ނޫރާން އާއި ޢަރީބު: ފާއިތުވި ދެ އަހަރު ހިތަދޫ ސްކޫލުގެ އެންމެ މޮޅު ދަރިވަރުން

ފާއިތުވި 2022-2023 އާއި 2023-2024 ވަނަ ދިރާސީ އަހަރު، އައްޑޫ ސިޓީ ހިތަދޫ ސްކޫލުގެ އެންމެ މޮޅު ދަރިވަރުންނަށް ހޮވުނީ ނޫރާން ބިންތި މުޙައްމަދު އާއި ޢަލީ ޢަރީބު އިޤްބާލެވެ. 2022-2023 ވަނަ ދިރާސީ އަހަރުގެ އެއްވަނަ ދަރިވަރަކީ ނޫރާންއެވެ. މިދިޔަ އަހަރުގެ އެއްވަނަ ދަރިވަރަކީ ޢަރީބެވެ.

މިދިޔަ އަހަރު، ދެވަނަ ތިން ވަނަ އަށް ވެސް ދަރިވަރުން ހޮވިއެވެ. 2023-2024 ވަނަ ދިރާސީ އަހަރު އެންމެ މޮޅު ދެވަނަ ދަރިވަރަކަށް ހޮވުނީ ފާޠިމާ ނޫރައިން ފައިސަލެވެ. ތިން ވަނަ ލިބުނީ މުޙައްމަދު ޒާދު ޒާހިރަށެވެ.

ވަނަތައް ދިނުމުގައި އެއްވަނައިގެ އިތުރުން ދެވަނަ ތިން ވަނަ ހޮވަނީ އިމްތިޙާނު ހަދާ ދަރިވަރުންގެ އަދަދަށް ބަލާފައެވެ.

2022-2023 ވަނަ ދިރާސީ އަހަރުގެ އެންމެ މޮޅު ދަރިވަރުގެ ގޮތުގައި ހޮވި ނޫރާން، އޯލެވެލް އިމްތިޙާނުން، ޤައުމީ ގަދަ 10 އެއްގެ، 1ވަނަ ޙާޞިލުކުރުމުގެ އިތުރުން މެރިން ސައިންސް މާއްދާއިން އިން ރާއްޖެއިން  1 ވަނަ ލިބި، ކެމްބްރިޖް ލާނަރސް އެވޯޑް ހޯދާފައިވެއެވެ. ގުރޭޑު 9 އެއްގައި ޖަމާލުއްދީން ހައުސް ކެޕްޓަންކަމުގެ މަޤާމާއި، ގުރޭޑު 10 ގައި ސްކޫލް ކެޕްޓަންކަމުގެ މަޤާމް އަދާކޮށްފައިވެއެވެ.

ކިޔެވުމުގެ އިތުރުން ސްކޫލްގެ އިތުރު ޙަރަކާތްތަކުގައިވެސް ނޫރާން ބައިވެރިވެ، ގިނަގުނަ ކާމިޔާބީތައް ހޯދާފައިވެއެވެ. މިގޮތުން އިންޓަރ ސްކޫލް ވާހަކަދެއްކުމުގެ މުބާރާތް ފަދަ މުބާރާތްތަކުގައި ބައިވެރިވެ، ފާހަގަކޮށްލެވޭފަދަ ކާމިޔާބީތަކެއް ހޯދާފައިވެއެވެ. އަދި ސިޓީ ފެންވަރުގައި ބޭއްވުނު ބެޑްމިންޓަން މުބާރާތުގައި ބައިވެރިވުމުގެ އިތުރުން  އިންޓަރ ސްކޫލް ބެޑްމިންޓަން މުބާރާތުގައި ބައިވެރިވެ ކާމިޔާބީތައް ހޯދާފައިވެއެވެ.

މިދިޔަ އަހަރު 1ވަނަ ދަރިވަރުގެ ގޮތުގައި ހޮވި ޢަރީބު، ގުރޭޑު 9 އެއްގައި ޖަމާލުއްދީން ހައުސްގެ ކެޕްޓަންކަމާއި، ގުރޭޑު 10 ގައި ސްކޫލް ކެޕްޓަންކަމުގެ މަޤާމް އަދާކޮށްފައިވެއެވެ.

ގްރޭޑް 10 ނިންމާ އިމްތިޙާނުން، ޤައުމީ ގަދަ 10 އެއްގެ ހަ ވަނަ ޢަރީބު ހޯދާފައިވެއެވެ.

ކިޔެވުމުގެ އިތުރުން، ސްކޫލުގެ އިތުރު ޙަރަކާތްތަކުގައި ޢަރީބުގެ ބައިވެރިވުން ވަރަށް ފުރިހަމަޔަށް ލިބިފައިވާއިރު، ޤުރުއާން މުބާރާތާއި މަދަހަ މުބާރާތާއި، ވާހަކަ ދެއްކުމުގެ މުބާރާތާއި ފުޓްބޯޅައާއި ބެޑްމިންޓަން އަދި ފެތުމުގެ މުބާރާތްތަކުން ސިޓީ ފެންވަރުގައާއި ޤައުމީ ފެންވަރުގެ މުބާރާތްތަކުގައި ބައިވެރިވެ ރަންވަނަތައް ހާސިލުކޮށްފައިވެއެވެ.

މިދިޔަ އަހަރު އެންމެ މޮޅު 2ވަނަ ދަރިވަރަކަށް ހޮވުނު ފާޠިމާ، ގުރޭޑު 9 އެއްގައި ދިވެހި ކްލަބް ޕްރެޒިޑެންޓް ކަމާއި ގުރޭޑު 10 ގައި ގާރލް ގައިޑް ލީޑަރގެ މަޤާމް އަދާކޮށްފައިވެއެވެ. އޭނާ ސްކޫލް ނިންމީ އޯލެވެލް އިމްތިޙާނުން، ޤައުމީ ގަދަ 10 އެއްގެ 4 ވަނަ ހޯދައިގެންނެއެވެ. އަދި އިނގިރޭސި މާއްދާއިން ދުނިޔެއިން ނާއި ރާއްޖެއިން އެއްވަނަ ހޯދާ، ކެމްބްރިޖް ލާނާސް އެވޯޑް ހޯދާފައިވެއެވެ.

ސްކޫލް ވާހަކަ ދެއްކުމުގެ މުބާރާތްތަކުގެ އިތުރުން ޤައުމީ ވާހަކަދެއްކުމުގެ މުބާރާތްތަކުގައި ބައިވެރިވެ ފާހަގަކޮށްލެވޭފަދަ ރަނގަޅު ކާމިޔާބީތަކެއް ވެސް އޭނާ ހޯދާފައިވެއެވެ.

އެންމެ މޮޅު ތިންވަނަ ދަރިވަރަކަށް ހޮވުނު، ޒާދު، ގުރޭޑު 9 އެއްގައި މެތްސް ކްލަބް ޕްރެޒިޑެންޓް ކަމާއި، ގުރޭޑު 10 ގައި ޑެޕިއުޓީ ގޭމްސް ކެޕްޓަން ބޯއިސްގެ މަޤާމް އަދާކޮށްފައިވެއެވެ ޒާދް އަކީ ކިޔެވުމަށް ގަދައަޅައި މަސައްކަތްކުރި، ހުނަރުވެރި މޮޅު ދަރިވަރެކެވެ. އޭނާ ވަނީ ގްރޭޑް 10 ނިންމާފައި ވަނީ އޯލެވެލް އިމްތިޙާނުން، ޤައުމީ ގަދަ 10ގެ 4ވަނަ ހޯދާފައެވެ.