ދަރަނބޫދޫ ސްކޫލުން ނެރުނީ ސަޕްރައިޒް ނަތީޖާއެއް

އެ ސްކޫލުގެ 4 ދަރިވަރުން ގަދަ ދިހައެއްގައި ހިމެނިފައިވޭ

އޯލެވްލް އިމްތިޙާނު އިއްޔެ ދޫކުރަން ފަށާފައިވާއިރު، ފ. އަތޮޅު ދަރަނބޫދޫ ސްކޫލުން ނެރުނީ މުޅި އަތޮޅަށް ވެސް ސަޕްރައިޒް ނަތީޖާއެކެވެ. އެ ސްކޫލުގެ ހަތަރު ދަރިވަރުން ޤައުމީ ގަދަ ދިހައެއްގައި ހިމެނިފައިވެއެވެ. ފާއިތުވި ދެ އަހަރު، ކޮންމެ އަހަރަކު ވެސް އެއް ދަރިވަރަކު އައީ ގަދަ ދިހައެއްގައި ހިމެނެމުންނެވެ.

މި އަހަރު ބޭއްވި އޯލެވެލް އިމްތިޙާނުގައި އެ ސްކޫލުގެ 12 ދަރިވަރުން ބައިވެރިވިއެވެ. އޭގެ ތެރެއިން ހަ ދަރިވަރުން ފަސް މާއްދާއިން ފާސްވިއެވެ. އެއީ އޯލެވެލްގައި ބައިވެރިވި ދަރިވަރުންގެ 50 އިންސައްތައެވެ.

ޕްރިންސިޕަލް ހަސަން އާދަމް ވިދާޅުވީ، ފަސް މާއްދާއިން ފާސްވި ހަ ދަރިވަރުންނަކީ ޤަވާއިދުން ސްކޫލަށް ހާޒިރުވި ދަރިވަރުން ކަމަށެވެ.

"އަޅުގަނޑުމެންގެ ނަތީޖާ އެއްއަހަރުން އަނެއް އަހަރަށް އަންނަނީ ރަނގަޅުވަމުން" ހަސަން ވިދާޅުވިއެވެ.

ހަތަރު ދަރިވަރުން ގަދަ ދިހައެއްގައި ހިމެނުނުއިރު، ދަރިވަރުންނަށް ކޮށްދިން ހުރިހާ މަސައްކަތެއް ކޮށްދިނީ އެ ސްކޫލުގެ މުދައްރިސުން ކަމަށްވާތީ އެ ހުރިހާ މުދައްރިސުންނަށް އޭނާ ޝުކުރުއަދާކުރެއްވިއެވެ.

"ފާއިތުވި އަހަރު ސްޓަޑީކޭމްޕް ބާއްވަން ބޭރުން ރިސޯސް މުދައްރިސުންނެއް ނުގަންނަން. ދަރިވަރުންނަށް ކިޔަވައިދިނުމުގެ ހުރިހާ ކަމެއް ކޮށްދިނީ މުދައްރިސުން. ނަތީޖާ ނެރެން މުދައްރިސުން ވަރަށް ބުރަކޮށް މަސައްކަތްކުރި" ހަސަން ވިދާޅުވިއެވެ.

ޕްރިންސިޕަލްގެ އެންމެ ބޮޑު ހިތްހަމަޖެހުމަކީ އިނގިރޭސި މާއްދާއިން އެ ސްކޫލުގެ ތިން ދަރިވަރުން އޭ ސްޓަރ ހޯދުމެވެ. މި އަހަރު އިނގިރޭސި މާއްދާއިން އޭ ސްޓަރ ކެމްބްރިޖުން ދީފައި ވަނީ 95އިން މަތިން ލިބުމުންނެވެ.

150 އަށްވުރެ މަދުން ދަރިވަރުން ކިޔަވަމުން އަންނަ ދަރަނބޫދޫ ސްކޫލުގެ ދަރިވަރުން ވަކި މާއްދާތަކުން ހޯދި ގުރޭޑްތަކަށް ބަލާއިރު، 11 އޭ ސްޓަރ، 14 އޭ، 17 ބީގެ އިތުރުން 12 ސީ ހިމެނެއެވެ.