ކަރިކިއުލަމް ތައްޔާރުކުރުމާއި، އެކްސްޗޭންޖް ޕްރޮގްރާމްތައް ހިންގަން ޔުނިވަރސިޓީ އޮފް ވައިކަޓޯއާ އެކު އެމްއެންޔޫއިން މަސައްކަތް ކުރަން މަޝްވަރާކޮށްފިއެވެ.
މިހާރު ނިއުޒިލެންޑްގައި ހުންނެވި ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރު، ޑރ. އާއިޝަތު ޝެހެނާޒު އާދަމް ވަނީ، ޔުނިވަރސިޓީ އޮފް ވައިކަޓޯގެ ވައިސް ޗާންސެލަރއާ ބައްދަލުކުރައްވާފައެވެ. ޑރ. ޝެހެނާޒަކީ ޔުނިވަރސިޓީ އޮފް ވައިކަޓޯގެ އެލުމްނައި އެކެވެ.
އެ ޔުނިވަރސިޓީން ދެއްވި ޚާއްޞަ ދަޢުވަތަކަށް އިޖާބަދެއްވައި، މި ދަތުރުފުޅުގައި އެ ޔުނިވަރސިޓީއަށް ޒިޔާރަތްކުރައްވައި ދެ ޔުނިވަރސިޓީ ގުޅިގެން ކުރެވިދާނެ ކަންތައްތަކާ ގުޅޭ ގޮތުން މުހިންމު މަޝްވަރާތަކެއް ޑރ. ޝެހެނާޒު ވަނީ ކުރައްވާފައެވެ.
މި މަޝްވަރާތަކުގެ ތެރޭގައި ހެޔޮ އަގެއްގައި ޔުނިވަރސިޓީ މުވައްޒަފުންނާއި އެހެނިހެން ދިވެހިންނަށް ސަރުކާރުން ދެއްވާ ލޯނު އެހީގެ ދަށުން ޕީ.އެޗް.ޑީ ހެދުމުގެ ފުރުޞަތު ފަހިކުރުމާއި، ޤައުމަށް ބޭނުންވާ ޚާއްޞަ ދާއިރާތަކަށް މީހުން ބިނާކުރުމަށް ކަރިކިއުލަމް ތައްޔާރުކުރުމާއި، ދަރިވަރުންނާއި މުވައްޒަފުންގެ އެކްސްޗޭންޖް ޕްރޮގްރާމްތައް ހިންގުމާއި، އަދި ގުޅިގެން ދިރާސާތައް ކުރުން ހިމެނެއެވެ.
މި މަޝްވަރާތަކުގެ ނަތީޖާއެއްގެ ގޮތުން، ދެ ޔުނިވަރސިޓީ ދެމެދު އަވަސް މުއްދަތެއްގެ ތެރޭގައި އެމް.އޯ.ޔޫ އެއްގައި ސޮއިކުރުމަށްފަހު، ރޭވިފައިވާ މަސައްކަތްތައް ކުރިއަށް ގެންދިއުމަށް އެއްބަސްވެވުނެވެ. މީގެ އިތުރުން، ދިވެހިރާއްޖޭގެ ޤައުމީ ޔުނިވަރސިޓީގެ ޕީ.އެޗް.ޑީ ޕްރޮގްރާމްތަކަށް ޔުނިވަރސިޓީ އޮފް ވައިކަޓޯއިން ސުޕަވައިޒަރުން ފޯރުކޮށްދިނުމަށްވެސް މަޝްވަރާކުރައްވާފައިވާ ކަމަށް އެމްއެންޔޫއިން ބުނެއެވެ.
މި ބައްދަލުވުމަކީ ދެ ޔުނިވަރސިޓީގެ ގުޅުން އިތުރަށް ހަރުދަނާކޮށް، ތަޢުލީމީ ދާއިރާގައި އިތުރު ކުރިއެރުންތަކެއް ހޯދުމަށް މަގުފަހިވެގެންދާނެ މުހިންމު ބައްދަލުވުމެއް ކަމަށް ބެލެވެއެވެ. މި ބައްދަލުވުމުގެ ސަބަބުން ދިވެހި ދަރިވަރުންނާއި ޔުނިވަރސިޓީގެ މުވައްޒަފުންނަށް އައު ފުރުޞަތުތަކެއް ތަނަވަސްވެގެންދާނެ ކަމަށް އުންމީދުކުރެވޭ ކަމަށް ވެސް އެމްއެންޔޫއިން ބުނެއެވެ.
advertisment
ހިޔާލު