އެ ސްކޫލުގެ ކޮންމެ ކުއްޖަކު ގަހެއް އިންދައި ހެއްދިއިރު، އެއިން 45 ކިލޯގެ ދަނޑިއަލުވި ލިބުނު
ދިރާސީ އާ އަހަރު ފެށިދުވަހު މާރަންދޫ ސްކޫލުގެ ކޮންމެ ދަރިވަރަކު ދަނޑިއަލުވި ގޮފިގަނޑެއް އިންދިއެވެ. މިއަދު އެކުދިން މާހެފުމުގައި ބޭނުން ކުރީ އެ ދުވަހު އިންދި ދަނޑުއަލުވިއެވެ.
އެ ސްކޫލުގެ 168 ދަރިވަރުންނާއި ޓީޗަރުން ހިމެނޭހެން ހުރިހާ ސްޓާފުންނާއި ޕީޓީއޭގެ މެމްބަރުން މިއަދު އެ ސްކޫލުގައި ބޭއްވި މާހެފުމުގައި ބައިވެރިވިއެވެ. މާހެފުމުގެ ކުރިން ދަރިވަރުންނަށް ޚާއްޞަ ދީނީ ދަރުސެއް ކުރިއަށް ގެންދިޔައެވެ.
"މިއީ ވަރަށް އުފާވެރި އިހުސާސެއް ކުރިވި ކަމެއް. ދަރިވަރުންގެ ދަނޑުއަލުވި ޕްރޮޖެކްޓް ކާމިޔާބު ކަމާއެކު ކުރިއަށް ގެންދެވުމުގެ އުފަލާއި އެ ހިތްހަމަޖެހުން ދަރިވަރުންނާއި ސްކޫލަށް މިއަދު ލިބިއްޖެ" މާހެފުމަށްފަހު، މާރަންދޫ ސްކޫލުގެ ލީޑިންގ ޓީޗަރު ޝާހިދާ މުޙައްމަދު ދަރިވަރު ނޫހަށް ވިދާޅުވިއެވެ.
މާހެފުމުގައި ދަނޑުއަލުވި ބޭނުން ކުރީ އެ ކައްކައިގެން ފަތް މޮޑެގެންނެވެ. އެއާއެކު ދެން ބޭނުން ކުރީ ކާއްޓާއި މަހާއި ކަދުރެވެ.
ކައްޓަލައަކީ މާރަންދޫގެ ނަމާ ގުޅިފައިވާ ނަމެކެވެ. އެރަށުގެ ޒަމާންވީ އާދަކާދައާއި ކެއުމުގައި ވެސް ބޭނުން ކުރަމުން އައި ބާވަތެކެވެ. އެ ސަޤާފަތް ދިރުވައި އާލާ ކުރުމުގެ ގޮތުން އެ ރަށު ސްކޫލަށް ވިސްނުނީ، ކުދިން ބައިވެރިކޮށްގެން އެފަދަ މުހިންމު ހަރަކާތެއް ކުރިއަށް ގެންދާށެވެ. ދަނޑުއަލުވި ހެއްދީ އެގޮތަށް ވިސްނި ވިސްނުމެއްގެ ތެރެއިންނެވެ.
އަހަރު ފެށުނު ދުވަހު ސްކޫލަށް ކޮންމެ ކުއްޖަކު ގެންދިޔައީ ދަނޑިއަލުވި ގޮފިގަނޑެކެވެ. އެ ދުވަހު ދަރިވަރުން އިންދި އެ ގޮފިގަނޑު ހެދި، އޭގެ ފޮނިރަހަ އެކުދިންނަށް މިއަދު ލިބިއްޖެއެވެ.
"ދަނޑިއަލުވީގެ ރަހަ ކުރިން ނުބަލާ ފައުންޑޭޝަން ސްޓޭޖްގެ ދަރިވަރުން މިއަދު އޭގެ އަޖުމަބެލި. މީރުވެގެން ވެސް އުޅުނު" ޝާހިދާ ވިދާޅުވިއެވެ.
ޝާހިދާ ވިދާޅުވީ، އާންމު ގޮތެއްގައި ހައެއްކަ މަސްތެރޭގައި ދަނޑުއަލުވި ކެނޑޭވަރުވާ ކަމަށާއި ގޮފިތައް އިންދި ދުވަސްވަރަކީ ވިއްސާރަ މޫސުމަކަށް ވުމާއި އޭގެ ފަހުން ވެސް އައީ ވިއްސާރަ ދުވަސްވަރަކަށް ވުމުން، މަދު ދުވަސްތަކެއްގައި ނޫނީ ގަސްތަކަށް ފެންވެސް ދޭކަށް ނުޖެހޭ ކަމަށެވެ.
މާރަންދޫ ސްކޫލުގެ ވިސްނުން ހުރީ މިފަދަ މުހިންމު މަސައްކަތްތަކުގައި ދަރިވަރުންގެ ހިއްސާ އިތުރު ކުރާށެވެ. މިއީ ފެށުމެއް ކަމަށް ބަލައިގެންނެވެ.
advertisment
ހިޔާލު