ތިން އަހަރުން އެކުލަވާލީ، އައްޑޫ ސިޓީގެ އާރިކިޅިއާއި ފެހެލަ ކިޅިއާއި މާ ކިޅި ހިމެނޭ ގޮތަށް މުޅި ސަރަހައްދަށް ދެމެހެއްޓެނިވި ތަރައްޤީ ގެންނާނެ ގޮތުގެ ޕްލޭނަކާއި އެތަންތަން އޮންނާނެ ގޮތުގެ މޮޑަލެއް
އައްޑޫ ސިޓީގެ ކުޅިތަކާއި ޗަސްބިން ހިމެނޭ ސަރަޙައްދަށް ހެޔޮ ބަދަލެއް ގެނުވާނެ ތަރައްޤީގެ ކޮންސެޕްޓެއް ހިރާ ސްކޫލްގެ ދަރިވަރުން އެކުލަވާލައި އޭގެ މޮޑެލެއް ތައްޔާރުކޮށް އާންމު ކޮށްފިއެވެ. އައްޑޫ ސިޓީގެ އާރިކިޅިއާއި ފެހެލަ ކިޅިއާއި މާ ކިޅި ހިމެނޭ ގޮތަށް މުޅި ސަރަހައްދަށް ދެމެހެއްޓެނިވި ގޮތަށް ތިމާވެއްޓާ ރައްޓެހި ގޮތަށް އެ ތަންތަން ތަރައްޤީ ގެންނާނެ ގޮތުގެ ފުރިހަމަ ޕްލޭނެއް ދަރިވަރުން ވަނީ އެކުލަވާލާފައެވެ. ދަރިވަރުން ތައްޔާރު ކުރި ކޮންސެޕްޓާއި މޮޑެލް އައްޑޫ ސިޓީގެ ކައުންސިލާ އިއްޔެ ވަނީ ހިއްސާ ކޮށްފައެވެ.
ހިރާ ސްކޫލުގެ ދަރިވަރުން މި ކޮންސެޕްޓާއި މޮޑެލް ތައްޔާރު ކުރަން ތިން އަހަރު ދުވަސް ހޭދަ ކުރިއެވެ.
އައްޑޫ ސިޓީގެ ކުޅުތަކާއި ޗަސްބިން ހިމެނޭ ސަރަހައްދަށް އިންގިލާބީ ބަދަލެއް ގެނުވަން ދަރިވަރުން ތައްޔާރު ކުރި ކޮންސެޕްޓަށް އައްޑޫ ސިޓީ ކައުންސިލުން ވަނީ މަރުޙަބާ ކިޔާފައެވެ. އެ ކޮންސެޕްޓްގައި ހިމެނޭ ބައެއް ކަންތައްތަކީ އެ ކައުންސިލުން މިހާރު ވެސް ކުރަން ނިންމާފައިވާ ކަންތައްތައް ކަމަށް ފާހަގަކޮށް އެ ސަރަހައްދު ތަރައްޤީ ކުރާއިރު އެ ދަރިވަރުންގެ ބައިވެރިވުން އޮންނާނެ ގޮތަށް މަސައްކަތް ކުރިއަށް ގެންދާނެ ކަމަށް ވެސް ކައުންސިލުން ވަނީ ބުނެފައެވެ.
