އިތުބާރު ކުރެވޭ, ރަނގަޅު ރަހުމަތްތެރިންގެ ސިފަތައް

ނިއުމާ މުަޙައްމަދު ( ނިއުމާ މިސް)

އިންސާނާގެ ޙަޔާތުގައި އެންމެ މުހިންމު އެއްކަމަކީ ރަނގަޅު ރަހުމަތްތެރިން ހޯދުމެވެ. އަޅުގަނޑުމެންގެ ދިރިއުޅުމުގައި އެކި ގޮތްގޮތުން ދިމާވާ އެތައް ބައިވަރު މީހުންގެ ތެރެއިން ހަގީގީ ރަހުމަތްތެރިންނަކީ ކޮބައިތޯ ދެނެގަތުމަކީ ވަރަށް މުހިންމު ކަމެކެވެ. މިގޮތުން، ރަނގަޅު އިތުބާރު ކުރެވޭ ރަހުމަތްތެރިންގެ ސިފަތައް ދެނެގަތުމަކީ ކޮންމެ މީހަކަށްވެސް ބޭނުންތެރި ކަމެކެވެ.

ރަނގަޅު ރަހުމަތްތެރިޔަކީ އަބަދުވެސް ތެދުވެރިކަމާއެކު ވާހަކަދައްކާ މީހެކެވެ. އޭނާ ދޮގު ނުހަދާނެއެވެ. އަދި ތިބާގެ ކުރިމަތީގައި އެއްގޮތަކަށް ވާހަކަދައްކާފައި، އަނެއް ފަރާތައް އެބުރި އެހެން ގޮތަކަށް ވާހަކަ ނުދައްކާނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ދޮގުވެރި މީހަކާއެކު ރަހުމަތްތެރިކަން ބަދަހި ކުރުމަކީ ނުރައްކާތެރި ކަމަކަށް ވެދާނެތީއެވެ.

ރަނގަޅު ރަހުމަތްތެރިޔަކީ ތިބާގެ ރަނގަޅު ކަންތައްތަކާއި ލިބޭ ކުރިއެރުންތަކަށް އުފާކޮށް، ތިބާގެ ކިބައިގައި ހުންނަ ނުބައި ކަންތައްތަކުން ދުރުހެލިވުމަށް ނަސޭހަތްތެރިވާނެ މީހެކެވެ. އޭނާ ތިބާގެ ކުރިއެރުމަށް އެދޭނެއެވެ. އަދި ތިބާއަށް ކުށެއް ކުރެވިފައިވާނަމަ، އެކަން އިސްލާހު ކުރުމަށް ބާރުއަޅާނެއެވެ. މިފަދަ ރަހުމަތްތެރިން މަދެވެ. ނަމަވެސް، މިފަދަ ރަހުމަތްތެރިއެއް ލިބިފައި ހުރުމަކީ ދިރިއުޅުމުގައި ކުރިއަށް ދިއުމަށް ވަރަށް ބޮޑު އެހީތެރިކަމެކެވެ.

ރަނގަޅު ރަހުމަތްތެރިޔަކީ ތިބާގެ ސިއްރުތައް ހިފަހައްޓާ މީހެކެވެ. އޭނާއާއި ތިބާގެ އަމިއްލަ ކަންތައްތައް ހިއްސާކުރުމުން، އެކަންކަން އެހެން މީހުންނާ ހިއްސާ ނުކުރާނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ރަހުމަތްތެރިކަމުގައި އިތުބާރަކީ އެންމެ މުހިންމު އެއް ސިފަ ކަމަށްވާތީއެވެ. ތިބާ ދައްކާ ވާހަކަތައް ބޮޑުކޮށްގެން ހިފައިގެން އަނެކާގެ ކައިރިއަށް ދުވާ މީހުންގެ ކިބައިން ސަލާމަތްވާން ޖެހެއެވެ. މިކަމަކީ ތިބާއަށް ނުރައްކާތަކާއި ކުރިމަތި ވެދާނެ ކަމެކެވެ. ސަބަކީ ބައެއް ވާހަކަތަކަކީ މަޖަލެކެވެ. ހީލާ ސަމާސާއަށް ދައްކާ އަމިއްލަ ވާހަކައެވެ.

ރަނގަޅު ރަހުމަތްތެރިޔަކީ ދަތި އުނދަގޫ ވަގުތުތަކުގައި ތިބާގެ ގާތުގައި ހުންނާނެ މީހެކެވެ. ހަމައެކަނި އުފާވެރި ވަގުތުތަކުގައި އެކަންޏެއް ނޫނެވެ. ހިތާމަތަކާއި ދިމާވުމުން މި ރަހުމަތްތެރިޔާ ހުންނާނެއެވެ. އަދި ހިތްވަރު ދީ، އެހީތެރިވާނެއެވެ. މިފަދަ ރަހުމަތްތެރިޔަކު ލިބުމަކީ ބޮޑު ނިޢުމަތެކެވެ.

