ފަންނީ ކޯސްތަކުގައި ހއ. އަތޮޅު ކައުންސިލްތަކުން ދެ މުވައްޒަފުން ބައިވެރިކޮށް، މާލީ އެހީ ދެނީ

ކޮލެޖް ޔުނިވަރސިޓީން ހިންގާ ފަންނީ ކޯސްތަކުގައި ހއ. އަތޮޅު ކައުންސިލް ތަކުން ދެ މުވައްޒަފުން ބައިވެރިކޮށް، މާލީ އެހީ ދޭން ނިންމައި، އެހީއަށް އެދެން ހުޅުވާލައިފިއެވެ.

ހއ. އަތޮޅު ކައުންސިލުން ކުރި އިއުލާނުގައި ބުނެފައި ވަނީ، ކޮލެޖު އަދި ޔުނިވަރސިޓީތަކުން ހިންގާ ފަންނީ ކޯސްތަކުގައި ހއ.އަތޮޅުގެ ކައުންސިލްތަކުގެ މުވައްޒަފުން ބައިވެރިކޮށް އެ ފަރާތްތަކަށް މާލީ އެހީތެރިކަން ފޯރުކޮށްދިނުމަށް ނިންމާފައިވާތީ، މިކަމަށް ޝަރުތުހަމަވާ ޝައުގުވެރިކަންހުރި ހއ. އަތޮޅުގެ ކައުންސިލްތަކުގައި މަސައްކަތްކުރައްވާ ފަރާތްތަކަށް ކުރިމަތިލުމުގެ ފުރުޞަތު ހުޅުވިފައިވާ ކަމަށެވެ.

އެ ކައުންސިލުން ބުނީ، މާލީ އެހީ ދެނީ އެކަމަށް އެކުލަވާލާފައިވާ އުޞޫލުގައިވާ ގޮތުގެ މަތިން އެންމެ މަތިން ޕޮއިންޓް ލިބޭ ދެ ފަރާތަށް ކަމަށެވެ.

މާލީ އެހީއަށް އެދި ހުށައަޅަން ޖެހެނީ އަންނަ ފެބުރުވަރީ މަހުގެ 20 ވަނަ ދުވަހުގެ 14:00 ގެ ކުރިންނެވެ.

މިދިޔަ އަހަރު ވެސް ފަންނީ ކޯސްތަކުގައި ކިޔެވި 2 މުވައްޒަފަކަށް މާލީ އެހީތެރިކަން ހއ. އަތޮޅު ކައުންސިލުން ދީފައިވެއެވެ. މި ޕްރޮގްރާމުގެ މަޤުސަދަކީ، މި އަތޮޅުގެ ކައުންސިލްތަކުގައި މަސައްކަތްކުރާ މުވައްޒަފުންގެ ތެރޭގައި ލީޑަރޝިޕް ކުރިއަރުވައި، މުވައްޒަފުންގެ ފެންވަރު މަތިކުރުމުގެ އިތުރުން ފަންނީ ދާއިރާތަކުން ތަމްރީން ލިބިފައިވާ ޤާބިލް ބަޔަކަށް މުވައްޒަފުން ހެދުން ކަމަށް އެ ކައުންސިލުން ބުނެއެވެ.