ހިރާ ސްކޫލްގެ ޕްރިންސިޕަލް މަރިޔަމް ސިތާރާ ދަރިވަރު ނޫހަށް ވިދާޅުވީ އެ ސްކޫލުގެ ސްޓޫޑެންޓް ލީޑަރުންގެ ގޮތުގައި މަސައްކަތް ކުރާ ދަރިވަރުން، މުޖްތަމަޢުގައި ހުންނަ މުހިންމު ކަންތައްތަކަށް އިސްކަންދީގެން ޕްރޮޖެކްޓް އެކުލަވާލާ ކަމަށެވެ. އެ ދަރިވަރުންގެ މި ފަހުގެ ޕްރޮޖެކްޓަކަށް ވީ، އައްޑޫގައި ގުޅިފައިވާ ތިން ކުޅިއަށް އަމާޒުކޮށް ދެމެހެއްޓެނެވި ގޮތެއްގައި ތިމާވެއްޓަށް ގެއްލުންނުވާ ގޮތަށް އެ ކުޅިތައް ހިމާޔަތް ކުރެވި އެ ސަރަޙައްދަށް ބޮޑު ބަދަލެއް ގެނުވާނެ ކޮންސެޕްޓެއް ތައްޔާރު ކުރުމެވެ.
އެ ދަރިވަރުންގެ މައިގަނޑު ތީމަކަށް މިފަހަރު ކަނޑައަޅާފައި ވަނީ ކުޅިތައް ހިމާޔަތް ކުރުމެވެ.
ސިތާރާ ވިދާޅުވީ ކުޅިތައް ހިމާޔަތް ކުރުމާއެކު އެތަންތަނުގެ މާހައުލަށް ގެއްލުން ނުދީ ތަރައްޤީ ކުރެވޭނެ ގޮތްތަކަކީ ކޮބާތޯ ބަލައި ކޮމިއުނިޓީއާ އެތަން ތަނާ ގުޅުވާލަދީ ހޭލުންތެރިކުރުވަން އެ ދަރިވަރުންގެ ޕްރޮޖެކްޓައި ހިމަނާފައިވާ ކަމަށެވެ.
އޭނާ ވިދާޅުވީ ބައެއް ތަންތަނަކީ އެ ދަރިވަރުންނަށް ކުރިން ފެނިފައި ވެސް ނެތް ތަންތަން ކަމަށާއި، ކުރީ ޒަމާންތަކުގައި އެތަންތަން ބޭނުންކުރިއިރު ސާފުކޮށް ބެލެހެއްޓި ކަމަށެވެ.
" އިސްރަށްވެހިންނާ ވާހަކަ ދެއްކީމާ އެ ދަރިވަރުންނަށް އެނގުނީ އެންވެރިކަމަށް އެތަންތަން ބޭނުންކުރިކަން. އެން ދިރުވައި އާލާކުރުމާއި ފެންވަރަށް ވެސް އެ ފެންގަނޑު އެހާ ސާފު ކަމަށް އެމީހުން ބުނޭ. އެތަންތަން ފެނުނީމާ ތާރީޚީ ގޮތުން ވެސް ލޯ ހުޅުވި ހޯދާ ބެލުމުގެ ޝަޢުޤުވެރިކަން ބޮޑުވި" ސިތާރާ ވިދާޅުވިއެވެ.
" ތަނުގެ ތާރީޚް އެނގުމަކީ ވެސް ތަނާއި ކުދިންނާ ގުޅުވަދޭނެ ކަމެއް"
ސިތާރާ ވިދާޅުވީ ޕްރޮޖެކްޓް ފުރިހަމަކޮށް ނިންމާލާލުމުގެ ކުރިން މުޖްތަމައުގެ ޚިޔާލު ވެސް ދަރިވަރުން ހޯދި ކަމަށެވެ.
" އެ މުޅި ސަރަހައްދު ބަލައި ދިރާސާކުރަން ވެސް ގިނަ ދުވަސްތަކެއް ނެގި. މިފަދަ ތަންތަން އެހެން ޤައުމުތަކުގައި ތަރައްޤީ ކޮށްފައި ހުންނަނީ ކިހިނަކުންތޯ. ރާއްޖޭގެ މާހައުލާ ގުޅޭ ގޮތަށް އެތަންތަން ތަރައްޤީ ކުރާނީ ކިހިނަކުންތޯ. އެއިން ފައިދާއެއް ވާނެތޯ. އެ ހުރިހާ ކަމަކަށް ފޯކަސްކޮށްގެން ދަރިވަރުން ހޯދި ހޯދުންތަކުގެ މައްޗަށް ކޮންސެޕްޓް ހަދައި މޮޑެލް ހެދީ" ސިތާރާ ވިދާޅުވިއެވެ.
