ސްކޮލަރޝިޕްގެ ދަށުން ޣިޔާޘުއްދީން ސްކޫލުގެ ގުރޭޑް 1ގައި ކިޔެވުމުގެ ފުރުޞަތު

ސްކޮލަރޝިޕްގެ ދަށުން ޣިޔާޘުއްދީން އިންޓަރނޭޝަނަލް ސްކޫލުގެ ގުރޭޑް 1ގައި ކިޔެވުމުގެ ފުރުޞަތު އެ ސްކޫލުން ހުޅުވާލައިފިއެވެ.

އެ ސްކޫލުން ކުރި އިއުލާނުގައި ބުނެފައި ވަނީ، އެ ސްކޫލުގެ ގުރޭޑް 1 އަށް ވަންނަން އެދޭ، ކަނޑައެޅިފައިވާ ޝަރުޠުތައް ފުރިހަމަވާ ދަރިވަރުންނަށް ސްކޮލަރޝިޕްގެ ދަށުން ކިޔެވުމުގެ 3 ފުރުޞަތު ހުޅުވާލާފައިވާ ކަމަށެވެ.

އެ އިއުލާނުގައި ބުނެފައިވާ ގޮތުން، ސްކޮލަރޝިޕުގައި ބައިވެރިވާން އެދޭ ފޯމް މި މަހުގެ 19 ވަނަ ދުވަހުގެ 14:00ގެ ކުރިން ހުށައަޅަން ޖެހެއެވެ.

ސްކޮލަރޝިޕް ކުރިއަށް ދާނެ ގޮތުގެ ތާރީޚްތަކެއް ވެސް އެ އިއުލާނުގައި ދީފައިވެއެވެ. އެ ގޮތުން ހުށައަޅާ ފޯމް އެވެލުއޭޓް ކުރާނީ 23 ޖަނަވަރީގައެވެ. ޝޯޓް ލިސްޓް ކުރާ ދަރިވަރުން އެސެސް ކުރާނީ ޖަނަވަރީ މަހުގެ 26 ވަނަ ދުވަހުއެވެ. ސްކޮލަރޝިޕަށް ހޮވޭ ދަރިވަރުން ކަނޑައަޅާނީ ޖަނަވަރީ މަހުގެ 29 ވަނަ ދުވަހުއެވެ. ސްކޮލަރޝިޕް އެވޯޑް ކުރާނީ ޖަނަވަރީ މަހުގެ 30 ވަނަ ދުވަހުއެވެ.

މި ސްކޮލަރޝިޕް ޕްރޮގްރާމުގެ ދަށުން ދަރިވަރުންގެ އެޑްމިޝަން ފީ އާއި ޓިއުޝަން ފީ އެ ސްކޫލުން ދައްކައިދެއެވެ. އަދި ސްކޮލަރޝިޕް ދެވުނު ޝަރުޠު ފުރިހަމަވެ، ކޮންމެ ގުރޭޑަކަށް ކަނޑައެޅިފައިވާ މިންގަނޑު ޙާޞިލްވަމުންދާނަމަ، ގުރޭޑް 10 ނިމެންދެން މި ސްކޮލަރޝިޕްގެ ދަށުން ކިޔަވައިދެވޭނެއެވެ.

ހުށައަޅަން ޖެހޭ ލިޔެކިތުންތައް ހަމަނުވާ ފޯމްތައް އިވެލުއޭޓް ނުކުރެވޭނެ ކަމަށް އެ އިއުލާނުގައި ބުނެފައިވެއެވެ.

ޣިޔާޘުއްދީން ސްކޫލަކީ ރާއްޖޭގެ ފުރަތަމަ އިންޓަރނޭޝަނަލް ސްކޫލެވެ.