ޤާރީންގެ ދަތިކަށް އޮތް ހަ ރަށަކަށް، ބޭރުގެ ޤުރުއާން ހިތުދަސް ޤާރީން

ޤުރުއާން އުނގަންނައިދިނުމުގައި ޤާރީންގެ ދަތިކަށް އޮތް ރަށްތަކުގެ ތެރެއިން 6 ރަށަކަށް، ރާއްޖެއިން ބޭރުގެ ޤުރުއާން ހިތުދަސް ޤާރީން ހަމަޖައްސައި އެ ޤާރީން ރާއްޖެ ގެނެސްފިއެވެ. ޤާރީން ފޮނުވަން ނިންމި ހަ ރަށެއްގެ ނަން އެ މިނިސްޓްރީން ހާމަކޮށްފައެއް ނުވެއެވެ.

ބޭރުން ގެނައި ޤާރީން، އެ ރަށްތަކުގައި ހުންނަ ޤުރުއާން މަރުކަޒުގެ ގޮފިތަކުގައި ކިޔަވައި ދިނުމުގެ އިތުރުން މިސްކިތުގައި ޤުރުއާން ހިތު ދަސްކުރާ ކްލާސްތައް ހިންގާނެ ކަމަށް އިސްލާމިކް މިނިސްޓްރީން ބުނެއެވެ.

އެ މިނިސްޓްރީން ބުނީ، އެ މަސައްކަތް ކައުންސިލްތަކުގެ ބެލުމުގެ ދަށުން ކުރިއަށް ގެންދާއިރު، އެ މުދައްރިސުންނަށް މުސާރަ ދެވޭނީ ޤުރުއާން މަރުކަޒު މެދުވެރިކޮށް ޒަކާތު ފަންޑުގެ ފީ ސަބީލި ﷲ ބައިން ކަމަށެވެ.

އިރާދަ ކުރެއްވިއްޔާ ޤުރުއާން އުނގަންނައިދިނުމުގައި ޤާރީންގެ ދަތިކަށް ހައްލުވެ ރަށްތަކުގައި މީހުން އުފެދެންދެން އެކަންކަން ދެމިއޮންނާނެ ކަމަށެވެ. ޤުރުއާން އުނގަންނައިދިނުމުގައި ޤާރީންގެ ދަތިކަށް ހުރި ހުރިހާ ރަށަކަށް އެ މައްސަލަ ހައްލުކޮށްދޭނެ ކަމަށް ވެސް އެ މިނިސްޓްރީން ބުނެއެވެ.

ޒުވާން ޙާފިޒުންގެ ތެރެއިން ވަރަށް ގިނަ ޙާފިޒުންނަކީ އިސްލާމިކް މިނިސްޓްރީގެ 500 ހާފިޒުންގެ މަޝްރޫޢުގެ ދަސްވެނިވި ހާފިޒުން ކަމަށް އެ މިނިސްޓްރީން ބުނެފައިވެއެވެ.