އޮޅުއަލައަކީ އައްޑޫއަށް ޚާއްޞަ އެއްޗަކަށް ވާއިރު، ޗަސްބިންތަކުގައި އޮޅުއަލަ އާލާކޮށް އެއިން ތަފާތު ވައްތަރުގެ ކާނާ ގެ ބާވަތްތައް ތައްޔާރު ކުރުމާއި އަލައިގެ އެކި އުފެއްދުންތައް ޒިޔާރަތް ކުރާ ފަރާތްތަކަށް ފެންނާނެ ގޮތަށް ސްޓޯލްތަކެއް ހެދުމާއި ކުޅީގެ ވަށައިގެންވާ ސަރަހައްދުގައި ކަށިކެޔޮ އާލާކުރަން ވެސް ދަރިވަރުންގެ ޕްރޮޖެކްޓްގައި ހިމަނާފައިވެއެވެ.
" ދެމެހެއްޓެނިވި ދަނޑުވެރިކަމެއްގެ ގޮތުގައި، އަލަ ހެއްދުމުގެ މަސައްކަތް ފެށިން ކުރިއަށް ދާ ގޮތާއި އެ އިން އުފައްދާ ކާނާގެ ބާވަތްތައް ފެންނާނެ ގޮތަށް ދަރިވަރުން ކޮންސެޕްޓް ހެދީ. ފަސޭހައިން މަސައްކަތަކާ ނުލައި ހެއްދޭނެ އެއްޗަކަށް ވާތީ، ކުޅީގެ ކައިރިފަށުގައި ކަށިކެޔޮ އާލާ ކުރަން ވެސް ދަރިވަރުން ހިމަނާފައިވޭ" ސިތާރާ ވިދާޅުވިއެވެ.
ކަށިކޭލުގެ ފަތުން ވަށިގަނޑާއި ސާންތި ފަދަ ތަކެތި ވިޔުމާއި ރުކުރާ ފަސޭހައިން ލިބޭނެ އިންތިޒާމެއްގެ ގޮތުގައި ކުދި ރުއްތައް ވެސް އިންދަން ވެސް ދަރިވަރުން ވަނީ މި ޕްރޮޖެކްޓްގައި ހިމަނާފައެވެ.
މުޖްތައުގެ ހޭލުންތެރިކަމަށް ކުޅިއާ ގުޅުން ހުރި ގިނަ މައުލޫމާތު ހިމެނޭގޮތަށް ލައިބްރަރީއަކާއި ކިޔަވާނެ ހިތްފަސޭހަ އޭރިޔާއަކާއި މިއުޒިއަމްއަކާ ކަލްޗަރަލް ސެންޓަރެއްވެސް ހަދަން ވަނީ ހިމަނާފައެވެ.
" ކަލްޗަރަލް ސެންޓަރުގައި، ޓޫރިސްޓުންނަށް ސަޤާފީހެދުން ލައިގެން ފޮޓޯ ނެގޭނެ އިންތިޒާމް ފަދަ ޓޫރިސްޓުންގެ ހިތް ޖައްސުވާނެ ކުރީގެ ދިރިއުޅުން ދައްކުވައިދޭ ކުރެހުންތައް ވެސް ބަހައްޓަން ދަރިވަރުން ހިމަނާފައި"
ކުޅި ބަލައިލަން ބޭނުންވާ ފަރާތްތަކަށް ކެނޯގެ ބަދަލުގައި ދަރިވަރުން ބޭނުން ވީ ޕެޑަލިންގ ބޯޓް ބޭނުން ކުރާށެވެ. އެއީ އެ ސަރަހައްދުގެ ތިމާވެއްޓަށް ބަލާއިރު ކެނޯ އަށް ވުރެ ކުޅިތަކުގައި ބޭނުން ކުރަން އެންމެ އެކަށީގެންވާ އެއްޗަކަށް އެ ވާތީއެވެ.
