12 އަހަރުގައި ޤުރުއާން ހިތުދަސްކޮށް ޒަލަފު ބިން ނާފިޢު ހޯދައި ދިނީ އުފަން ރަށް މަހިބަދޫއަށާއި އޭނާ ކިޔަވަމުން އަންނަ އދ. އަތޮޅު ތަޢުލީމީ މަރުކަޒަށް ބޮޑު ޝަރަފެކެވެ. އެއީ އެރަށާއި އެ ސްކޫލުގެ ވެސް ފުރަތަމަ ހާފިޒެވެ.
ގުރޭޑް 7ގައި މިހާރު ކިޔަވަމުން އަންނަ ޒަލަފަށް ޤުރުއާން ހިތުދަސްކުރަން ހިތްވަރު ލިބިގެން ދިޔައީ އެ ސްކޫލުގައި އަރަބި ކިޔަވައި ދެއްވި މިސްރުގެ ޓީޗަރު ކޮށްދެއްވި މަސައްކަތްތަކާއި ދެއްވި ހިތްވަރުންނެވެ.
މަހިބަދޫގެ ފުރަތަމަ ހާފިޒަށް ވުމުގެ ހުވަފެނުގައި ކުލަޖެއްސުމުގެ މަސައްކަތް ޒަލަފް ކުރީ އަމިއްލަ ގޭގައެވެ. އެކަމުގައި އޭނާގެ މަދަދުޤާރަކީ މަންމައެވެ. އެ މަސްކަތުގައި އެހީތެރިކަން ފޮރުކޮށް ދިނީ ޤުރުއާނާ ބެހޭ މަރުކަޒުން އެރަށުގައި ހިންގާ ގޮފިންނެވެ.
"ޤުރުއާން ހިތުދަސްކުރުމަކީ މަންމަ ވެސް ދެކުނު ހުވަފެނެއް. އެހެން ފަރާތްތަކުގެ އެހީތެރިކަން ލިބުނަސް ޤުރުއާން ދަސްކުރީ ގޭގައި މަންމައާއެކު" ރަށުގެ ފުރަތަމަ ހާފިޒަށް ވުމާއެކު އުފާވެފައި ހުރި ޒަލަފް ދަރިވަރު ނޫހަށް މިއަދު ކިޔައިދިނެވެ.
ޤުރުއާން ހިތުދަސްކުރުމުގެ މަސައްކަތް ޒަލަފު ފެށީ ޢުމުރުން 10 އަހަރުގައި، 2022 ވަނަ އަހަރުއެވެ. ފާއިތުވި ދެ އަހަރު ދުވަހުގެ ތެރޭގައި ކޮންމެ ދުވަހަކުހެން މަދުވެގެން ތިން ގަޑިއެއްހާއިރު ކިޔެވުމުގައި ޒަލަފު ހޭދަކުރިއެވެ. ސްކޫލް ނިމިގެން ގެއަށް އައިސް ލިބޭ ވަގުތާއި ފަތިސްގަޑި ޒަލަފު ހުސްކުރީ ހިފްޒްކުރުމަށެވެ. ޒަލަފު ބުނީ، ޤުރުއާން މުބާރާތްތަކަށް މެދުކަނޑާލަން ޖެހުމުގެ ސަބަބުން ހިތުދަސްކުރަން ބޭނުންވިހާ އަވަހަކަށް އެކަން ނުވި ކަމަށެވެ.
" ސްކޫލުން ބާއްވާ މުބާރާތްތަކާއި ރަށުގެ ފެންވަރުގައި ބާއްވާ މުބާރާތުގެ އިތުރުން އަތޮޅު ފެންވަރުގައި ބާއްވާ މުބާރާތްތަކުގައި ބައިވެރިވާން ޖެހުމުން ހިތުދަސްކުރުމުގެ މަސައްކަތަށް މެދުކެނޑުންތަކެއް އާދޭ. އެއީ ލަސްވި ސަބަބަކީ" ޒަލަފް ބުންޏެވެ.
ޒަލަފު ބުނީ، ޤުރުއާން މުރާޖައާ ކުރުމުގެ މަސައްކަތް ކޮށްދޭނެ ފަރާތެއް އެ ރަށުގައި ނެތުމާއެކު އެ މަސައްކަތް ކުރިއަށް ގެންދިޔައީ ޤުރުއާނާ ބެހޭ މަރުކަޒުން އޮންލައިންކޮށެވެ. އެކަމުގައި ކައުންސިލުގެ އެހީތެރިކަން ލިބުކަމަށް ޒަލަފު ބުންޏެވެ. މުރާޖައާ ގެންދިޔައީ ހަފުތާ ބަންދުގައި ހަތަރު ފޮތް، އެނޭން ދުވަސްތަކުގައި ދެ ފޮތް ކިޔައިދީގެންނެވެ.
ޤުރުއާން ހިތުދަސްކުރުމުގެ އިމްތިޙާނުގައި ޒަލަފް ބައިވެރިވީ ހުސްވި ޑިސެމްބަރު މަހުގެ 24 ވަނަ ދުވަހުއެވެ. އިމްތިޙާން ނިންމީ އިއްޔެއެވެ.
ޤުރުއާން ހިތުދަސްކޮށް ރަށާއި ސްކޫލަށް ހޯދައި ދިން ޝަރަފާއެކު، ޒަލަފް ހުރީ، ޖަމާއަތުގައި ނަމާދު ކުރުމާއި ހުޠުބާ ކިޔުމުގެ ހުއްދަ ލިބޭނެ ދުވަހެއްގެ އިންތިޒާރުގައެވެ.
" ވަރަށް ބޭނުން ޖަމާއަތުގައި އިމާމުވެ ނަމާދުކުރަން. އަދި ހުޠުބާވެސް ކިޔަން" ޒަލަފް ބުންޏެވެ.
އޭލެވެލްއަށްފަހު، ޒަލަފް ނިންމައިގެން ހުރީ މަދީނާ ޔުނިވަރސިޓީ ފަދަ ޔުނިވަރސިޓީއަކުން ޑޮކްޓަރީކަން ކިޔަވަން ދާށެވެ.
" ސްކޮލަރޝިޕެއްގެ ދަށުން މަދީނާއަށް ދެވޭނެ ދުވަހަކަށް އިންތިޒާރު ކުރެވޭ" ކުރިމަގަށް ޒަލަފް ކުރާ އުއްމީދަކީ އެއީއެވެ.
ޒަލަފުގެ ޝުކުރު މަންމައާއި ބައްޕަ އަދި އާއިލާގެ އެންމެންނަށް އަދާކުރިއެވެ. އަދި އެއާއެކު އެ ލިސްޓްގައި ސްކޫލާއި ކައުންސިލާއި ރަށުގެ ހުރިހާ އެންމެން ހިމެނިއެވެ. އެނާ ބޭނުންވަނީ އޭނާ ފަދަ އިތުރު ހާފިޒުން އެރަށާއި ސްކޫލުން ފެނުމެވެ.
advertisment
ހިޔާލު