މިއަދަކީ އަމީނިއްޔާ ސްކޫލުގެ 80 ވަނަ އަހަރީ ދުވަހެވެ. އެތައް ޒުވާނުންނެއްގެ ސިކުނޑި ބައްޓަންކޮށް، ޢިލްމީ ކާމިޔާބީއާއި، އަޚްލާޤު ކުރިއެރުވުމާއި، އުނގެނުމަށް އުމުރު ދުވަހުގެ ލޯތްބެއް ވަނީ އެ ސްކޫލުން އުފައްދައިދީފައެވެ. މި އިން ދައްކުވައިދެނީ ފަޚުރުވެރި ތަރިކައާއި، އަންނަން އޮތް ޖީލުތައް ބާރުވެރިކުރުވުމަށް އެ ސްކޫލުން ކުރާ މަސައްކަތާއި ސާބިތުކަމެވެ. އަމީނިއްޔާ ސްކޫލަކީ އެންމެ ދުވަސްވީ އެއް ސްކޫލެއްގެ އިތުރުން އެންމެ އާބާދީ ބޮޑު، އެންމެ ގިނަ ކާމިޔާބީތައް ހޯދި އެއް ސްކޫލެވެ. އަންހެން ކުދިންނަށް ތަޢުލީމް ފޯރުކޮށް ދިނުމަށް އޭރު އުފެއްދި ސްކޫލަށް 80 އަހަރު ފުރުނުއިރު މިއަދު އެ ސްކޫލުގައި 2003 ދަރިވަރުން ކިޔަވަމުން ގެންދެއެވެ. އެއީ 991 ފިރިހެން ދަރިވަރުންނާއި 1012 އަންހެން ދަރިވަރުންނެވެ. ދަރިވަރުންގެ ކުރިއެރުމާއި ފާގަތިކަމަށް މަސައްކަތް ކުރުމަށް 215 މުވައްޒަފުން މަސައްކަތް ކުރަމުން ގެންދެއެވެ.
އަމީނިއްޔާ ގެންދަނީ ހުރިހާ ދަރިވަރުންނަށް ވެސް ކުރިއެރުމާއި ކާމިޔާބީ އާއި މުޖުތަމައުއަށް އެހީތެރިކަން ފޯރުކޮށްދެވޭނެ ހަމަހަމަ މާހައުލެއް ގާއިމުކޮށްދީ ނަމޫނާ ދައްކަމުންނެވެ.
ހަމައެކަނި އަންހެން ކުދިންނަށް ކިޔަވައި ދެމުން އައި ސްކޫލުގައި ދެ ޖިންސަށް ކިޔަވައިދޭން ފެށީ އެ ސްކޫލު އުފެއްދިތާ 67 އަހަރު ފަހުން، 2011 ވަނަ ޖޫން މަހުގެ 14 ވަނަ ދުވަހުއެވެ.
1944 ވަނަ އަހަރު އުފެދުނު އަމީނިއްޔާ ސްކޫލުގެ މި ކާމިޔާބީތަކުން ދައްކުވައިދެނީ އެ ސްކޫލުގެ މުއްސަނދި ތާރީހާއި ރާއްޖޭގެ އެންމެ ކުރިއަރާފައިވާ މުއައްސަސާއެއްގެ ގޮތުގައެވެ. އެ ސްކޫލުގެ ބާނީ އަމީރު މުހައްމަދު އަމީންގެ ޝަރަފުގައި 1956 ވަނަ އަހަރު ނަން ބަދަލުކޮށް، 1957 ވަނަ އަހަރު ސާނަވީ ތަޢުލީމު ތައާރަފު ކުރިއެވެ. އެ ސްކޫލުގެ ފުރަތަމަ ޔުނިފޯމް ތަޢާރަފު ކުރީ 1960 ވަނަ އަހަރު އެވެ. އެ ސްކޫލުގެ ފުރަތަމަ ބިދޭސީ ޕްރިންސިޕަލް ޖޯން އެފް ރައިޓްގެ އިސްނެންގެވުމުގެ ދަށުން އަމީނިއްޔާއިން 1961 ވަނަ އަހަރު މީޑިއަމް އޮފް އިންސްޓްރަކްޝަންގެ ގޮތުގައި އިނގިރޭސި ބަހަށް ބަދަލު ކުރިއެވެ. ޖީސީއީ އޯލެވެލް އިމްތިހާނުގައި އެ ސްކޫލުން ބައިވެރިވާން ފެށީ 1967 ވަނަ އަހަރުއެވެ.
1963 ވަނަ އަހަރު ގާލް ގައިޑްސް އުފެއްދެވިއެވެ. 1970 ގެ އަހަރުތަކުގެ ކުރީކޮޅު ސްކޫލް ބޭންޑް އުފެއްދިއެވެ. އެ ސްކޫލުގައި އާޓް ކްލަބް އުފެއްދީ 1990 ވަނަ އަހަރުއެވެ.
އަމީނިއްޔާގައި ދެ ދަންފަޅިއަށް އެންމެ ފުރަތަމަ ކިޔަވައިދޭން ފެށީ 1982 ވަނަ އަހަރުއެވެ. 1986 ވަނަ އަހަރު ބެލެނިވެރިންނާއި މުދައްރިސުންގެ ޖަމިއްޔާ އުފެއްދިއެވެ. މި ކަންކަމުގެ ސަބަބުން އަމީނިއްޔާއަކީ ތައުލީމާއި އުފެއްދުންތެރިކަމާއި މުޖުތަމައުއަށް ދެމެހެއްޓެނިވި ގޮތެއްގައި ދެމިއޮންނާނެ އަހައްމިއްޔަތުކަން ހާމަކޮށްދޭ ކަމެކެވެ.
