ކިޔެވުމުގެ ހާސްކަމުން ހިތުގެ ހަމަޖެހުމަށް: އަމިއްލަ އިޚްތިޔާރުގެ ބާރު

ސަމާ އިބްރާހިމް ދީދީ

ކިޔެވުމުގެ ދައުރަކީ ކޮންމެ ކުއްޖެއްގެވެސް ހަޔާތުގައި އަންނަ އެންމެ މުހިންމު، އަދި އެހާމެ ގޮންޖެހުންތަކުން ފުރިގެންވާ ދުވަސްވަރެކެވެ. އިމްތިހާނުތަކުގެ މާކްސްތަކާއި، މުސްތަޤުބަލާ މެދު ކުރެވޭ ފޮނި އުންމީދުތަކުގެ ސަބަބުން ގިނަ ފަހަރަށް ދަރިވަރުންނަށް ނަފްސާނީ ބޮޑެތި ފިއްތުންތަކާ ކުރިމަތިލާންޖެހެއެވެ. މިފަދަ ހާލަތްތަކުގައި ނަފްސާނީ ދުޅަހެޔޮކަން ދެމެހެއްޓުމަށްޓަކައި އެންމެ މުހިންމު ކަމަކީ، ތިމާގެ އަމިއްލަ ކޮންޓްރޯލްގައި ނުވަތަ އިޚްތިޔާރުގައި ހުރި ކަންކަމަށް ވިސްނައިގެން ކުރިއަށް ދިއުމެވެ.

ގިނަ ފަހަރަށް އަޅުގަނޑުމެން ކަންބޮޑުވަނީ އަޅުގަނޑުމެންގެ ބާރުގެ ދަށުގައި ނުވާ ކަންކަމާ މެދުގައެވެ. މިސާލަކަށް، އިމްތިހާނު ކަރުދާސް އަންނާނެ ގޮތް، އެހެން މީހުން ތިމާއާ މެދު ދެކޭ ގޮތް، ނުވަތަ އިމްތިހާނުގެ ނަތީޖާ އަންނާނެ ގޮތެވެ. މިފަދަ ކަންކަމާ މެދު މާބޮޑަށް ވިސްނާނަމަ، ނަފްސާނީ ބަލިމަޑުކަމާއި ހާސްކަމުގެ ތެރެއަށް ތިމާ ވެއްޓިގެންދެއެވެ. އެހެންކަމުން، ދުޅަހެޔޮ ނަފްސެއް ބިނާކުރުމަށްޓަކައި ތިމާގެ އަމިއްލަ ކޮންޓްރޯލްގައި ހުރި ކަންކަމަށް ސަމާލުކަން ދިނުން މުހިންމެވެ.

1. ކޮންޓްރޯލް ކުރެވޭނެ ކަންކަމާއި ނުކުރެވޭނެ ކަންކަން ދެނެގަތުން
   ނަފްސާނީ ހަމަޖެހުމުގެ އެންމެ ފުރަތަމަ ފިޔަވަޅަކީ ތިމާގެ ބާރު ހިނގާ ކަންކަމާއި ބާރު ނުހިނގާ ކަންކަން ވަކިކުރަން ދަސްކުރުމެވެ. އެހެން މީހުންގެ ފާޑުކިޔުމާއި، އިމްތިހާނުގެ ގްރޭޑަކީ ތިމާގެ ސީދާ ކޮންޓްރޯލްގައިވާ ކަންކަމެއް ނޫނެވެ. ނަމަވެސް، ތިމާ ކުރާ މަސައްކަތާއި، ބޭނުންކުރާ ވަގުތާއި، އަދި ކަންކަމާ މެދު ދެކޭ ގޮތަކީ ހުސް ތިމާގެ އަމިއްލަ އިޚްތިޔާރުގައިވާ ކަންކަމެވެ. މިކަން ގަބޫލުކުރުމުން ބޭކާރު ހާސްކަމުން ނަފްސު ސަލާމަތްވެއެވެ.
2. ވަގުތުގެ ބޭނުން ހެޔޮގޮތުގައި ހިފުން
   ކިޔެވުމުގެ މަރުހަލާގައި ގިނަ ދަރިވަރުން ސްޓްރެސްވަނީ ވަގުތު ފާއިތުވުމުންނެވެ. ތިމާގެ ކޮންޓްރޯލްގައި އޮތް އެންމެ އަގުބޮޑު ވަސީލަތަކީ ވަގުތެވެ. ރޭވުންތެރިކަމާއެކު ތާވަލެއް ހަދައިގެން މަސައްކަތް ކުރުމުން، ކަންކަން ފުނިޖެހުމުން ކުރިމަތިވާ ނަފްސާނީ ނުތަނަވަސްކަން ކުޑަކުރެވޭނެއެވެ.
3. އަމިއްލަ ނަފްސަށް އޮންނަ އިތުބާރު ބިނާކުރުން
   ނަތީޖާއަށްވުރެ ބޮޑަށް، ކުރިއެރުމަށް (Progress) ސަމާލުކަން ދިނުމަކީ ނަފްސާނީ ދުޅަހެޔޮކަމަށް މުހިންމު ކަމެކެވެ. އިއްޔެ ނޭނގޭ ކަމެއް މިއަދު ދަސްވުމަކީ ކާމިޔާބީއެއް ކަމުގައި ދެކެންވާނެއެވެ. އަމިއްލަ ނަފްސާ މެދު އޮންނަ ދެކުން އިލާހީ ތަޤުދީރާއި ގުޅުވާލުމުން، ކޮންމެ ހާލަތެއްގައިވެސް ކެތްތެރިކަމާއެކު ކުރިއަށް ދިއުމުގެ ހިތްވަރު ލިބެއެވެ—

