ސިންގަޕުރުގެ ވަންޑާ ނޭޝަނަލް ޖޫނިއާ ސައިންސް އޮލިމްޕިއާޑުގައި ބައިވެރިވެ ރާއްޖޭގައި ހުންނަ ބްރައިޓްވޭ އިންޓަރނޭޝަނަލް ސްކޫލުގެ 37 ދަރިވަރުން މެޑަލް ހޯދައިފިއެވެ.
މި މުބާރާތް ކުރިއަށް ގެންދިޔައީ ހުސްވި މެއި މަހުގެ 24 ވަނަ ދުވަހު ބްރައިޓްވޭގައެވެ.
ބްރައިޓްވޭގެ 70 ދަރިވަރުން ސައިންސް އޮލިމްޕިއާޑުގައި ބައިވެރިވެ، 37 މެޑަލް ހޯދިއެވެ. އެއީ ރަން 9 މެޑަލާއި ރިހި 8 މެޑަލާއި 20 ލޯ މެޑަލެވެ. މެޑަލް ހާސިލްކުރި ހުރިހާ ދަރިވަރުން، އަންނަ ޑިސެމްބަރު 12 އިން 18 އަށް ޗައިނާގައި ބޭއްވާ ގްލޯބަލް ރައުންޑް – ސްޓީމް އަހެޑް 2025 އަށް ކޮލިފައިވެފައިއެވެ.
ސިންގަޕޫރު ސްކޫލް ސައިންސް ސިލަބަހުގެ މައްޗަށް ބިނާކޮށް ގްރޭޑް 3 އިން 10 އަށް ކިޔަވާ ދަރިވަރުންނަށް އަމާޒުކޮށްގެން ބާއްވާ މި މުބާރާތަކީ ވިސްނުމުގެ ހުނަރު މަތިކޮށް، ސައިންޓިފިކް ކޮންސެޕްޓްތަކުގެ އެހީގައި އުފެއްދުންތެރިކަމާއި ދިމާވާ ގޮންޖެހުންތަކާ އެކު ކުރިއަށް ދިއުމަށް ހިތްވަރު ދިނުމުގެ މަގްސަދުގައި ބާއްވާ މުބާރާތެކެވެ. ބައިނަލްއަޤްވާމީ މި ޙަރަކާތުގައި ދުނިޔޭގެ އެކި ކަންކޮޅުތަކުން ޒުވާން ސައިންސްވެރިން އެއްވެ، އެފަރާތްތަކުގެ މައްސަލަތައް ޙައްލުކުރުމާއި، އުފެއްދުންތެރިކަމުގެ ދާއިރާއިން އެއްބާރުލުންދީ ޤާބިލުކަން އިތުރުކުރާނެއެވެ.
ބްރައިޓްވޭގެ ދަރިވަރުން ހޯދި ކާމިޔާބީއަށް މަރުޙަބާ ކިޔައި ދަރިވަރުންނަށް އެ ސްކޫލުން ވަނީ ތަޢުރީފުކޮށްފައެވެ.
advertisment
ހިޔާލު