެ ބޮޑު އެހީތެރިކަމެއް ފޯރުކޮށްދިނީ މަންމައާއި ބައްޕައާއި ސްކޫލާއި ކައުންސިލުގެ އިތުރުން މިސްކިތްތަކުގެ އިމާމުންނެވެ.
ޖަމާއަތުގައި އިމާމުވެ ހުކުރު ކުރުމުގެ ފުރުޞަތަކަށް އޭނާއަށް އުއްމީދު ކުރެވުނީ، ފަރުޟު 5 ނަމާދަށް ރައްކާތެރިވެ، ދީނީ ބޭބޭފުޅުންނާއި އޮންނަ ގާތްކަމާއި އެމީހުންގެ ފަރާތުން ލިބުނު އިރުޝާދާއެކު އެ ރޮނގުން ކުރިއަށް ދިއުމަށް ލިބުނު ހިތްވަރެއްގެ ސަބަބުންނެވެ.
އަފްރަސް ދަނީ ޤުރުއާން ހިތުދަސްކުރުމުގެ މަސައްކަތް ކުރަމުންނެވެ. މިހާރު އެ މަސައްކަތް ކުރަނީ މަންމަމެންނާއެކު ގޭގައެވެ.
ކުރިއަށް އޮތީ އޯލެވެލް އިމްތުޙާނު ކަމަށް ވާތީ، އެ އިމްތިޙާނު ރަނގަޅު ނަތިޖާއެއް ނެރުމަކީ ވެސް އޭނާގެ އެއް އުއްމީދެވެ. އަފްރަސް ބޭނުންވަނީ އޭނާ ފަދައިން އިތުރު ދަރިވަރުން އިމާމުވެ ނަމާދުކުރުމާއި ޙުޠުބާގެ މިމްބަރުން ފެންނާށެވެ.
advertisment
ހިޔާލު