ފާއިތުވި އަހަރު ސީއެޗްއެސްއީ ހުޅުމާލޭގެ އެއްވަނަ ދަރިވަރަކީ ރިފާއު، ދެވަނަ ބަލްމާއު އަށް ތިންވަނަ ފާޠިމާ އަށް

ފާއިތުވި 2024 ވަނަ ދިރާސީ އަހަރު ސީއެޗްއެސްއީ ހުޅުމާލެއިން އެންމެ މޮޅު ދަރިވަރުގެ މަޤާމް އިބްރާހިމް ރިފާޢު ހޯދައިފިއެވެ. ދެވަނަ ހޯދީ އާއިޝަތު ބަލްމާއު މުޙައްމަދެވެ. ތިންވަނަ ހޯދީ ފާތިމާ ބިންތި މުޙައްމަދު ނިމާލެވެ.

ރޭ އެ ސްކޫލުގައި ބޭއްވި އަހަރީ އިނާމު ދިނުމުގެ ޖަލްސާ ޝަރަފުވެރިކޮށްދެއްވީ ދިވެހިރާއްޖޭގެ އިސްލާމިކް ޔުނިވަރސިޓީގެ ޑެޕިއުޓީ ވައިސް ޗާންސެލަރު، ޑރ. ވިޝާލް މޫސާއެވެ.

އެއްވަނަ ހޯދި ރިފާއު ދިޔައީ މަތީ ސާނަވީ ނިންމާ އިމްތިޙާނުތަކުން ޤައުމީ ގަދަ ދިހައެއްގެ 2ވަނަ އަށެވެ. އަދި އެކައުންޓިންގ ދުނިޔެއިން 8ވަނަ ވެސް އޭނާ ހޯދިއެވެ. ރިފާއު އަކީ މިދިޔަ އަހަރު އެ ސްކޫލުގެ ކެޕްޓަނެވެ.

ރިފާއު ބުނީ، ކަމިޔާބު ދަރިވަރެއްގެ ގޮތުގައި މަތީ ސާނަވި މަރުޙަލާ ނިންމާލެވުނީ، ސީއެޗްއެސްއީ ހުޅުމާލެއިން އޭނާއަށް ހޯދައިދިން ގިނަގުނަ ފުރުޞަތްތަކުގެ ސަބަބުން ކަމަށެވެ.

"ކިޔެވުމާއި އެއްވަރަށް އިތުރު ހަރަކާތްތަކުގައި ބައިވެރިވާން ވާނެ. ތިމާ އާއި ވެރިފަރާތާ އޮންނަ ގުޅުން ރަނގަޅުކޮށް، ދުޢާކުރަން ވާނެ. އެއާއެކު ކޮންމެ ދުވަހަކު ވެސް ފިލާވަޅުތައް މުރާޖައާކޮށް، މުޠާލިއާ ކުރަންވާނެ. ލީޑަރ "ލީޑަރެއްގެ ގޮތުގައި އެންމެންނާ ގުޅިގެން މަސައްކަތް ކުރި ރިފާއު އެހެން ކުދިންނަށް ދިން ނަޞޭހަތަކީ އެއީ ބުންޏެވެ.

އަމީނިއްޔާއިން ސާނަވީ ނިންމި އަހަރު އެ ސްކޫލުން ވެސް 1ވަނަ ރިފާއު ހޯދާފައިވެއެވެ.

ދެވަނަ ހޯދި ބަލްމާއު އަށް މަތީ ސާނަވީ ނިންމާ އިމްތިޙާނުތަކުން ލިބުނީ ޤައުމީ ގަދަ ދިހައެއްގެ 2ވަނައެވެ. އަދި ދިވެހި މާއްދާއިން ރާއްޖެއިން އެއްވަނަ، ބައޮލޮޖީން ދުނިޔެއިން 10ވަނަ އަދި ކެމިސްޓްރީ ދުނިޔެއިން 7ވަނަ ހޯދާފައިވެއެވެ.

ތިންވަނަ ހޯދި ފާޠިމާ، ސާނަވީ ނިންމާ އިމްތިޙާނު ތަކުން ގަދަ ދިހައެއްގެ ދެވަނަ ހޯދާފައިވެއެވެ. އަދި އޭނާ އަށް ބިޒްނަސް އިން ދުނިޔެއިން 6ވަނަ، އިކޮނޮމިކްސްއިން ދުނިޔެއިން 5ވަނަ ލިބިފައިއެވެ.

އެންމެ މޮޅު ތިން ދަރިވަރުންނަށް އެއަރޕޯޓްސް ކޮމްޕަނީން ފައިސާގެ އިނާމް ދީފައިވެއެވެ. އެކުންފުނިން ދިނީ، އެއްވަނަ އަށް ދިޔަ ދަރިވަރަށް 75،000 ރުފިޔާ، ދެވަނައަށް ދިޔަ ދަރިވަރަށް 50،000 ރުފިޔާ އަދި ތިންވަނަ އަށް ދިޔަ ދަރިވަރަށް 30،000 ރުފިޔާއެވެ.

މަތީ ސާނަވީގެ ޤައުމީ ގަދަ ދިހައެއްގައި ސީއެޗްއެސްއީ ހުޅުމާލޭގެ 149 ދަރިވަރުން މިދިޔަ އަހަރު ހިމެނިފައިވެއެވެ. މިއީ އޭގެ ކުރީ އަހަރާ އަޅާބަލާއިރު 29 ދަރިވަރުންގެ އިތުރުވުމެކެވެ. މީގެ އިތުރުން ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަޝިޕަށް 6 ދަރިވަރުންނަށް ލިބި، ހައި އެޗީވާސް ސްކޮލަރޝިޕް އެވޯޑް 39 ދަރިވަރުންނަށް މިދިޔަ އަހަރު ލިބިފައިވެއެވެ.

އެޗްއެސްއީ މާއްދާތައް ހިމެނޭ ގޮތަށް ޔުނިވާސިޓީއަށް ވަނުމުގެ ޝަރުތު ހަމަވާ ދަރިވަރުންގެ ނިސްބަތަކީ 95.56 އިންސައްތަ އެވެ. އެޗްއެސްއީ މާއްދާތައް ފިޔަވައި ދެން ހުރި މާއްދާތަކުން ފާސްވި ދަރިވަރުންގެ ނިސްބަތަކީ 72.27 އިންސައްތައެވެ. މިއީ އޭގެ ކުރީ އަހަރާ އަޅާބަލާއިރު 1.34 އިންސައްތައިގެ ކުރިއެރުމެކެވެ