ސ. އަތޮޅު މަދަރުސާ އާއި ށ. އަތޮޅު މަދަރުސާއަށް ޕްރިންސިޕަލުން ހޯދަނީ

ސ. އަތޮޅު މަދަރުސާ އާއި ށ. އަތޮޅު މަދަރުސާއަށް ޕްރިންސިޕަލަކު ހޯދަން އެޑިޔުކޭޝަން މިނިސްޓްރީން މިއަދު އިއުލާން ކޮށްފިއެވެ.

އެ ދެ ސްކޫލަށް ޕްރިންސިޕަލުން ހޯދަނީ، އެ ދެ ސްކޫލުގައި އެންމެ ފަހުން ތިއްބެވި ޕްރިންސިޕަލުން އެޑިޔުކޭޝަން މިނިސްޓްރީގެ ޑެޕިއުޓީ ސްޕްރިންޓެންޑެންޓްގެ ގޮތުގައި ހަމަޖެއްސުމާ ގުޅިގެންނެވެ.

ސ. އަތޮޅު މަދަރުސާގެ ޕްރިންސިޕަލަކަށް އެންމެ ފަހުން ހުންނެވީ އާމިނަތު ޒީނިޔާއެވެ. ށ. އަތޮޅު މދަރުސާގެ ޕްރިންސިޕަލަކަށް ކުރިން ހުންނެވީ އަޙްމަދު ފައިސަލެވެ.

މި ދެ ސްކޫލަށް ޕްރިންސިޕަލުން ހޯދަން އެޑިޔުކޭޝަން މިނިސްޓްރީން ވަކިވަކިން ކުރި އިއުލާނުގައި، ކުރިމަތި ލުމުގެ ސުންގަޑިއަކަށް އޮތީ އަންނަ ބުރާސްފަތި ދުވަހުގެ 13:30 ކުރިއެވެ.

އެއްވަނަ ރޭންކުގެ ޕްރިންސިޕަލެއްގެ ޝަރުޠެއް ކަމަށް ބުނެފައިވަނީ، ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޚާއްޞަވެފައިވާ ދާއިރާއަކުން ޤައުމީ ސަނަދުގެ އޮނިގަނޑުގެ ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމެވެ. އަދި ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޚާއްޞަކުރެވިފައިވާ ދާއިރާއަކުން ޤައުމީ ސަނަދުގެ އޮނިގަނޑު ލެވެލް 9 ގެ ސަނަދެއް ޙާޞިލުކޮށްފައިވުމާއި، ސުކޫލެއްގައި ކިޔަވައިދިނުމުގައި މަދުވެގެން 2 އަހަރު ޚިދުމަތްކޮށްފައިވުމާއި، ތަޢުލީމުދޭ ނުވަތަ މަތީ ތަޢުލީމުދޭ އިދާރާއެއްގެ ހިންގުމުގެ ދާއިރާގައި 4 އަހަރު ޚިދުމަތްކޮށްފައިވުމެވެ. ތަޢުލީމީ ދާއިރާއިން ނުވަތަ ކިޔަވައިދިނުމުގެ ދާއިރާއިން ނުވަތަ ކިޔަވައިދޭ މާއްދާއަށް ޚާއްޞަކުރެވިފައިވާ ދާއިރާއަކުން ޤައުމީ ސަނަދުގެ ލެވެލް 7 ނުވަތަ 8 ގެ ސަނަދެއް ޙާޞިލުކޮށްފައިވުމާއި، ސްކޫލެއްގައި ކިޔަވައިދިނުމުގައި މަދުމެގެން 2 އަހަރު ޚިދުމަތްކޮށްފައިވުމާއި، ތަޢުލީމުދޭ ނުވަތަ މަތީ ތަޢުލީމުދޭ

އިދާރާއެއްގެ ހިންގުމުގެ ދާއިރާގައި 8 އަހަރު ޚިދުމަތްކޮށްފައިވުން ވެސް ޝަރުޠުތަކުގެ ތެރޭގައި ހިމަނާފައިވެއެވެ.

ރޭންކް 1 ގެ ޕްރިންސިޕަލެއްގެ އަސާސީ މުސާރައަކީ 16647 ރުފިޔާއެވެ. އެލަވަންސަކީ 9534 ރުފިޔާއެވެ. ހާޒިރީ އެލަވަންސަކީ މަސައްކަތަށް ނުކުންނަވާ ކޮންމެ ދުވަހަކަށް 258 ރުފިޔާއެވެ.