ހއ އިން ސ އަށް، އުފަލާއި ހިތްހަމަޖެހުމާ އެކު ކުޅުމުގައި ދެ ގަޑިއިރު

މި އަހަރުގެ ކުޑަކުދިންގެ ދުވަސް މުޅި ރާއްޖޭގައި މިއަދު ފާހަގަކޮށްފިއެވެ. އެހެން އަހަރުތަކާ ޚިލާފަށް ކުޑަކުދިންގެ ދުވަހުގެ ހަރަކާތްތައް ކުރިއަށް ގެންދިޔައީ ހުރިހާ ސްކޫލްތައް ގުޅިގެން އެއް ދުވަހެއްގައެވެ. އާއިލާގެ އެންމެންނަށް ބައިވެރިވެވޭ އުފާވެރި އާއިލީ ހަވީރެއްގެ ގޮތުގައެވެ. ކުޑަކުދިންގެ ދުވަސް މިހާ ފުޅާކޮށް، ފާހަގަކުރަން އިސްނެންގެވީ އެޑިޔުކޭޝަން މިނިސްޓަރު ޑރ. އިސްމާއިލް ޝަފީޢުއެވެ. ހުރިހާ ސްކޫލެއްގައި ވެސް މި ދުވަސް ފާހަގަކުރީ އެޑިޔުކޭޝަން މިނިސްޓްރީއާ ގުޅިގެންނެވެ.

ކުޑަކުދިންގެ ދުވަސް ފާހަގަކުރީ ގިނަ ސްކޫލްތަކެއް އެކުވެގެން ގިނަ ދަރިވަރުންނާއި އާއިލާގެ މީހުންނަށް ވެސް ބައިވެރިވެވޭ ގޮތަށެވެ. ތަފާތު ކުޅިވަރު ހަރަކާތްތަކާއި ދިވެހިންގެ ސަޤާފަތާއި އެހާރާއި މިހާރުގެ ކުޅިވަރުތައް ހަމަނައިގެންނެވެ.

މާލޭގައި ކުޑަކުދިންގެ ދުވަސް ސްކޫލުތަކުން ފާހަގަކުރީ ފަސް ސަރަހައްދެއްގައެވެ. މިއިން ކޮންމެ ސަރަހައްދެއްގައި ވެސް ދުވަހުގެ ހަރަކާތްތައް ކުރިއަށް ގެންދިޔައީ ގިނަ ސްކޫލްތަކެއް އެކުވެގެންނެވެ. ހުޅުމާލޭ ސެންޓްރަލް ޕާކުގައި ހަރަކާތްތައް ކުރިއަށް ގެންދިޔައީ ހުޅުމާލޭގައި ކިޔަވައިދެމުން ގެންދާ ސަރުކާރުގެ ސްކޫލްތައް ގުޅިގެންނެވެ. އެއީ ޞަލާޙުއްދީން ސްކޫލާއި ރެހެންދި ސްކޫލާއި ޣާޒީ ސްކޫލާއި ހުރަވީ ސްކޫލާއި ސީއެޗްއެސްއީ ހުޅުމާލެއާއި މުޙައްމަދު ޤާސިމް ޕްރީ ސްކޫލާއި ކާމިލުދީދީ ޕްރައިމަރީ ސްކޫލެވެ.

ސެންޓްރަލް ޕާކުގައި ކުރިއަށް ގެންދިޔަ ހަރަކާތްތަކުތެރޭގައި ކުދިންގެ ތަފާތު ސްޓޭޖް ހަރަކާތްތަކާއި ކުޅިވަރު ހަރަކާތްތައް ހިމެނެއެވެ. މި ހަރަކާތްތަކުގައި ގިނަ އަދަދެއްގެ ކުދިން ބައިވެރިވެފައިވެއެވެ.

އަމީނިއްޔާ ސްކޫލާއި ޖަމާލުއްދީން ސްކޫލާއި އިސްކަންދަރު ސްކޫލާއި ދަރުމަވަންތަ ސްކޫލާއި އަރަބިއްޔާ ސްކޫލުން ކުޑަކުދިންގެ ދުވަހުގެ ހަރަކާތްތައް ކުރިއަށް ގެންދިޔައީ ސަލްޓަންޕާކާއި ޖުމްހޫރީ މައިދާނުގައެވެ. ތާޖުއްދީނާއި ހިރިޔާ ސްކޫލުން، ދުވަހުގެ ހަރަކާތްތައް ކުރިއަށް ގެންދިޔައީ ރަސްފަންނުގައެވެ. އިމާދުއްދީން ސްކޫލާއި ކަލާފާނުގެ އިތުރުން މަޖީދިއްޔާ ސްކޫލުން ދުވަހުގެ ހަރަކާތްތައް ކުރިއަށް ގެންދިޔައީ ހެންވޭރު ދަނޑުގައެވެ.

އަތޮޅުތެރޭގެ ސްކޫލްތަކުން ވެސް ގިނަ ހަރަކާތްތަކެއް ކުޑަކުދިންގެ ދުވަހު ކުރިއަށް ގެންދިޔައެވެ. ކޮންމެ ރަށަކަށް ވެސް މިދަކީ އީދެކެވެ. ތަފާތު މަޖާ ގޭމްތަކާއި ދިވެހި ސަޤާފަތާއި އެހާރާއި މިހާރުގެ ކުޅިވަރުތައް ކުރިއަށް ގެންދިޔައެވެ.

ހިތަދޫ ސްކޫލުގެ ޕްރިންސިޕަލް ޑރ. އާސިޔަތު މުޙައްމަދު ދީދީ ވިދާޅުވީ، އެ ސްކޫލުން މަސައްކަތް ކުރީ އާއިލާއާއެކު ކުދިންނަށް އުފާވެރި މަޖާ ހިތްހަމަޖެހޭ މާހައުލެއް ހޯދައިދޭށެވެ. އެކަން ޙާޞިލްކުރެވި، ދަރިވަރުން ހިތްހަމަޖެހިފައި ތިބި މަންޒަރަކީ ވަރަށް އުފާވި މަންޒަރެއް ކަމަށް ޑރ. އާސިޔަތު ވިދާޅުވިއެވެ.

ތައުލީމީ ދާއިރާ އެކުވެގެން ހޯދައިދިނީ ދަރިވަރުންނަށް އުފާވެރި ކަމުގެ ދެ ގަޑިއިރެވެ. ކުޑަކުދިންގެ ދުވަސް ފާހަގަކުރުމުގައި ކުޑަ ސްކޫލެއް، ކުޑަރަށެއް ތަފާތެއް ނެތިއެވެ. އާއިލާއާއެކު މަޖަލުގައި ހޭދަކޮށްލި ދެ ގަޑިއިރެވެ.