ރަނގަޅު ރަހުމަތްތެރިޔަކީ ތިބާގެ މައްޗަށް ހަސަދަވެރި ނުވާނެ މީހެކެވެ. އޭނާ ތިބާގެ ކުރިއެރުމަށާއި ކާމިޔާބީތަކަށް އުފާކުރާނެއެވެ. އަދި ތިބާގެ ކުރިއެރުމަށް އެހީތެރިވާނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ހަސަދަވެރިކަމަކީ ރަހުމަތްތެރިކަން ނަގާލާ އެއްޗެކެވެ.

ރަނގަޅު ރަހުމަތްތެރިޔަކީ ތިބާގެ ކުށްތަކާއި އުނިކަންތައްތައް މާފުކުރާ މީހެކެވެ. އިންސާނުންނަކީ ފުރިހަމަ ބައެއް ނޫނެވެ. އެހެންކަމުން، އިންސާނުންނަށް ކުށް ކުރެވެއެވެ. ރަނގަޅު ރަހުމަތްތެރިޔަކު ތިބާގެ ކުށްތައް މާފުކޮށް، އަލުން އެކުގައި އުޅުމަށް ފުރުސަތު ދޭނެއެވެ.

ރަނގަޅު ރަހުމަތްތެރިޔަކީ ތިބާގެ ވަގުތާއި މުދަލަށް އިޙްތިރާމްކުރާ މީހެކެވެ. އޭނާ ތިބާގެ ކިބައިން އެކަށީގެންވާ އެދުންތައް ނޭދޭނެއެވެ. އަދި ތިބާގެ މުދަލަށް ގެއްލުމެއް ދިނުމަށް މަސައްކަތް ނުކުރާނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ރަހުމަތްތެރިކަމުގައި އަނެކާގެ ޙައްޤުތަކަށް އިޙްތިރާމްކުރުމަކީ ކޮންމެހެން ބޭނުން ކަމެއް ކަމަށްވާތީއެވެ.

ރަނގަޅު ރަހުމަތްތެރިޔަކީ ތިބާގެ އާއިލާއަށާއި އެހެނިހެން ރަހުމަތްތެރިންނަށް އިޙްތިރާމްކުރާ މީހެކެވެ. އޭނާ ތިބާގެ މައިންބަފައިންނާއި އަނބިދަރިންނަށް އިޙްތިރާމްކުރާނެއެވެ. އަދި ތިބާގެ އެހެން ރަހުމަތްތެރިންނާ ރަނގަޅަށް މުޢާމަލާތްކުރާނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ރަހުމަތްތެރިކަމުގައި އަނެކާގެ ގުޅުންތަކަށް އިޙްތިރާމްކުރުމަކީ ވަރަށް މުހިންމު ކަމެއް ކަމަށްވާތީއެވެ.

ރަނގަޅު ރަހުމަތްތެރިޔަކީ ތިބާގެ ދީނާއި ސަގާފަތަށް އިޙްތިރާމްކުރާ މީހެކެވެ. އޭނާ ތިބާގެ އަޤީދާއަށާއި އާދަކާދަތަކަށް ހުރުމަތްތެރިކޮށް ހިތާނެއެވެ. އަދި ތިބާގެ ދީނީ އަޅުކަންތަކަށް ހުރަސް ނޭޅޭނެއެވެ. މިއީ ވަރަށް މުހިންމު ސިފައެކެވެ. ސަބަބަކީ ދީނާއި ސަގާފަތަކީ މީހެއްގެ އަމިއްލަވަންތަކަމުގެ މުހިންމު ބައެއް ކަމަށްވާތީއެވެ. މިޒަމާނުގައި ދުނިޔޭގެ އެކި ކަންކޮޅުތަކުގައި ރަހުމަތްތެރިން އުޅޭ ދުވަސްވަރެއްގައި މިއީ ހުންނަން ޖެހޭ މުހިންމު ސިފައެކެވެ.

ރަނގަޅު އިތުބާރު ކުރެވޭ ރަހުމަތްތެރިންނަކީ އަޅުގަނޑުމެންގެ ހަޔާތުގައި ވަރަށް މުހިންމު ބައެކެވެ. މިފަދަ ރަހުމަތްތެރިން ހޯދުމަކީ ފަސޭހަ ކަމެއް ނޫނެވެ. އެހެންނަމަވެސް، މަތީގައި ބަޔާންކުރެވުނު ސިފަތައް ހުރި މީހުން ދެނެގަނެ، އެމީހުންނާއެކު ރަހުމަތްތެރިކަން ބަދަހިކުރުމަކީ ކޮންމެ މީހަކުވެސް ކުރަންޖެހޭނެ ކަމެކެވެ. އަދި އަމިއްލަ ނަފްސުގައިވެސް މި ސިފަތައް އަށަގެންނެވުމަށް މަސައްކަތްކުރުމަކީ ވަރަށް މުހިންމު ކަމެކެވެ. އޭރުން އަޅުގަނޑުމެންނަށް ވެސް ރަނގަޅު އިތުބާރު ކުރެވޭ ރަހުމަތްތެރިންގެ ގޮތުގައި ތިބެވޭނެއެވެ.