އދ. އަތޮޅުގައި އޭލެވެލްއަށް ކިޔަވައިދޭ ދެވަނަ ރަށެއްގެ ގޮތުގައި މާމިގިއްޔަށް ފަހި ފުރުޞަތެއް

އދ. އަތޮޅުގައި އޭލެވެލްއަށް ކިޔަވައިދެނީ ވެރިރަށް މަހިބަދޫގައި ހުންނަ އަތޮޅު ތަޢުލީމީ މަރުކަޒުގައެވެ. އދ. އަތޮޅުގައި ދިހަ ރަށް އޮންނައިރު އާބާދީގެ ގޮތުންނާއި ވަޞީލަތުގެ ގޮތުން އެންމެ މުހިންމު ރަށެއްގެ ގޮތުގައި ދެން އޮތީ މާމިނގިއްޔެވެ. އެ ރަށުގައި ހުންނަ އދ. އަތޮޅު މަދަރުސާގައި 550 އަށްވުރެ ގިނަ ދަރިވަރުން ކިޔަވަމުން ގެންދެއެވެ. މިހާރު އޯލެވެލްއާ ހަމައަށް ކިޔަވައިދޭ އެ ސްކޫލުގައި އޭލެވެލް ފެށުމުގެ ހުއްދަ އެޑިޔުކޭޝަން މިނިސްޓްރީން ވަނީ ދީފައެވެ. މިއީ ރަށުގައި ތިބެގެން އޭލެވެލްއަށް ކިޔަވަން އެ ރަށުގެ ކުދިންނަށް ލިބުނު ފަހި ފުރުޞަތެކެވެ. އާއިލާއާ ކައިރީގައި ތިބެގެން ޔުނިވަރސިޓީ ތައުލީމަށް ފައްކާވާން ލިބޭ ރަނުގެ ފުރުޞަތެކެވެ.

އދ. އަތޮޅު މަދަރުސާގެ ނަތީޖާއަށް ބަލާއިރު މިއީ އެރަށުގައި އޭލެވެލް ފަށަންވީ އެންމެ މުހިންމު ވަގުތެވެ. މިދިޔަ އަހަރު 48 ދަރިވަރުން އޯލެވެލް ނިންމިއެވެ. ކުރީ އަހަރުތަކާ އަޅާބަލާއިރު އެކަށީގެންވާ ބޮޑު ކުރިއެރުމެއް އެ މަދަރުސާއިން ހޯދައިފިއެވެ. އެއީ މިހާތަނަށް އެ ސްކޫލުން ހޯދި އެންމެ ރަނގަޅު ނަތީޖާއެވެ. 5 މާއްދާއިން 20 ކުދިން ފާސްވިއެވެ. 2023 ވަނަ އަހަރު 5 މާއްދާއިން ފާސްވި ކުދިންގެ ނިސްބަތަކީ 17 އިންސައްތައެވެ. މިދިޔަ އަހަރު އެ ނިސްބަތް 42 އިންސައްތައަށް ވަނީ މަތިވެފައެވެ. ތިން މާއްދާއިން ފާސްވި ދަރިވަރުންގެ އަދަދު ވެސް، ކުރީ އަހަރާ އަޅާބަލާއިރު މައްޗެވެ. 2023 ވަނަ އަހަރު ތިން މާއްދާއިން ފާސްވީ 34 އިންސައްތަ ދަރިވަރުންނެވެ. އެ އަދަދު މިދިޔަ އަހަރު 67 އިންސައްތައަށް އަރާފައިވެއެވެ. އަދި އެ މަދަރުސާގެ ދެ ދަރިވަރުން ޤައުމީ ގަދަ ދިހައަކުން މިދިޔަ އަހަރު ޖާގަ ހޯދިއެވެ.

މި ނަތީޖާތަކަށް ބަލާއިރު އދ. އަތޮޅު މަދަރުސާގައި އޭލެވެލް ފެށުމަކީ އޯލެވެލްގެ ނަތީޖާއަށް ވެސް ހެޔޮ އަސަރެއް ގެނެވޭނެ ބޮޑު ބަދަލަކަށް ވާނެއެވެ.