މުޅި ސަރަހައްދުގައިވާ މަގުތަކުގެ ބައްތިއާއި އަދި އެނޫނަސް ބޭނުންވާ ކަރަންޓް ސްލާގެ އެހީގައި ހޯދަން ދަރިވަރުން ވަނީ ބާރުއަޅާފައެވެ. މޮޑެލްގައި ވެސް ދަރިވަރުން ވަނީ ސޯލާއަށް ވަރަށް ބޮޑަށް އިސްކަންދީފައެވެ.
ކުޅިހިމެނޭ ސަރަހައްދުގެ ވަށައިގެން ބުރު ވިނަ އާލާކުރުމަކީ މުހިންމު ކަމަށް ވެސް މި ޕްރޮޖެކްޓްގައި ދަރިވަރުން އިރުޝާދު ދީފައިވެއެވެ. އެއީ ދޫންޏާއި އެ ނޫން ދިރުންތަކަށް ވެސް އެ ފަދަ ވިނަތަކުގެ ފައިދާ ކުރަމުންދާތީއެވެ.
" މުޅި އެ ސަރަހައްދު ސާފުކުރާއިރު މިހާރު ކުރާކަމަކީ އެފަދަ ވިނަތައް ނޮޅާލަނީ. އޭގެ ސަބަބުން ގިނަ ދިރުންތަކެއް ނެތިގެން ދަނީ. ކައުންސިލާއެކު ބޭއްވި ބައްދަލުވުމުގައި ވެސް ދަރިވަރުން ވަނީ އެ ކަން ފާހަގަ ކޮށްފައި"
ސިތާރާ ވިދާޅުވީ، ކުޅިއާއި ޗަސްބިން ހިމެނޭ ސަރަހައްދަކީ ވަރަށް ބޮޑު ސަރަހައްދެއް ކަމުން އެއް ފަހަރާ އެތަންތަން ތަރައްޤީ ކުރުމަކީ އެއީ ފަސޭހަ ކަމެއް ނޫން ކަމަށް ކައުންސލުން ވެސް ފާހަގަކޮށްފައިވާ ކަމަށެވެ.
ސިތާރާ ވިދާޅުވީ، ކޮންސެޕްޓް އެކުލަވާލުމަށްވުރެ މޮޑެލް ހެދުނީމާ އެގޮތަށް އެތަން އޮންނަން ދަރިވަރުން ބޭނުނުންވާ ކަމަށާއި ހަޤީގަތަކަށް ވެދާނެ ކަމުގެ އުއްމީދު ވެސް ދަރިވަރުންނަށް ކުރެވޭ ކަމަށެވެ.
ޕްރިންސިޕަލެއްގެ ހައިސިއްޔަތުން ސިތާރާއަށް ފާހަގަ ކުރެއްވުނީ، މި ޕްރޮޖެކްޓްގެ ތެރެއިން ދަރިވަރުންނަށް ލިބުނު ކުރިއެރުމާއި ވިސްނުމަށް އައި ބަދަލެވެ.
" ވިޜަން، ފެންނަ އެއްޗެއް ގޮތަށް ނެރެވިފައި، ކުދިންގެ އެކްސައިޓްމަންޓާއި އެ ކުދިން އެކަމަށް ބޭނުންވެފައި ތިބި ވަރާއި ކުޅިއަށް ދަރިވަރުން އެޓޭޗްވެފައި ތިބިވަރު ފެނުނީމާ ވަރަށް ބޮޑު އެއްޗެއް، އެޗީވްވި ކަމުގެ އިހުސާސް ކުރެވުނީ. ކުލާހެއްގައި އަދި ފިލާވަޅެއް ނަގައިދިން ނަމަވެސް މި އަސަރެއް ދަރިވަރުނަށް ނުކުރާނެ. މަޤްޞަދު ވަރަށް ބޮޑަށް ހާޞިލްވި ކަމުގެ އިހުސާސްވީ" ސިތާރާ ފާޅުކުރީ ދަރިވަރުންގެ ވިސްނުމަށް ގެނައި ބަދަލުގެ ވާހަކައެވެ.
