އެމްއެންޔޫގެ ފަހި ސުފުރާ ހުޅުވައިފި

އެމްއެންޔޫގެ ފަހި ސުފުރާ މިއަދު ހުޅުވައިފިއެވެ. މައުރަޒު ޝަރަފުވެރިކޮށް ދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރު ޑރ. މަޙްމޫދު ޝަޢުޤީއެވެ.

މި މައުރަޒު މާދަމާ ރެއާ ހަމައަށް ކުރިއަށް ދާނެއެވެ.

މިއީ ދިވެހީންގެ ތެރޭގައި ތިބި ކާބޯތަކެތި އުފެއްދުންތެރިން އެ ފަރާތްތަކުގެ ހުނަރު އާންމުންނަށް ދައްކާލެވޭނޭ ފުރުޞަތު ތަނަވަސްކޮށްދިނުމަށް ދިވެހިރާއްޖޭގެ ޤައުމީ ޔުނިވަރސިޓީން ކޮންމެ އަހަރަކު ވެސް ބާއްވަމުން އަންނަ މައުރަޒެކެވެ. އާންމުންނާއި ހިސާބަށް އެހާ ބޮޑަށް ފޯރުކޮށްނުދެވިހުރި އައު ކާބޯތަކެތީގެ ބްރޭންޑްތައް ނުވަތަ ވައްތަރުތައް އާންމުންނާ ހަމައަށް ގެނެސް ދެވޭނެ މާޙައުލެއް އަދި ކާބޯތަކެތި ވިއްކުމަށް ބޭނުންވާ ދިވެހި އުފެއްދުންތެރިންނަށް އެފުރުސަތު ފަހި ކޮށްދީ އެފަދަ މާޙައުލެއް އުފެއްދުމަކީ މި މައުރަޒު ކޮންމެ އަހަރަކު ވެސް ބޭއްވުމުގެ މައިގަނޑު މަޤްޞަދު ކަމަށް އެމްއެންޔޫއިން ބުނެއެވެ.