ވިލާ ކޮލެޖުން ޤާނޫނީ ދާއިރާގެ މާސްޓަރސް ތިން ޕްރޮގްރާމް ތަޢާރަފްކޮށްފި

ވިލާ ކޮލެޖުން މާސްޓަރ އޮފް ލޯ (އެލްއެލްއެމް) ގެ ތިން ޕްރޮގްރާމެއް ސެޕްޓެމްބަރ 2025 ގެ އިންޓޭކަށް ތަޢާރަފްކޮށްފިއެވެ.

މި ޕްރޮގްރާމްތަކަކީ، ކޯޕަރޭޓް ގަވަރނަންސް، އޯލްޓަރނޭޓިވް ޑިސްޕިއުޓް ރިޒޮލިއުޝަން، އަދި އިސްލާމިކް ފައިނޭންސްގެ ދާއިރާތަކުން ޤާނޫނީ މާހިރުން އުފެއްދުމަށް ފަރުމާކުރެވިފައިވާ ޕްރޮގްރާމްތަކެކެވެ. މި ޕްރޮގްރާމްތަކުގެ މައިގަނޑު މަޤްޞަދަކީ، ޤާނޫނީ ދާއިރާއިން މަތީ ތަޢުލީމު ހާސިލުކުރައްވާފައިވާ ބޭފުޅުންނަށް، ވަކިވަކި ދާއިރާތަކުން ޚާއްޞަވެވަޑައިގަތުމުގެ ފުރުޞަތު ފަހިކޮށްދިނުމެވެ.

އެލްއެލްއެމް އިން ކޯޕަރޭޓް ގަވަރނަންސް

މި ޕްރޮގްރާމް ފަރުމާކުރެވިފައިވަނީ ކޯޕަރޭޓް ޤާނޫނުތަކާއި، އެ ޤާނޫނުތައް ޢަމަލީ ގޮތުން ބޭނުންކުރުމާއި ކޮމްޕްލަޔަންސްގެ ދާއިރާއިން ދަރިވަރުންގެ ޤާބިލްކަން އިތުރުކުރުމަށެވެ. މީގެ މައިގަނޑު މަޤްޞަދަކީ ކޯޕަރޭޓް ދާއިރާގައި ކާމިޔާބު ކެރިއަރެއް ބިނާކުރުމަށް ބޭނުންވާނެ ހުނަރުތައް ދަރިވަރުންނަށް ހޯދައިދިނުމެވެ. ޕްރޮގްރާމްގެ މޮޑިއުލްތަކުގެ ތެރޭގައި "ޓްރާންސްނޭޝަނަލް ކޯޕަރޭޓް އެންޑް ކެޕިޓަލް މާކެޓްސް ލޯ"، "އިންޓަރނޭޝަނަލް ކޮމާޝަލް ލޯ"، އަދި "ދަ ޕްރިންސިޕަލްސް އެންޑް ޕްރެކްޓިސަސް އޮފް ކޯޕަރޭޓް ގަވަރނަންސް" ފަދަ މުހިންމު މާއްދާތައް ހިމެނެއެވެ.

އެލްއެލްއެމް އިން އޯލްޓަރނޭޓިވް ޑިސްޕިއުޓް ރިޒޮލިއުޝަން

މި ޕްރޮގްރާމަކީ ދެބަސްވުންތައް ޙައްލުކުރުމުގެ ހުނަރުތައް، ޚާއްޞަކޮށް ކޯޓުން ބޭރުގައި މައްސަލަތައް ޙައްލުކުރުމުގެ ޤާބިލްކަން އިތުރުކުރުމަށް އަމާޒުކޮށްފައިވާ ޕްރޮގްރާމެކެވެ. އާބިޓްރޭޓަރުންނާއި، މީޑިއޭޓަރުންނާއި، އަދި ނެގޯޝިއޭޝަން ވަކީލުންގެ ގޮތުގައި މަސައްކަތް ކުރުމަށް ބޭނުންވާ ޢިލްމާއި ހުނަރު މި ޕްރޮގްރާމުން ލިބިގެންދާނެއެވެ. ކިޔަވައިދެވޭ މޮޑިއުލްތަކުގެ ތެރޭގައި "ޕަބްލިކް އިންޓަރނޭޝަނަލް ލޯ"، "ނެގޯޝިއޭޝަން އެންޑް މީޑިއޭޝަން"، އަދި "އިންޓަރނޭޝަނަލް ޑިސްޕިއުޓް ސެޓަލްމަންޓް" ފަދަ މާއްދާތައް ހިމެނެއެވެ.

