ދުވަސްތައް ފާހަގަކުރުމަށް ބެލެނިވެރިންލައްވައި ބޮޑެތި ހޭދަތައް ނުކުރަން ސްކޫލްތަކަށް އަންގައިފި  

އިސްކޫލުތަކުން އެކިއެކި މުނާސަބާތަކާ ގުޅުވައިގެން ފާހަގަކުރާ އެކިއެކި ދުވަސްތައް ފާހަގަކުރުމަށް ބޮޑެތި ހޭދަތައް ނުކުރަން އެޑިޔުކޭޝަން މިނިސްޓްރީން އިސްކޫލުތަކަށް އަންގައިފިއެވެ.

އެޑިޔުކޭޝަން މިނިސްޓަރު ޑރ. އައިޝަތު އަލީ ސޮއިކުރައްވައި، ސްކޫލްތަކުގެ ޕްރިންސިޕަލުންނާއި ހިންގުމާ ހަވާލުވެތިއްބެވި އިސްވެރިންނަށް ފޮނުއްވި ސިޓީގައި ވިދާޅުވެފައި ވަނީ، އިސްކޫލުތަކުން އެކިއެކި މުނާސަބާތަކާ ގުޅުވައިގެން ފާހަގަކުރާ އެކިއެކި ދުވަސްތައް ފާހަގަކުރުމަށް ބޮޑެތި ހޭދަތައް ކުރަމުންދާކަން ފާހަގަކުރެވޭ ކަމަށެވެ. މިގޮތުން ކުރާ ހޭދަތަކަށް ބޭނުންވާ ފައިސާ އިސްކޫލުތަކުގެ ޕީޓީއޭ މެދުވެރިކޮށް، އަދި އެކި ފަރާތްތަކުން ހިލޭ އެހީ ސޮޕޮންސަރގެ ގޮތުގައި ހޯދާކަން ފާހަގަ ކުރެވިފައިވާ ކަމަށެވެ.

މިފަދަ ކަންކަމަށް ހޭދަކުރުމަށް ބެލެނިވެރިން މެދުވެރިކޮށް އެހީގެ ގޮތުގައި ފައިސާ ހޯދުމާއި، ބެލެނިވެރިންލައްވައި ބޮޑެތި ހޭދަތައް ކުރުމަކީ އެ މިނިސްޓްރީން އެއްވެސް ވަރަކަށް ތަރުޙީބުދޭ ކަމެއް ނޫންކަމަށް އެ ސިޓީގައި މިނިސްޓަރު ފާހަގަކުރައްވާފައިވެއެވެ.

ބެލެނިވެރިންލައްވައި ބޮޑެތި ހޭދަތައް ކުރަމުންދާ ކަމުގެ ޝަކުވާ ބެލެނިވެރިންގެ ފަރާތުން އެ މިނިސްޓްރީއަށް ލިބެމުންދާކަން ފާހަގަކުރައްވައި ވިދާޅުވެފައި ވަނީ، އިސްކޫލުތަކުގައި ރާވާ ހިންގާ ކޮންމެ ހަރަކާތަކީ އެކަމުގެ ސީދާ މަންފާ ދަރިވަރުންނަށް ކުރާގޮތަށް ހިންގާ ޙަރަކާތަކަށް ހެދުމާއި، ބެލެނިވެރިން ދަރިވަރުންނަށްޓަކައި ކުރާ ކޮންމެ ހޭދައަކީ އެކަމުގެ ސީދާ އަސަރު ދަރިވަރުންނަށް ކުރާކަމަކަށް ހެދުމަށް އެ މިނިސްޓްރީން އަބަދު ވެސް ބާރުއަޅަމުން ގެންދާ ކަމަށެވެ.

" ހޭދަތައް ކުރުމުގައި އިޤްތިޞާދު ކުރުމަށް ދަރިވަރުން އަދި ބެލެނިވެރިންނަށް ބާރުއަޅައި ހިތްވަރުދޭން ޖެހެއެވެ. އެހެނީ، މުޅި ދުނިޔެ އިޤްތިޞާދީ ބަނަ ވިލާގަނޑެއްގެ ތެރޭގައި އޮތް މިފަދަ ދުވަސްވަރެއްގައި ޚަރަދު ކުޑަކުރުމާއި އިސްރާފުކުރުން މަދުކުރުމަށް ދަރިވަރުންނަށް ދަސްކޮށްދީ އެކަމަށް އެންމެހާ ފަރާތްތަކަށް ހިތްވަރު ދިނުމުގައި ތަޢުލީމީ ނިޒާމުގެ ތެރެއިން ނަމޫނާ ދެއްކިދާނެއެވެ. އެހެންކަމުން ދުވަސްތައް ފާހަގަކުރުމަށް އަގުބޮޑު ހަދިޔާތައް ބަދަލުކުރުމުމާއި، އެކިއެކި ޙަފްލާތައް ބޭއްވުމަށް ބޮޑެތި ހޭދަތައް ނުކުރުމަކީ މި މިނިސްޓްރީގެ އިލްތިމާސެކެވެ." މިނިސްޓަރު ވިދާޅުވެފައިވެއެވެ.

"އެހެނީ މިގޮތަށް ކުރެވޭ ކަންކަމުގެ ސަބަބުން އެއް ކުލާހެއްގައި ކިޔަވާ ދަރިވަރުންގެ މެދުގައި އަޅާކިޔުމާއި، ދޭދޭ އިސްކޫލުތަކުން ރާވާ މިފަދަ ކަންކަމުގެ ސަބަބުން އިސްކޫލުތައް އަޅާކިޔުމަށް މަގުފަހިވެ އިސްކޫލު ތެރޭގައި ދަރިވަރުން ދަރަޖަކުރެވި ލޭބަލްވުމަށް މަގުފަހި ވުމާއި، މުޖްތަމަޢުގެ ތެރޭގައި ތަޢުލީމީ ނިޒާމާ ދޭތެރޭ ދެކޭގޮތް ބަދަލުވެ ނުރަނގަޅު ތަޞައްވުރެއް އުފެދުމަށް މަގުފަހިވެގެންދެއެވެ."

އެކި މުބާސަބަތުތައް ފާހަގަކުރުމަށް ބާއްވާ ދުވަސްތައް އިންތިޒާމް ކުރުމުގައި މިކަންކަމަށް ހުރިހާ ސްކޫލްތަކުން ސަމާލުކަންދީ އިޤްތިޞާދު ކުރުމުގެ އާދަ ސްކޫލްތަކުގެ ތެރޭގައި އަށަގެންނެވުމަށް މަސައްކަތް ކޮށްދެއްވުން މިނިސްޓަރު ވަނީ އެ ސިޓީގައި އެދިވަޑައިގެންފައެވެ.