ވޭސްޓް ޓު ވޮންޑަރ: އުކާލާ ތަކެތިން އަމީނިއްޔާ ދަރިވަރުންގެ ތަފާތު އުފެއްދުންތަކެއް

"ވޭސްޓް ޓު ވޮންޑަރ"ގެ ނަމުގައި، އުކާލާ ތަކެތިން އަމީނިއްޔާ ދަރިވަރުންގެ ތަފާތު އުފެއްދުންތަކެއް ދައްކުވައިދޭ މައުރަޒެއް ބާއްވައިފިއެވެ. މިއީ އަމީނިއްޔާގެ ސްކޫލުގެ ޕްރިންސިޕަލް ރިންޒީ ވަހީދިހެ ޚިޔާލުފުޅާ އެއްގޮތަށް އެ ސްކޫލުގެ ރީފް ކުލަބުން އިންތިޒާމްކޮށްގެން ދުނިޔޭގެ ތިމާވެށި ދުވަހާ ގުޅުވައިގެން ކުރިއަށް ގެންދިޔަ މައުރަޒެކެވެ.

މި މައުރަޒުގެ މައިގަނޑު މަގުސަދަކީ:

* ރިސައިކަލް ކުރުމާއި ދެމެހެއްޓެނިވި ގޮތެއްގައި ތަކެތި ބޭނުންކުރުން ކުރިއެރުވުން.

* އުކާލާ ތަކެތި ބޭނުންކޮށްގެން އަމިއްލަ އުފެއްދުންތެރިކަން ދައްކާލުމަށް ހިތްވަރުދިނުން.

* ކުނި މެނޭޖުކުރުމުގެ ދެމެހެއްޓެނިވި ގޮތްތަކަށް ހޭލުންތެރިކަން އިތުރުކުރުން.

* ދަރިވަރުންގެ މެދުގައި ތިމާވެށީގެ ޒިންމާދާރުކަމާއި ގްރޫޕް މަސައްކަތް (ޓީމްވޯކް) އާލާކުރުން.

މި މައުރަޒުގައި ދައްކާލާފައިވާ ކޮންމެ ފަންނީ އުފެއްދުމަކީ އަޅުގަނޑުމެންގެ ގެބިސީ ފަދަ ތަންތަނުން އުކާލާފައިވާ ޕްލާސްޓިކާއި އިލެކްޓްރޯނިކްސް އާލާތްތަކާއި އެހެނިހެން ކުނި ރަނގަޅަށް ސާފުކުރުމަށްފަހު ތައްޔާރުކޮށްފައިވާ ތަކެތި ކަމަށް އަމީނިއްޔާ ސްކޫލުން ބުނެއެވެ.

މި މައުރަޒުގައި ތަކެތި ދައްކާލާފައިވަނީ މައިގަނޑު 3 ދާއިރާއަކުންނެވެ. އެއީ:

1. އާޓް އެންޑް ކްރާފްޓް: ޒީނަތްތެރިކުރާ ތަކެއްޗާއި ބުދު (ސްކަލްޕްޗާ).
2. ފަންކްޝަނަލް އައިޓަމްސް: ބޭނުންތެރި ހިފާގެންގުޅޭ ތަކެތި (މިސާލަކަށް: ބޮކި/ލޭމްޕް އަދި މެޝިން).
3. ފެޝަން: ހެދުމާއި ގަހަނާގެ ބާވަތްތައް.

އަމީނިއްޔާ ސްކޫލުން ބުނީ، މި މައުރަޒުން ހަމައެކަނި އުފެއްދުންތެރިކަން ދައްކާލުމެއް ނޫން ކަމަށާއި މި މައުރަޒުން ދެމެހެއްޓެނިވި ދިރިއުޅުމަކަށް ގޮވާލާ ވަރުގަދަ މެސެޖެއްދޭ ކަމަށެވެ.

"އަހަރެމެންގެ ދުވަހީ ދިރިއުޅުމުގައި ބޭނުންކޮށްފައި އުކާލާތަކެތި އުކާލުމުގެ ކުރިން ދެވަނަ ވިސްނުމަކަށް ދާންޖެހޭކަން މި މައުރަޒުގައި ދަރިވަރުންގެ ފަންނުވެރިކަމުން ދައްކުވައިދިން" ރީފް ކްލަބުގެ ފަރާތުން ފާހަގަކުރިއެވެ.

އަމީނިއްޔާ ސްކޫލަކީ "ފެހިމަދަރުސާ" ކޮންސެޕްޓް ބަލައިގަނެ، ތިމާވެއްޓާ ރައްޓެހި މާހައުލެއް ގާއިމުކުރުމަށް މަސައްކަތްކުރާ ސްކޫލެކެވެ. އެ ސްކޫލްގެ އަމާޒަކީ މި އަހަރުގެ "ސުޕަރ ފެހި އެވޯޑް" ހާސިލުކުރުމެވެ. މި މައުރަޒަކީވެސް އެ ލަނޑުދަނޑިއަށް ވާސިލުވުމަށް އެޅުނު މުހިންމު ފިޔަވަޅެއް ކަމަށް އެ ސްކޫލުން ބުނެއެވެ.

މި މައުރަޒު ކާމިޔާބުކަމާއެކު ކުރިއަށްގެންދިއުމުގައި ސްކޫލްގެ ޕްރިންސިޕަލް މެޑަމް ރިންޒީ ދެއްވި އިރުޝާދާއި، ވިސްނުންތެރި ލީޑަރޝިޕް އަދި ބެހެއްޓެވި ސާބިތުކަމަށްޓަކައި ރީފް ކްލަބުން ވަނީ ޚާއްޞަ ޝުކުރެއް އަދާކޮށްފައެވެ.

މި މައުރަޒުން ލިބިގެންދިޔަ މެސެޖާއެކު، ދުވަހީ ދިރިއުޅުމުގައި ކުނި މަދުކުރުމަށާއި، އަލުން ބޭނުން ކުރުމަށާއި އަދި ތިމާވެއްޓަށް އިހުތިރާމްކުރުމަށް ހުރިހާ ފަރާތްތަކަކުން އަޒުމް ކަނޑައެޅުމަށް ސްކޫލުން ވަނީ އިލްތިމާސްކޮށްފައެވެ.