އަމަލީގޮތުން ކުރެވިދާނެ 05 ކަމެއް (ޓިޕްސް):

1. ކޮންޓްރޯލް ސާކަލްއެއް ކުރެހުން: ކަރުދާހެއްގައި ބުރެއް ކުރަހާފައި، އޭގެ އެތެރޭގައި ތިމާއަށް ބަދަލުކުރެވޭނެ ކަންކަން (މިސާލަކަށް: ނިދާ ވަގުތު، ކިޔަވާ މިންވަރު) ލިޔާށެވެ. ބުރުން ބޭރުގައި ތިމާއަށް ބަދަލުނުކުރެވޭނެ ކަންކަން (މިސާލަކަށް: އިމްތިހާނުގެ އުނދަގޫމިން) ލިޔާށެވެ. ހާސްވާ ވަގުތު ބުރުގެ އެތެރޭގައި ހުރި ކަންކަމަށް އެކަނި ސަމާލުކަން ދޭށެވެ.
2. ދީނީ ޒިކުރުތަކާއި ނަމާދަށް ސަމާލުކަން ދިނުން: ކޮންމެ ދުވަހަކުވެސް ކިޔެވުމުގެ ކުރިންނާއި ފަހުން ދުޢާކޮށް، ނަމާދުތަކަށް ފަރުވާތެރިވާށެވެ. މިއީ ހިތުގެ ހަމަޖެހުމާއި ނަފްސާނީ ދުޅަހެޔޮކަމަށް އޮތް އެންމެ ވަރުގަދަ އައްޑަނައެވެ.
3. 'ޓޫ-ޑޫ ލިސްޓް' ކުޑަކުރުން: މާ ގިނަ ކަންތައްތަކެއް އެއްދުވަހާ ކުރަން ނުރާވާށެވެ. ދުވާލަކު އެންމެ މުހިންމު 3 ކަމެއް ނިންމުމަށް އަމާޒު ހިފާށެވެ. މީގެ ސަބަބުން 'އޯވަރވްލްމް' ވުމުން ސަލާމަތްވާނެއެވެ.
4. ޑިޖިޓަލް ޑިޓޮކްސް (Digital Detox): ސޯޝަލް މީޑިއާގައި އެހެން މީހުންގެ ދިރިއުޅުމާއި ތިމާގެ ދިރިއުޅުން އަޅާކިޔުން ހުއްޓާލާށެވެ. ކިޔަވާ ގަޑީގައި ފޯނު ދުރުގައި ބެހެއްޓުމަކީ ތިމާގެ ސަމާލުކަން (Focus) ތިމާގެ ކޮންޓްރޯލްގެ ދަށަށް ގެނައުމަށް ކުރެވިދާނެ ކަމެކެވެ.
5. ނޭވާލުމުގެ ކަސްރަތު ހެދުން: ހާސްވާ ވަގުތުތަކުގައި ލަހުން ފުންކޮށް ނޭވާލުމުގެ ކަސްރަތު (Deep Breathing) ކުރާށެވެ. މިއީ ސިކުނޑި ހަމަޖައްސައިދީ، ކަންކަމާ މެދު ސާފުކޮށް ވިސްނުމަށް އެހީތެރިވެދޭނެ އަމަލީ ކަމެކެވެ.

ނިންމާލަމުން ދަންނަވާނީ، ކިޔެވުމުގެ ދަތުރުގައި ކާމިޔާބީއަކީ ހަމައެކަނި ރަނގަޅު ނަތީޖާއެއް ހޯދުމެއް ނޫނެވެ. އެއީ ހަށިގަނޑާއި ނަފްސުގެ ދުޅަހެޔޮކަން ދަމަހައްޓަމުން، އަމިއްލަ ނަފްސަށް އޮންނަ އިތުބާރު ބޮޑުކޮށް، ހަރުދަނާ އިންސާނަކަށް ވުމެވެ. ތިމާގެ އިޚްތިޔާރުގައި ނެތް ކަންކަމާ މެދު ފިކުރު ކުރުން ހުއްޓާލައި، އަމިއްލަ ކޮންޓްރޯލްގައި ހުރި ކަންކަން އިސްލާހުކުރުމަށް މަސައްކަތް ކުރުމަކީ އުފާވެރި އަދި ކާމިޔާބު ދަރިވަރަކަށް ވުމުގެ ސިއްރެވެ.