އެލްއެލްއެމް އިން އިސްލާމިކް ފައިނޭންސް

އެލްއެލްއެމް އިން އިސްލާމިކް ފައިނޭންސް ޕްރޮގްރާމަކީ، އިސްލާމީ މާލީ މުޢާމަލާތްތަކާއި ވިޔަފާރީގެ ޤާނޫނީ އުސޫލުތަކަށް އަހުލުވެރި، ޢަމަލީ ތަޖުރިބާ ލިބިފައިވާ ޤާނޫނީ މާހިރުން އުފެއްދުމަށް ފަރުމާކުރެވިފައިވާ ޕްރޮގްރާމެކެވެ. މި ޕްރޮގްރާމްގެ އެންމެ ޚާއްޞަ ކަމަކީ، އިންޓަރނޭޝަނަލް ސެންޓަރ ފޮރ އެޑިޔުކޭޝަން އިން އިސްލާމިކް ފައިނޭންސް (އިންސެއިފް) ޔުނިވަރސިޓީގެ ތިން މައިކްރޯ-ކްރެޑެންޝަލް މޮޑިއުލް ހިމެނުމެވެ. މައިކްރޯ-ކްރެޑެންޝަލް އަކީ، ވަކި ހުނަރެއް ނުވަތަ ޤާބިލްކަމެއް ލިބިފައިވާކަން އަންގައިދޭ، ކުރު މުއްދަތެއްގެ ޚާއްޞަ ކޯހެކެވެ. މިގޮތުން، "ޝަރީޢާ އެސްޕެކްޓްސް އޮފް ބިޒްނަސް އެންޑް ފައިނޭންސް"، "އިސްލާމިކް ބޭންކިންގ ޕްރެކްޓިސަސް"، އަދި "ރިސްކް މެނޭޖްމަންޓް އިން ބޭންކްސް" – މި ތިން މޮޑިއުލް ފުރިހަމަކުރާ ދަރިވަރުންނަށް އިންސެއިފްގެ ޕްރޮފެޝަނަލް ސެޓްފިކެޓް ލިބިގެންދާނެއެވެ. މި ކޯސް ފުރިހަމަކުރާ ދަރިވަރުންނަކީ ޢަމަލީ އަދި ދާއިރާއާ ގުޅުންހުރި ހުނަރުތައް ލިބިފައިވާ، ބައިނަލްއަޤްވާމީ ފެންވަރުގައި ޤަބޫލުކުރެވޭ، އިސްލާމިކް ފައިނޭންސްގެ މާކެޓުގައި ވާދަވެރި، ޤާބިލް ބަޔަކަށް ވެގެންދާނެއެވެ.

މި ތަޢާރަފް ކުރެވެނު ތިން ޕްރޮގްރާމަކީވެސް އޮންލައިންކޮށް ކިޔެވުމުގެ ފުރުޞަތު ހުޅުވާލެވިފައިވާ ޕްރޮގްރާމްތަކެކެވެ. މިކަމުގެ ސަބަބުން، އެކި ކަންކޮޅުތަކުގައި ތިބި ޤާނޫނީ ޕްރޮފެޝަނަލުންނަށް ވެސް މި ކޯސް ފުރިހަމަކުރުމުގެ މަގު ތަނަވަސްވެގެންދާނެއެވެ. މިއަދު ތަޢާރަފްކުރެވުނު ތިން ޕްރޮގްރާމަކީ ވެސް މޯލްޑިވްސް ކޮލިފިކޭޝަން އޮތޯރިޓީ (އެމް.ކިއު.އޭ) އަދި ދިވެހިރާއްޖޭގެ ބާ ކައުންސިލްގެ އެކްރެޑިޓޭޝަން ލިބިފައިވާ ޕްރޮގްރާމްތަކެކެވެ.

މި އައު ޕްރޮގްރާމްތަކުގެ އިތުރުން، ވިލާ ކޮލެޖުގެ ޝަރީޢާ އެންޑް ލޯ ފެކަލްޓީން ދަރިވަރުންގެ ޢަމަލީ ހުނަރުތައް ތަރައްޤީކުރުމަށް ޚާއްޞަ މުހިންމުކަމެއް ދެއެވެ. ސްޓްރީޓް ލޯ އިންކް، ލީގަލް އެއިޑް ކްލިނިކް، ޖަޖް ރެޒިޑެންސީ ޕްރޮގްރާމް، މޫޓިންގ، ޓްރައިއަލް އެޑްވަކަސީ އެންޑް އާބިޓްރޭޝަން ކްލަބް (އެމްޓެކް)، އަދި އެކަޑެމިކް އިވެންޓްސް ކްލަބް (އޭއީސީ) ފަދަ ޕްލެޓްފޯމްތައް މެދުވެރިކޮށް، ދަރިވަރުންނަށް ޤާނޫނީ ދާއިރާގެ ޢަމަލީ ތަޖުރިބާ ފޯރުކޮށްދީ، މުޖުތަމަޢަށް ޚިދުމަތްކުރުމުގެ ރޫޙު އާލާކުރެއެވެ. މި ހަރަކާތްތަކުގެ ތެރެއިން، ޤާނޫނީ ދިރާސާކުރުމާއި، ހުށަހެޅުންތައް ތައްޔާރުކުރުމާއި، ޢާންމުންގެ ކުރިމަތީގައި ވާހަކަ ދެއްކުން ފަދަ
ހުނަރުތައް ތަރައްޤީވެ، ޤާނޫނީ ދާއިރާއަށް ބޭނުންވާނެ ޤާބިލްކަމާއި ހުނަރުތައް ތަރައްޤީވެގެންދެއެވެ.

