އައްޑޫ ސިޓީ ކައުންސިލްގެ ޤުރުއާން މުބާރާތުގައި 343 ބައިވެރިން

343 ދަރިވަރުންނާއެކު، އައްޑޫސިޓީ ކައުންސިލުން އިންތިޒާމުކޮށްގެން ބާއްވާ ކީރިތި ޤުރްއާން ކިޔެވުމުގެ ތިން ވަނަ މުބާރާތް އިއްޔެ ފަށައިފިއެވެ.

އައްޑޫ ހައިސްކޫލްގައި ކުރިއަށް ގެންދާ މިމުބާރާތުގެ މަޤުސަދަކީ، ތަރުތީލުން ޤުރްއާން ކިޔަވަން އެނގޭ މުޖުތަމައެއް އައްޑޫ ސިޓީގައި ބިނާކުރުމެވެ. " މިމުބާރާތް މިބާއްވަނީ، އައްޑޫސިޓީ ސްކޫލްތަކުގެ ދަރިވަރުންގެ މެދުގައި ކީރިތި ޤުރްއާނަށް ހިތް ޖެއްސުމުގެ ގޮތުންނާއި، ޤުރްއާން ހިތުދަސްކުރުމަށާއި، ތަޖްވީދުމަގަށް ކިޔެވުމަށާއި، ކީރިތި ޤުރްއާނުގެ ޢިލްމު އުނގެނުމާއި އުނގަންނައި ދިނުމުގެ ރޮނގުން ކުރިއަށް ދިއުމަށް ހިތްވަރުދިނުމުގެ ގޮތުން." މުބާރާތް ހުޅުއްވައި ދެއްވުމުގެ ރަސްމިއްޔާތުގައި ވާހަކަފުޅުދައްކަވަމުން އައްޑޫގެ ޑެޕިއުޓީ މޭޔަރ މުހައްމަދު ޝުޢާއު ވިދާޅުވިއެވެ.

އައްޑޫ ސިޓީ ކައުންސިލް އިދާރާގެ ރެކްރިއޭޝަން ކްލަބުން އިންތިޒާމްކުރި މިމުބާރާތުގައި 12 ސްކޫލުން 237 ދަރިވަރުންނާއި 10 މުއައްސަސާއަކުން 104 ބައިވެރިން އަދި 2 ހާފިޒުން ބައިވެރިވިއެވެ. މިމުބާރާތުގެ ފަނޑިޔާރުންނަކީ އަލްޤާރީ އަޙްމަދު ތައުފީޤު، އަލްޤާރީ އިބްރާހީމް ޝަރީފް، އަދި އަލްޙާފިޡު އިބްރާހީމް ޒުހައިރު އެވެ.

ހަތަރު ދަންފަޅިއަކަށް ބަހާލައިގެން އޮކްޓޯބަރ 20 ން 30 އަށް ކުރިއަށް ގެންދާ މި މުބާރާތުގެ ކިޔެވުން ކުރިއަށް ގެންދަނީ ތިން ގޮތްޕަކަށެވެ. އެއީ ބަލައިގެންނާއި ނުބަލައި ކިޔެވުމުގެ އިތުރުން ހާފިޒުންގެ ގޮތްޕެވެ.