ކެމްބްރިޖް ޔުނިވާސިޓީ ޕްރެސް އެންޑް އެސެސްމަންޓުން ސްރީލަންކާ އާއި ރާއްޖެއަށް ކަނޑައެޅުއްވި އާ ކަންޓްރީ ހެޑްގެ މަގާމަށް ޒަހާރާ އަންސާރީ އައްޔަން ކުރައްވައިފިއެވެ.
މި މަޤާމަށް ބޭފުޅަކު ޢައްޔަންކުރެއްވުމުގެ ސަބަބުން، މި ސަރަޙައްދުގެ ތަޢުލީމު ޙާޞިލުކުރާ ފަރާތްތަކަށާއި ތަޢުލީމީ ދާއިރާގައި ތަޢުލީމު ޙާޞިލުކުރާ ފަރާތްތަކަށް ކެމްބްރިޖުން އަބަދުވެސް ދެއްވަމުން ގެންދަވާ އެހީތެރިކަން އިތުރަށް ހަރުދަނާވެ، ހަމަހަމަކަމާއި، ފެންވަރު ރަނގަޅު އަދި ހެޔޮ އަގުގައި ތަޢުލީމު ޙާޞިލުކުރުމުގެ ފުރުޞަތު ފަހިކޮށްދޭނެއެވެ.
ޒަހާރާއަކީ، ބޭންކިންއާއި ޓެލެކޮމިއުނިކޭޝަން އަދި ޕްރޮފެޝަނަލް އެޑިއުކޭޝަން ފަދަ ދާއިރާތަކުން 20 އަހަރުގެ ތަޖުރިބާ ލިބިވަޑައިގެންފައިވާ ބޭފުޅެކެވެ.
އެކަމަނާ ވަނީ ނޭޝަންސް ޓްރަސްޓް ބޭންކް ޕީއެލްސީ، ޑަބްލިއުއެންއެސް ގްލޯބަލް ސަރވިސަސް، ބާރްތީ އެއަރޓެލް ލަންކާގެ ނުފޫޒުގަދަ މަޤާމުތައް ފުރުއްވާފައެވެ.
ޒަހާރާ ވިދާޅުވެފައި ވަނީ، ކެމްބްރިޖްގެ ދުނިޔޭގެ ފެންވަރުގައި ކުރިއަރާފައިވާ ތައުލީމާއި ރިސާޗް އެންޑް އެސެސްމަންޓުގެ ސަބަބުން އެތައް މިލިއަން ބަޔަކަށް، ރަނގަޅު އަދި އުޖާލާ މުސްތަގުބަލެއް ބިނާވަމުން އަންނަ ކަމަށާއި ސްރީލަންކާ އާއި ރާއްޖޭގައި މިފަދަ ފުރުސަތުތައް ފަހިކޮށްދިނުމަކީ އޭނާއަށް ލިބޭ ވަރަށް ބޮޑު އުފަލެއް ކަމަށެވެ. އަދި ވިދާޅުވެފައި ވަނީ އޭނާ އުންމީދު ކުރަނީ، ދަރިވަރުންނަށާއި، ސްކޫލްތަކާއި، އެކިއެކި ޕާޓްނަރުންނާ ގުޅިގެން، ޒުވާނުންނަށް ކާމިޔާބީގެ ފުރުޞަތުތައް ފަހިކޮށްދީ، ރަނގަޅު ހުނަރުތަކާއި، ވަޒީފާގެ ޤާބިލުކަން އިތުރުކުރެވޭނެ ކަމަށެވެ.
ސައުތު އޭޝިއާގެ ކެމްބްރިޖް ޔުނިވާސިޓީ ޕްރެސް އެންޑް އެސެސްމަންޓްގެ މެނޭޖިން ޑިރެކްޓަރު އަރޫން ރާޖަމާނީ ވިދާޅުވެފައި ވަނީ، ޒަހާރާ އަކީ ތަޢުލީމީ ދާއިރާއިން ތަޖުރިބާގެ މުއްސަނދިކަމާއި މި ސަރަހައްދުގެ ތަޢުލީމީ މޮޅުކަން ކުރިއެރުވުމަށް ވަރުގަދަ އަޒުމެއް ގެންގުޅުއްވާ ބޭފުޅެއް ކަމަށެވެ. ސްރީލަންކާއާއި ރާއްޖޭގެ ތަޢުލީމުގެ މުސްތަޤްބަލަށްޓަކައި ޙިއްޞާކުރެވިފައިވާ ތަޞައްވުރު ކުރިއަށް ގެންދިއުމުގައި އެކަމަނާގެ ތަޖުރިބާއާއި ލީޑަރޝިޕްގެ މުހިންމު ދައުރެއް އޮންނާނެ ކަމަށް ވެސް އޭނާ ވިދާޅުވެފައިވެއެވެ.
"އެކަމަނާގެ ޒަޢާމަތުގައި ކުރިއަށް އޮތް އުފާވެރި ކުރިއެރުންތަކެއް ލިބޭނެ ކަމަށް އުންމީދުކުރަން" އަރޫން ވިދާޅުވެފައިވެއެވެ.
advertisment
ހިޔާލު