އަމީނިއްޔާ ސްކޫލަކީ އިންކްލޫސިވް އެޑިއުކޭޝަނަށް އެންމެ ބޮޑު އިސްކަމެއް ދޭ އެއް ސްކޫލެވެ. ރާއްޖޭގެ އެންމެ ބޮޑު އެއް ހަބް ސްކޫލުގެ ގޮތުގައި އެ ސްކޫލުގެ ނަން އަންނަނީ ދަމަހައްޓަމުންނެވެ. އެ ސްކޫލުގެ "ޑްރީމް ކުލާސް" ތަކުގައި ކިޔަވަމުންދާ 200 އެއްހާ ދަރިވަރުންނަށް އެހީ ތެރިކަން ފޯރުކޮށްދެނީ އެ ސްކޫލުގެ އިންކްލޫސިވް ސަޕޯޓް ޔުނިޓުންނެވެ. މި ޔުނިޓްގެ އެހީތެރިކަމާއެކު މެއިންސްޓްރީމް ޓީޗަރުންނާއި ޑްރީމް ޓީޗަރުން ގުޅިގެން ކުރިއަށް ގެންދާ ޕާޓްނަރޝިޕްގެ ސަބަބުން ދަރިވަރުންގެ ތައުލީމީ ދަތުރަށް ވަރަށް ބޮޑު ލުޔެއް ލިބި، ފަރުދީ އަދި ޢިލްމީ ރޮނގުން ކުރިއަށް ދިއުމުގެ ފުރުޞަތު ލިބިގެންދެއެވެ. އަދި ކޮމްޕްލެކްސް ލާނިން ޕްރޮފައިލްތައް ހުންނަ ދަރިވަރުންނަށް ޑްރީމް ކްލާސް މެދުވެރިކޮށް އެ ސްކޫލުން ވަން ޓު ވަން ސަޕޯޓް ވެސް ދެ އެވެ.
އަމީނިއްޔާ ސްކޫލް މިއަދު ފައްކާ ކުރަމުން ދަނީ ޒަމާނީ ތަޢުލީމީ ބޭނުންތަކާ އެއްގޮތަށެވެ. ވޭތުވެދިޔަ އަހަރުތަކުގައި ފާހަގަކޮށްލެވޭ ވަރުގެ ތަރައްޤީތަކެއް އެ ސްކޫލަށް ވަނީ ގެނެސްފައެވެ. އެ ސްކޫލުގައި އެންމެ ޒަމާނީ ވަސީލަތްތައް ޤާއިމް ކުރެވެމުންދާއިރު، ޚާއްޞަ ކޮމްޕިއުޓާ ލެބާއި، ކުޅިވަރު ވަސީލަތްތަކުގެ ސަބަބުން އިތުރު ހަރަކާތްތައް ފަހި މާހައުލެއް ވަނީ ޤާއިމް ކޮށްފައެވެ. މީގެ އިތުރުން ހުރިހާ ދަރިވަރުންނަށް ވޮކޭޝަނަލް ޕްރޮގްރާމްތައް ހިންގުމަށް، ކާޕެންޓްރީއާއި ފެހުމާއި އާޓްގެ އިތުރުން ކެއްކުމުގެ ހުނަރު ތައް ދަސްކޮށްދޭނެ ލެބްތައް ވަނީ ޤާއިމް ކޮށްފައެވެ.
އަމީނިއްޔާއަށް މި ގެންނަމުންދާ ބަދަލުތަކުން ދައްކުވައިދެނީ އަމީނިއްޔާ ސްކޫލުގެ މުއްސަނދި ތާރީހާއި އިލްމީ ގޮތުން ދަމަހައްޓަމުން އަންނަ އާދަކާދަ އެގޮތުގައި ދަމަހައްޓައި، ދަރިވަރުންނަށް ތައުލީމީ ތަޖުރިބާއެއް ހޯދައިދިނުމުގައި އެ ސްކޫލުގެ އަޒުމާއި ހިތްވަރެވެ.
ފާއިތުވި 80 އަހަރުގެ ތެރޭގައި އަމީނިއްޔާ ސްކޫލުގައި 16 ޕްރިންސިޕަލުން މަސައްކަތް ކުރެއްވިއެވެ. އަމީނިއްޔާ ސްކޫލުގެ ފުރަތަމަ ޕްރިންސިޕަލަކީ އަންނަބީލާ އާމިނަތު ހުސައިނެވެ. ދެ ފަހަރެއްގެ މަތިން 15 އަހަރު ވަންދެން އެކަމަނާ ޕްރިންސިޕަލެއްގެ ގޮތުން މަސައްކަތް ކުރެއްވިއެވެ. އޭގެ ފަހުން ދެ ފަހަރެއްގެ މަތިން ޕްރިންސިޕަލް ކަމުގެ މަޤާމް އަދާކުރެއްވީ މ. ކުސުމާ ވެލިކަލާއެވެ. ދެ ފަހަރެއްގެ މަތިން 11 އަހަރު ޕްރިންސިޕަލްކަން އޭނާ އަދާކުރެއްވިއެވެ. އަމީނިއްޔާގެ މިހާރުގެ ޕްރިންސިޕަލަކީ ނާޒްލީން ވާފިރެވެ. އޭނާ ޕްރިންސިޕަލްކަމާ ހަވާލުވެ ވަޑައިގެންނެވީ 2015 ވަނަ އަހަރުގައެވެ.
advertisment
ހިޔާލު