ސީއެޗްއެސްއީ ހުޅުމާލެ، ފެހިކުރުމުގެ މަސައްކަތް އެ ސްކޫލުގެ ތިމާވެށި ކުލަބުން ފަށައިފި

ސެންޓަރ ފޯރ ހަޔަރ ސެކަންޑްރީ އެޑިޔުކޭޝަން (ސީއެޗްއެސްއީ) ހުޅުމާލެ، ފެހި ކުރުމުގެ މަސައްކަތް އެ ސްކޫލުގެ އެންވަޔަރަމަންޓް ކުލަބުން ފަށައިފިއެވެ.

2023 އަހަރު ކިޔަވައިދޭން ފެށި ސީއެޗްއެސްއީ ހުޅުމާލެގެ އާ އިމާރާތުގައި ގަސް އިންދުމުގެ ހަރަކާތް އެ ސްކޫލުގެ އެންވަޔަރަމަންޓް ކުލަބުން ފެށީ ހައުސްތަކުގެ މެދުގައި ބޭއްވި މުބާރާތެއްގެ ގޮތުގައެވެ. އެންމެ ގިނަ ގަސް ހަދިޔާ ކުރާ ހައުސްއަކަށް އެއްވަނަ ލިބޭ ގޮތަށެވެ.

ސީއެޗްއެސްއީ ހުޅުމާލެއިން ބުނީ، ގަސް ހަދިޔާ ކުރަން ހުޅުވާލީ ހުސްވި ޑިސެމްބަރު މަހުގެ 17 ވަނަ ދުވަހު ކަމަށާއި މި މަހުގެ 18 ވަނަ ދުވަހު ގަސް ދިންދިއިރު، އެ މުބާރާތަށް 1083 ގަސް ދަރިވަރުން ހަދިޔާކޮށްފައިވާ ކަމަށެވެ. ހަދިޔާ ކުރި ގަސްތަކުގެ ތެރޭގައި ހިޔާދޭ ގަސްތަކާއި މާ އަޅާ ގަސްތަކުގެ އިތުރުން އިމާރާތުގެ އެތެރޭގައި ހައްދާ ގަސްތަކެވެ.

ދެ ފިޔަވައްސަކަށް ބަހާލައިގެން ކުރިއަށް ގެންދިޔަ މި މުބާރާތުގައި، ހަދިޔާ ކުރުމުގެ ގަސްތައް އިންދުމުގެ ހަރަކާތް ކުރިއަށް ގެންދިޔައީ މިދިޔަ އާދީއްތަ ދުވަހުއެވެ. އެ ހަރަކާތް ކުރިއަށް ގެންދިޔައ 5 މިލިއަން ގަސް އިންދުމުގެ ޕްރޮގަރާމަށް އެހީތެރިވުމުގެ ގޮތުން ކަމަށް ވެސް އެ ސްކޫލުން ބުނެއެވެ.

ގަސް އިންދުމުގެ ހަރަކާތް ޝަރަފުވެރިކޮށް ދެއްވީ، ރައީސުލްޖުމްހޫރިއްޔާގެ އެންވަޔަރަމަންޓް އެންވޯއީ އަލީ ޝަރީފެވެ. އޭނާ ވަނީ މި ރަސްމިއްޔާތު ޝަރަފުވެރިކޮށް ދެއްވައި ސީއެޗްއެސްއީ ހުޅުމާލެގެ ގޯތިތެރޭގައި އަނބު ގަހެއް އިންދަވާފައެވެ.

ރާއްޖޭގެ ނާޒުކު ތިމާވެށީގެ ހާލަތާއި އެ ހާލަތުން އަރައިގަތުމަށް ކުރަމުންދާ މަސައްކަތް ދަރިވަރުންނާ އަލީ ޝަރީފު ވަނީ، ހިއްސާ ކުރައްވާފައެވެ. 2030 ވަނަ އަހަރަށް ކާބަން މަދުކުރުމާއި އިއާދަކުރަނިވި ހަކަތައިގެ ދާއިރާއިން ހޯދަމުންދާ ކުރިއެރުންތަކުގެ ތަފްޞީލު ވެސް އަލީ ޝަރީފު ވަނީ ހިއްސާ ކުރައްވާފައެވެ. ތިމާވެއްޓާ ގުޅުން ހުރި ދާއިރާތަކުން މަތީ ތަޢުލީމަށް ހުރި ފުރުޞަތުތައް ވެސް ދަރިވަރުންނަށް އޭނާ ވަނީ ވިދާޅުވެދެއްވާފައެވެ.

ސީއެޗްއެސްއީ ހުޅުމާލެގެ އެންވަޔަރަމަންޓް ކުލަބުގައި 68 ދަރިވަރުން މި ވަގުތު މަސައްކަތް ކުރަމުން ގެންދެއެވެ.