އެހެން ސްކޫލްތަކާ ޚިލާފަށް އެ ސްކޫލްގެ ލީޑަރުންގެ މަގާމްތަކަކީ ވަށައިޖެހޭ ގޮތަށް ބަދަލުވަމުންދާ މަގާމް ތަކެކެވެ. ގުރޭޑް 7ން ފެށިގެން ގުރޭޑް ދިހައެއް ނިންމާއިރު ކޮންމެ ކުއްޖަކު ވެސް އެ ސްކޫލްގެ އިސްމަގާމެއް ފުރުމުގެ ޒިންމާ އަދާކުރާނެއެވެ. ސްކޫލްގެ ލީޑަރުންގެ ގޮތުގައި އަށް މަގާމް ހަމަޖައްސާފައި އޮންނައިރު، ކޮންމެ މަގާމެއްގައި ހަތަރެއް ނޫނީ ފަސް ދަރިވަރުން މަސައްކަތް ކުރާނެއެވެ. ދަރިވަރުންގެ ޒިންމާތަކާއެކު ކަނޑައަޅާފައިވާ މަގާމްތަކަކީ ވެސް އާންމު ދިރިއުޅުމުގައި އެންމެ ފަސޭހައިން ކުރަންޖެހޭ މަސައްކަތުގެ ބޭނުން ހިފޭގޮތަށް ކަނޑައަޅާފައިވާ މަގާމްތަކެވެ. އެ މަޤާމްތަކަކީ، ސޯޝަލް ވެލްފެއަރ، ލިއެއިޒަން އޮފިސަރު، ކޮންޒަވޭޝަން އޮފިސަރު، ޕިއަރ މެންޓޮރ، މޮޑެލް ސްކޮލަރ، އެޑްވޮކޭޓަރސް، އެންޓަރޕްރެނިއަރސްގެ އިތުރުން ޑިޕޮލަމޭޓްސްއެވެ.
ކޮންޒަވޭޝަން އޮފިސަރުންނަކީ މި މަސައްކަތް ރާވައި ހިންގުމުގައި އެންމެ އިސްކޮށް މަސައްކަތް ކުރާ ކުދީންނެވެ. އަދި އެޑްވޮކޭޓަރސްއަކީ އެހެންމީހުންނާ ހަމަޔަށް މިކަން ފޯރުކޮށް ދިނުމަށް އަޑު އުފުލާ ކުދީންނެވެ. މީގެ އިތުރުން ލިއެއިޒަން އޮފިސަރުގެ ޒިންމާއަކީ އެ މަސައްކަތުގެ ތެރޭގައި ހިމެނޭ ޚަބަރު ތައްޔާރުކޮށް ސްކޫލްގައި އާންމު ކުރުމެވެ. މޮޑެލް ސްކްލާސް އިން ދީނީ ގޮތުން އެފަދަ ތަންތަން ހިމާޔަތް ކުރުމަކީ ކިހާ މުހިންމު ކަމެއްތޯ ބަލައި، ހޭލުންތެރިކަން އިތުރު ކުރުމުގެ މަސައްކަތް ކުރާނެއެވެ. ޑިޕްލޮމޭޓުންގެ ޒިންމާއަކީ އެކި ފަރާތްތަކާއެކު ކުރަންޖެހޭ ނެގޯޝިއޭޝަންތައް ކުރިއަށް ގެންދިއުމެވެ.
