ޣާޒީ ސްކޫލަށް 18 ކުލާސްރޫމް އިތުރުކުރަނީ

ހުޅުމާލޭގައި ހުންނަ ޣާޒީ ސްކޫލަށް 18 ކުލާސްރޫމް އިތުރުކުރުމުގެ މަސައްކަތް ކޮށްދޭނެ ފަރާތެއް ހޯދަން ފިނޭންސް މިނިސްޓްރީން އިޢުލާން ކޮށްފިއެވެ.

އެ މިނިސްޓްރީން މިއަދު ކުރި އިއުލާނުގައި ބުނެފައިވާ ގޮތުގައި، އެ ބީލަމުގައި ބައިވެރިވުމަށް  500 ރުފިޔާ (ފަސްސަތޭކަ ރުފިޔާ) ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަވަންޖެހޭނެއ ކަމަށާއި ފައިސާ ބަލައިގަންނާނީ  މެއި 8ން 21އަށް  ބަންދު ނޫން ކޮންމެ ދުވަހެއްގެ 8:00 އިން 14:00 އަށް މިމިނިސްޓްރީގެ އޮންލައިން ޕޭމަންޓް ޕޯޓަލް – ބަނޑޭރި ޕޭ  މެދުވެރި ކޮށެވެ.

ބިޑްސެކިޔުރިޓީގެ ގޮތުގައި 121،000 ކަނޑައަޅާފައިވާއިރު، ބީލަން ހުށަހަޅަންޖެހޭނީ ބީލަން ޕޯޓަލް މެދުވެރިކޮށް މެއި މަހުގެ 25 ވަނަ ދުވަހުގެ 13:00 ކުރިންނެވެ. ބީލަން ހުޅުވުން އޮންނާނީ މެއި 26 ވަނަ ދުވަހުގެ 11:00ގައެވެ.

ޣާޒީ ސްކޫލުގައި ކިޔަވައިދެމުން ގެންދަނީ ގުރޭޑް 10އާ ހަމައަށެވެ. ހުޅުމާލޭގެ އާބާދީއާ އެއްވަރަށް ސްކޫލްތައް އިމާރާތް ކުރެވިފައި ނުވާތީ، މިހާރު ހުރި ސްކޫލްތަކަށް ޖާގައިގެ މައްސަލަ ވަނީ ކުރިމަތިވެފައެވެ.

ހުޅުމާލޭގައި އިތުރު ސްކޫލެއް މިހާރު އިމާރާތް ކުރަމުންދާއިރު، އިތުރު ދެ ސްކުލެއް އިމާރާތް ކުރުމުގެ މަސައްކަތް ފަށާނެ ކަމަށް އެޑިޔުކޭޝަން މިނިސްޓްރީން ބުނެފައިވެއެވެ.