އެންއައިއީގެ ވެރިޔަކަށް ޑރ. ނިޝާން

ނެޝަނަލް އިންސްޓިޓިޔުޓް އޮފް އެޑިޔުކޭޝަން(އެންއައިއީ) އިސް ވެރިޔެއްގެ ގޮތުގައި ތަޢުލީމީ ވުޒާރާގެ ނައިބު ޑރ. ފާތިމަތު ނިޝާން ހަމަޖައްސަވައިފިއެވެ.

އެންއައިއީގެ އެންމެ އިސްވެރިޔެއްގެ ގޮތުގައި ނިޝާން ހަމަޖެއްސެވިކަން އިއުލާން ކުރެއްވީ، އެ އިންސްޓިޓިއުޝަންގައި އިއްޔެ ބޭއްވި ޚާއްޞަ ބައްދަލުވުމެއްގައި، ތަޢުލީމީ ވަޒީރު ޑރ. އިސްމާއިލް ޝަފީޢުއެވެ.

އިންކްލޫސިވް އެޑިޔުކޭޝަންގެ ދާއިރާއިން ޕީއެޗްޑީ ހެއްދެވި ނިޝާން، ކުރިން ހުންނެވީ ޑިޕާޓްމެންޓް އޮފް އިންކްލޫސިވް އެޑިޔުކޭޝަންގެ ޑިރެކްޓަރ ޖެނެރަލްގެ މަގާމުގައެވެ. އޭނާ ވަނީ ތައުލީމީ ވުޒާރާގައާއި ޣިޔާޘުއްދީން ސްކޫލުގެ އިތުރުން ދިވެހިރާއްޖޭގެ ޤައުމީ ޔުނިވަރސިޓީގައި މަސައްކަތް ކުރައްވާފައެވެ.