ދަރަނބޫދޫ ސްކޫލުގައި ދަނޑުވެރި ދަރިވަރު ޕްރޮގްރާމް ފަށައި، ދަރިވަރުން ހެއްދި ލެޓިއުސް ވިއްކަން ފަށައިފިއެވެ. ދަނޑުވެރި ދަރިވަރު ޕްރޮގްރާމަކީ ދަރަނބޫދޫ ޣައިރު ފައުންޑޭޝަނުން އިސްނަގައިގެން ކުރިއަށް ގެންދާ ޕްރޮގްރާމެކެވެ. ހައްދަން ބޭނުން ކުރާ ވާޓިކަލް ފާމިންގ ސިސްޓަމް ހަދިޔާ ކުރީ ޣައިރު ޖަމިއްޔާއިންނެވެ. ގަސް ހެއްދުމަށް ބޭނުންވާ އަސާސީ މައުލޫމާތު ފޮރުކޮށް ދިނީ ޕްލާންޓް އަ ޓްރީގެ ފަރާތުންނެވެ.
ޣައިރު ފައުންޑޭޝަންގައި ވެސް އިސްކޮށް މަސައްކަތް ކުރައްވާ ދަރަނބޫދޫ ސްކޫލުގެ ޓީޗަރު މުޙައްމަދު އަބްދުއް ޝަކޫރު ދަރިވަރު ނޫހަށް ވިދާޅުވީ، ވާޓިކަލް ފާމިންގެ އެ ސކޫލަށް ތަޢާރަފުކޮށް، ކުދިންގެ މަސައްކަތުން ހެއްދި 180 ލެޓިއުސް ގަސް ރޯދަމަހުގެ ތެރޭގައި އެ ރަށަށް ވިއްކާފައިވާ ކަމަށެވެ.
"ހުރިހާ މަސައްކަތެއް ވެސް ކުދިން ކުރީ. ބޭނުންވާ ތަމްރީނު ދަރިވަރުންނަށް ދިނީމާ އެކުދިންގެ ޝައުޤުވެރިކަން އެކަމަށް ވަރަށް މާބޮޑު" ޝަކޫރު ވިދާޅުވިއެވެ.
ޝަކޫރު ވިދާޅުވީ، ލެޓިއުސް ހެއްދުމުގެ މަސައްކަތުގައި ބައިވެރިވީ އެ ސްކޫލުގެ 8 އަދި 9ގެ ދަރިވަރުންނެވެ. ރޯދަ މަހު ވިއްކަން ނެރުނީ މީގެ ދޮޅުމަހެއްހާ ދުވަސް ކުރިން އެކުދިން އިންދި ލެޓިއުސްއެވެ.
ޝަކުރޫ ވިދާޅުވީ ދަނޑުވެރި ދަރިވަރު ކާމިޔާބު ކަމާއެކު ކުރިއަށް ގެންދިއުމަށް ލެޓިއުސް ވިއްކައިގެން ލިބޭ ފައިސާ ބޭނުން ކުރަނީ ދަނޑުވެރި ދަރިވަރު ޕްރޮގްރާމަށެވެ.
"ކޮންމެ ދޮޅު މަހަކުން ލެޓިއުސްގެ ބެޗެއް ހެއްދޭ ވަރަށް މަސައްކަތް ކުރިއަށް ގެންދަން ޕްލޭން ކޮށްފައި ވާނީ" ޝަކޫރު ވިދާޅުވިއެވެ.
ދަނޑުވެރި ދަރިވަރު ޕްރޮގްރާމް ކުރިއަށް ގެންދަނީ އެ ސްކޫލުގެ ތިމާވެށި ކުލަބުން އިސްނަގައިގެންނެވެ.
ޝަކޫރު ވިދާޅުވީ، ދަނޑުވެރި ދަރިވަރު ޕްރޮގްރާމް ފ. އަތޮޅުގެ ހުރިހާ ސްކޫލަކަށް ވެސް ފުޅާ ކުރުމުގެ ވިސްނުން އެ ފައުންޑޭޝަނުން ގެންގުޅޭ ކަމަށާއި ބޭނުމަކީ ދަނޑުވެރިކަމުގެ މައުލޫމާތާއި ހުނަރާއި ވައްޓަފާޅި ދަރިވަރުންނަށް ދަސްކޮށްދިނުން ކަމަށެވެ. އަދި ތިމާވެއްޓާއި ޒަމާނީ ދަނޑުވެރިކަމަށް ދަރިވަރުން އަހުލުވެރިކުރުމާއި ފައިދާހުރި ތަރުކާރީއާއި މޭވާއަށް މުޖްތަމައު ހޭލުންތެރިކޮށް ދަނޑުވެރިކަމުން މާލީ ފުއްދުންތެރިކަން ހޯދިދާނެ ގޮތްތައް ދަރިވަރުނަށް ތަޖުރިބާ ކުރުމުގެ ފުރުޞަތު ހޯދައިދިނުން ކަމަށެވެ.
ދަރަނބޫދޫ ސްކޫލުގައި 136 ދަރިވަރުން ކިޔަވަމުން ގެންދެއެވެ.
advertisment
ހިޔާލު