ވިލާ ކޮލެޖުގެ ފެކަލްޓީ އޮފް ޝަރީޢާ އެންޑް ލޯގެ ޑީން، އުސްތާޛާ އަސްނާ އަޙްމަދު، މި ޕްރޮގްރާމްތަކާ ގުޅޭގޮތުން ވިދާޅުވީ، "ރާއްޖޭގެ އިޤްތިޞާދީ އަދި ޤާނޫނީ މާޙައުލު ބަދަލުވަމުން އަންނައިރު، ޚާއްޞަ ދާއިރާތަކުން ތަމްރީނުވެފައިވާ ޕްރޮފެޝަނަލުންނަށް އޮތް ޑިމާންޑް ދަނީ އިތުރުވަމުން. އަޅުގަނޑުމެން މި ތަޢާރަފްކުރި ތިން ޕްރޮގްރާމަކީ، މި ބޭނުންތަކަށް ޖަވާބުދިނުމުގެ ގޮތުން ފަރުމާކުރެވިފައިވާ ޕްރޮގްރާމްތަކެއް." ކަމަށެވެ.

ވިލާ ކޮލެޖުގެ ޤާނޫނީ ތަޢުލީމުގެ ފަލްސަފާއަކީ، ޒަމާނީ، ފުޅާ、އަދި ކުރިމަގަށް އަމާޒުކުރެވިފައިވާ ފަލްސަފާއެކެވެ. މި ޕްރޮގްރާމްތައް ފަރުމާކުރެވިފައިވަނީ، ތިއަރީއާއި ޢަމަލީ މަސައްކަތް ގުޅުވައިދޭ، އަދި އެންމެ ފަހުގެ ދިރާސާތަކުގެ އަލީގައި، ދަރިވަރުންނަށް ފުރިހަމަ ޤާނޫނީ ތަޢުލީމެއް ފޯރުކޮށްދިނުމަށެވެ.

މި ޕްރޮގްރާމްތަކާ ގުޅޭގޮތުން ވިލާ ކޮލެޖުގެ ވައިސް ރެކްޓަރ، ޑރ. ޢަލީ ނަޖީބު ވިދާޅުވީ، "މި ޕްރޮގްރާމްތައް ފުރިހަމަކުރާ ދަރިވަރުން ވެގެންދާނީ ރާއްޖޭގެ ކޯޕަރޭޓް ދާއިރާ ހަރުދަނާކޮށް، ވިޔަފާރީގެ ދެބަސްވުންތައް ހަލުވިކަމާއެކު ޙައްލުކޮށް، އަދި އިސްލާމީ މާލީ ދާއިރާއަށް ޤާނޫނީ ލަފާ ދެވޭނެ ފަދަ ޤާބިލް ލީޑަރުންނަށް. މިއީ ވިލާ ކޮލެޖުން ޤައުމީ ތަރައްޤީއަށް ފޯރުކޮށްދޭ ޢިލްމީ ހިއްސާގެ މުހިންމު ބައެއް،" ކަމަށެވެ.

ވިލާ ކޮލެޖުގެ މި ޕްރޮގްރާމްތަކުގައި ބައިވެރިވުމަށް ޝައުޤުވެރިވާ ފަރާތްތަކަށް ސެޕްޓެމްބަރ 2025 އިންޓޭކަށް އެދި ހުށަހެޅުމުގެ ފުރުޞަތު މިހާރު ހުޅުވާލެވިފައިވެއެވެ. އެޕްލިކޭޝަން ހުށަހެޅުމުގެ އެންމެ ފަހު ތާރީޚަކީ ސެޕްޓެންބަރު 3 ވަނަ ދުވަހެވެ. ޕްރޮގްރާމްތަކާއި ގުޅޭ އިތުރު ތަފްސީލްތަކާއި އެޕްލިކޭޝަން ހުށަހެޅުމާބެހޭ މައުލޫމާތު ވިލާ ކޮލެޖުގެ ވެބްސައިޓް https://www.villacollege.edu.my އިން ލިބިވަޑައިގަންނަވާނެއެވެ.