ޤުރުއާން ހިތުދަސްކުރާ ހުރާގެ ކޮންމެ ރައްޔިތަކަށް 150،000 ރުފިޔާގެ އިނާމެއް ދެނީ

ޤުރުއާން ހިތު ދަސްކުރާ މާލެ އަތޮޅު ހުރާގެ ކޮންމެ ރައްޔިތަކަށް 150،000 ރުފިޔާގެ އިނާމެއް ދޭން އެރަށު ކައުންސުލުން ނިންމައިފިއެވެ.

އެރަށު ކައުންސިލުން އަންނަނީ ޒުވާން ހާފިޒުން ތަމްރީނު ކުރުމަށް ޚާއްޞަ ޕްރޮގްރާމެއް ހިންގަން ވެސް ތައްޔާރު ވަމުންނެވެ.

ހުރާ ކައުންސިލުން މިއަދު ކުރި އިއުލާނުގައި ބުނެފައި ވަނީ އެކައުންސިލުން ހިންގާ ޤުރުއާން ހިތުދަސްކޮށް ދިނުމުގެ ޕްރޮގްރާމުގައާއި އަދި އަމިއްލަ ގޮތުން ޤުރުއާން ހިތުދަސްކުރާ އެރަށުގެ ކޮންމެ ރައްޔިތަކަށް މާލީ އެހީގެ ގޮތުގައި 150،000 ރުފިޔާ ދޭން ނިންމާފައިވާ ކަމަށެވެ. އެ ފައިސާ ދޭން ނިންމާފައި ވަނީ އެ ކައުންސިލުގެ 4ވަނަ ދައުރުގެ 233 ވަނަ ޖަލްސާއިން ކަމަށް ވެސް އެ އިއުލާނުގައި ބުނެފައިވެއެވެ.

ޤުރުއާން ހިތުދަސްކުރަން ހިތްވަރު ދިނުމުގެ ގޮތުން ކައުންސިލްތަކުން އަންނަނީ ފައިސާގެ އިނާމްތައް ހުށައަޅަމުންނެވެ. ގއ. ދާންދޫ ކައުންސިލުން ނިންމާފައި ވަނީ އެރަށުގެ ކޮންމެ ހާފިޒަކަށް 30،000 ރުފިޔާގެ ފައިސާގެ އެހީއެއް ވެދޭށެވެ. ހދ. ނޮޅިވަރަމާއި އއ. ތޮއްޑު އާއި ބ. އޭދަފުށީ ކައުންސިލުން ހުށައަޅާފައި ވަނީ ޤުރުއާން ހިތުދަސްކުރާ ކޮންމެ ފަރާތަަކަށް  50،000 ރުފިޔާގެ އިނާމެކެވެ.

ޤުރުއާން ހިތުދަސްކޮށްދޭން ނުވަ ރަށެއްގައި ކުލާސްތަކެއް މި އަހަރު ހިންގާނެ ކަމަށް އިސްލާމިކް މިނިސްޓްރީން ވަނީ އިއުލާން ކޮށްފައެވެ.