ސިތާރާ ވިދާޅުވީ ޕްރޮޖެކްޓެއް އެކުލަވާލާއިރު ވެސް ފުރަތަމަ ޚިޔާލާއި މަޝްވަރާ ކުރާނީ ލީޑަރުންގެ މެދުގައެވެ. އެއަށްފަހު ކަމާ ގުޅުންހުރި ހުރިހާ ފަރާތްތަކާއެކު މަޝްވަރާކޮށް ޚިޔާލު ހޯދާ ދިރާސާތައް ކުރާނެއެވެ.
" ކޮންމެ ޕޯސްޓެއްގައި މަސައްކަތް ކުރާ ދަރިވަރުން އެ ދަރިވަރުންގެ ޒިންމާއާ ގުޅޭ ގޮތުން ދިރާސާތައް ކުރާނެ. އެ ހުރިހާ ދިރާސާތަކާއި އެކުލަވާލާ ކަރުދާސްތަކުގެ މައްޗަށް ފުޅާދާއިރާއެއްގައި ވާހަކަ ދެކެވި ފައިނަލް ޕްރޮޖެކްޓެއް އުފަންވެގެން އަންނާނީ. އަދި އެ ޕްރޮޖެކްޓަށް ބޭސްކޮށް މޮޑެލްތަކެއް ވެސް ހަދާނީ" ސިތާރާ ވިދާޅުވިއެވެ.
ހިރާ ސްކޫލުގެ ދަރިވަރުން ވަނީ މީގެ ކުރީން ހިތަދޫ ނޭޗަރޕާކާ ގުޅިގެން ވެސް މިފަދަ ވަރަށް މުހިއްމު ދެ ޕްރޮޖެކްޓެއް އެކުލަވައިލާފައެވެ. އެއީ ނޭޗާޕާކުގެ ސަރަޙައްދުގައި ހުރި ގަސްގަހާގެހީގެ މުހިއްމު ދިރާސާއެއް ހެދުމާއި ކޯއްޓޭގެ ތާރީޚީ ތަންތަނާއި އާސާރުތަކުގެ މައްޗަށް ބަލައި ފުޅާ ދިރާސާއެއް ހެދުމެވެ. މި ދެ ދިރާސާ ނިންމައި މިއިން ކޮންމެ ކަމަކަށް ވަކި ފޮތެއް އެކުލަވައިލުމަށް ފަހު ނޭޗާޕާކަށް ހަދިޔާ ކޮށްފައި ވެއެވެ. މިހާރު ވެސް އެ ތަނަށް ޒިޔާރަތްކުރާ މެހުމާނުންނަށް ފަސޭހައި ބަލައިލެވޭ ގޮތަށް މި ދެފޮތް ވެސް ނޭޗާ ޕާކުގައި ބާއްވާފައިވެއެވެ.
މީގެ އިތުރުން އޭނާ ވިދާޅުވީ ކުރިއަށް އޮތީ ރޯދަމަސް ކަމަށް ވުމާއެކު، އެންމެ އެކަށީގެންވާ ގޮތަށް މަސައްކަތްތައް ކުރިއަށް ގެންދަން އުނަދަގޫވާނެ ކަމަށާއި، ޓާމު ނިމުމުގެ ކުރިން ޕްރޮޖެކްޓް ނިންމަން ދަރިވަރުން މަސައްކަތް ކުރަމުން އަންނަ ކަމަށެވެ.
ފައުންޑޭޝަން ސްޓޭޖުން ފެށިގެން ގުރޭޑް 10އާ ހަމައަށް ކިޔައިދޭ ހިރާ ސްކޫލުން ކުރިއަށް ގެންދާ ތިމާވެއްޓާ ގުޅުން ހުރި ޕްރޮޖެކްޓަކުގެ ސަބަބުން ޒައިދު ސަސްޓެއިނަބިލިޓީ ޕްރައިޒް ވަނީ އެ ސްކޫލަށް ލިބިފައެވެ.
advertisment
ހިޔާލު