މަރަދޫ ސްކޫލާއި ގެމަނަފުށީ ސްކޫލަށް ޕްރިންސިޕަލުން ހޯދަން އިއުލާންކޮށްފި

އައްޑޫ ސިޓީ މަރަދޫ ސްކޫލާއި ގއ. ގެމަނަފުށީ ސްކޫލަށް ޕްރިންސިޕަލުން ހޯދަން އެޑިޔުކޭޝަން މިނިސްޓްރީން މިއަދު އިއުލާންކޮށްފިއެވެ.

މި ދެ ސްކޫލަށް ޕްރިންސިޕަލުން ހޯދަން އެ މިނިސްޓްރީން އިއުލާން ކުރީ ވަކިވަކިންނެވެ.

މި ދެ ސްކޫލުގެ ޕްރިންސިޕަލަކަށް ޝައުޤުވެރިވާ ފަރާތްތަކުން ލިޔުންތައް ހުށަހަޅާން ދީފައި ވަނީ 27 ޖަނަވަރީވާ އަންގާރަ ދުވަހުގެ 13:30 ގެ ކުރިންނެވެ. ހުށައަޅަން ޖެހެނީ، އޮންލައިން ޕޯޓަލް މެދުވެރިކޮށެވެ.

ޕްރިންސިޕަލުންގެ ޝަރުޠެއްކަމަށް އެ އިއުލާނުގައި ބުނެފައިވަނީ، ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޚާއްސަކުރެވިފައިވާ ދާއިރާއަކުން ޤައުމީ ސަނަދުގެ އޮނިގަނޑު ލެވެލް 10 ގެ ސަނަދެއް ޙާޞިލްކޮށްފައިވުމާއި، ސްކޫލެއްގެ ޓީޗަރެއްގެ ގޮތުގައި މަދުވެގެން 2 އަހަރު ޚިދުމަތް ކޮށްފައިވުމާއި، ތަޢުލީމުދޭ ނުވަތަ މަތީ ތަޢުލީމުދޭ އިދާރާއެއްގެ ހިންގުމުގެ ދާއިރާގައި 4 އަހަރު ޚިދުމަތްކޮށްފައިވުމެވެ.

އަދި ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޙާއްސަކުރެވިފައިވާ ދާއިރާއަކުން ޤައުމީ ސަނަދުގެ ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމާއި، ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޙާއްސަކުރެވިފައިވާ ދާއިރާއަކުން ޤައުމީ ސަނަދުގެ އޮނިގަނޑު ލެވެލް 9 ގެ ސަނަދެއް ޙާޞިލުކޮށްފައިވުމާއި، ސްކޫލެއްގައި ޓީޗަރެއްގެ ގޮތުގައި 2 އަހަރު ޚިދުމަތްކޮށްފައިވުމާއި، ތަޢުލީމުދޭ ނުވަތަ މަތީ ތަޢުލީމުދޭ އިދާރާއެއްގެ ހިންގުމުގެ ދާއިރާގައި 8 އަހަރު ޚިދުމަތްކޮށްފައިވުމެވެ.

އެއްވަނަ ރޭންކު ނަމަ އަސާސީ މުސާރައަކީ މަހަކު 16,647 ރުފިޔާއެވެ. އެލަވަންސަކީ 9,534 ރުފިޔާއެވެ. ހާޒިރީ އެލަވަންސަކީ 258 ރުފިޔާއެވެ. ދެވަނަ ރޭންކު ނަމަ މުސާރައަކީ 17,985 ރުފިޔާއެވެ. އެލަވަންސަކީ 10،300 ރުފިޔާއެވެ. ހާޒިރީ އަލަވަންސަކީ 279 ރުފިޔާއެވެ.