އދ. އަތޮޅު މަދަރުސާގެ ޕްރިންސިޕަލް އައިޝަތު ނާދިޔާ ވިދާޅުވީ، ކިޔަވައިދިނުމުގެ ފެންވަރު އެއްއަހަރުން އަނެއް އަހަރަށް ކުރިއަށް ގެންދަން ގިނަ މަސައްކަތްތަކެއް ކުރަމުންދާ ކަމަށާއި އޭގެ ހެޔޮ އަސަރު މިދިޔަ އަހަރުގެ ނަތީޖާއިން ފެނުނީ އެހެންވެ ކަމަށެވެ. ދަރިވަރުންނާއި ޓީޗަރުން ގުޅިގެން ގިނަ މަސައްކަތަކެއް ކުރެވޭއިރު، ބެލެނިންގެ ބައިވެރިވުމާއެކު އެ ރަށުގެ ތައުލީމީ ހާލަތު އެހެން ހަރުފަތަކަށް ގެންދެވޭނެ ކަމަށް ނާދިޔާ ވިދާޅުވިއެވެ.

"ބައެއް ފަހަރު ވިސްނުން ހުންނަނީ އޭލެވެލްއަށް މާލެދާން. ނޫނީ އޯލެވެލް ނިންމާތަނުން ވަޒީފާއަކަށްދާން. މައިންބަފައިންގެ ކައިރީގައި، ރަށްފުށުގެ ހިތްގައިމު މާހައުލުގައި ހުރެގެން ކިޔެވުމަކީ އެއީ ރަށާއި އަތޮޅަށް އަދި އާއިލާއަށައި އަމިއްލަ ނަފުސަށް ލިބޭނެ މާބޮޑު އުފަލެއް" ނާދިޔާ ވިދާޅުވިއެވެ.

ޖެހިގެން އޮތް މާމިނގިލީ އެއަރޕޯޓާއި ވަށައިގެން އޮތް ރިސޯޓްތަކުން އދ. މާމގިނގިލީގައި ކިޔަވަމުންދާ ދަރިވަރުންނަށް ފަސޭހައިން ވަޒީފާ ލިބެން އެބައޮތެވެ. އޭގެ މާނައަކީ އޯލެވެލްއާ ހިސާބުން ތައުލީމުގެ ދަތުރު ނިންމާލުމެއް ނޫނެވެ. މާދަމާގެ މުސްތަޤްބަލަށް މިއަދު މުހިންމު ވަނީ ތަޢުލީމެވެ. މަތީ ވަޒީފާތަކަށް ދިއުމުގެ ހުވަފެން ދެކޭނަމަ އަމިއްލަ ފަސްގަނޑުން ފަހިވާން އޮތް އޭލެވެލްގެ ފުރުޞަތުގެ ބޭނުން ދަރިވަރުން ހިފަންޖެހެއެވެ. އެހެން ނޫނީ ލިބޭނެ މޮޅެއް ކުރިއެރުމެއް ނެތެވެ.

މާމިނގިލީގައި އޭލެވެލް ފަށަން މުހިންމުވާ އެހެން ސަބަބެއް ވެސް އެބައޮތެވެ. އެއީ އޭލެވެލްގެ ފޮނިމީރުކަން ކައިރީގައި އޮތް ރަށްތަކަށް ވެސް އެންމެ ފަސޭހައިން ފޯރާނީ އެ ރަށުގައި އޭލެވެލް ފެށުމުންނެވެ. ފެންފުއްޓާއި ދިގުރަށާއި ދިއްދޫން އޯލެވެލް ނިންމާ ދަރިވަރުންނަށް ވެސް ލިބޭނެ ރަނގަޅު ފުރުޞަތަކަށް ވާނެއެވެ.

އދ. އަތޮޅު މަދަރުސާގައި އޭލެވެލް ފަށަން އެޑިމިޝަނަށް މިހާރު ވަނީ ހުޅުވާލާފައެވެ. މުއްދަތު ހަމަވާނީ 28 އޮގަސްޓްގައެވެ. އޭލެވެލްގެ ކިޔެވުން ފަށާނީ އަންނަ މަހުގެ 14 ވަނަ ދުވަހުއެވެ.