9.5 މިލިއަން ޑޮލަރުގެ އެޑިޔުކޭޝަން ޓްރާންސްފޯރމޭޝަން އިނީޝިއޭޓިވް ޕްރޮޖެކްޓް އިފްތިތާޙްކޮށްފި

ރާއްޖޭގެ ތައުލީމަށް ބޮޑު ބަދަލެއް ގެންނަން 9.5 މިލިއަން ޑޮލަރުގެ އެޑިޔުކޭޝަން ޓްރާންސްފޯރމޭޝަން އިނީޝިއޭޓިވް ޕްރޮޖެކްޓް މިއަދު އިފްތިތާޙްކޮށްފިއެވެ. މި ޕްރޮޖެކްޓް އިފްތިތާޙްކޮށް ދެއްވީ ރައީސުލްޖުމްހޫރިއްޔާގެ ނައިބު ހުސައިން މުޙައްމަދު ލަތީފެވެ.

އެޑިޔުކޭޝަން ޓްރާންސްފޯރމޭޝަން އިނީޝިއޭޓިވް ފެށީ ޔުނިސެޕާއި ވޯލްޑް ބޭންކާއި އަދި ގްލޯވަލް ޕާޓްނާސް އިން ދިން ބޮޑު އެހީތެރިކަމާއެކުގައެވެ.

އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މި ރަސްމިއްޔާތުގައި މިއަދު ވިދާޅުވީ، ރާއްޖޭގެ ތައުލީމީ ނިޒާމުގައި ހުރި ބޮޑެތި މައްސަލަތަކަށް އެޑްރެސް ކުރުމަށް ތިން ގްރާންޓެއްގެ ގޮތުގައި ހަމަޖެއްސި 9.5 މިލިއަން ޑޮލަރުގެ ބޭނުން ކުރައްވާނެ ކަމަށެވެ.

" މި ތިން ގްރާންޓްގެ އެހީގައި އަޅުގަނޑުމެން މަސައްކަތް ކުރާނީ ތައުލީމީ ފެންވަރު މަތިކުރަން. ވަޒީފާގެ ބާޒާރަށް ނެރޭ ކުދިންގެ އަދަދު ގިނަކުރަން. ދިވެހި ނަސްލުގެ ޓީޗަރުން ގިނަކުރަން. މިކަންތައްތަކަށް އިންވެސްޓް ކުރަން އަޅުގަނޑުމެން ވާނީ ނިންމާފައި.

" މިނިސްޓަރު ވިދާޅުވިއެވެ.

މިނިސްޓަރު ވިދާޅުވި ގޮތުގައި، ތިން ގްރާންޓްގެ ތެރެއިން ސިސްޓަމް ޓްރާންސް ފޯމޭޝަން ގްރާންޓްގެ ގޮތުގައި ޖީޕީއީއިން ދިން ފަސް މިލިއަން ޑޮލަރު ބޭނުން ކުރައްވާނީ، ޓީޗަރުން ތަމްރީނު ކުރުމުގެ ޕްރޮގްރާމް ހިންގުމަށާއި ސްކޫލްތަކަކީ އަމާން އިންކްލޫސިވް ތަންތަން ގޮތުގައި ބައްޓަންކުރުމަށް ކުރަންޖެހޭ އިންވެސްޓްމަންޓްތަކާއި ކަރިކިއުލަމަށް ގެންނަންޖެހޭ ބަދަލުތައް ގެނައުމަށެވެ.

ސިސްޓަމް ކެޕޭސިޓީ ނަމުގައި ޖީޕީއީން ދޭ އިތުރު 1.5 މިލިއަން ޑޮލަރު ހޭދަކުރައްވާނީ އެޑިޔުކޭޝަންގެ ހިންގުން ހަރުދަނާ ކުރުމަށެވެ. އޭގެ ތެރޭގައި ޕްލޭނިންގ އާއި އެޑިޔުކޭޝަން ފައިނޭންސިންއާއި ތައުލީމީދާއިގެ އިންސްޓިޓިއުޝަންތައް ހަރުދަނާ ކުރަންވާނެ ކަމަށް މިނިސްޓަރު ވިދާޅުވިއެވެ.

އަދި ވިދާޅުވީ، މަލްޓި ޕްލެއަރ ގްރާންޓްގެ ގޮތުގައި ވާލްޑް ބޭންކްގެ އެހީތެރިކަމާއެކު ޖީޑީއީ އިން ލިބުނު ގްރާންޓް ބޭނުން ކުރައްވާނީ ހުރިހާ ސްކޫލެއް އެއްވިއުގައަކުން ގުޅުވާލެވި ދަރިވަރުންނާއި ޓީޗަރުންގެ މައުލޫމާތު މިހާރަށްވުރެ ބޮޑަށް އެއްކުރެވި ލިބޭ މައުލޫމާތުގެ މައްޗަށް ޕޮލިސީ ޑިސިޝަންތައް ނެގުމަށް ބޭނުންވާ ކަންތައްތައް ފުރިހަމަ ކުރެއްވުމަށެވެ.