ރ. އަތޮޅު ޓެކްނިކަލް އިންސްޓިޓިއުޓްގައި އަންނަ އަހަރު ކުރީކޮޅު ކިޔަވައިދޭން ފަށަނީ

އަލިފުށީގައި އިމާރާތް ކުރި ރ. އަތޮޅު ޓެކްނިކަލް އިންސްޓިޓިއުޓްގައި ކިޔަވައި ދިނުމުގެ މަސައްކަތް އަންނަ އަހަރުގެ ކުރީކޮޅުގައި ފަށާނެ ކަމަށް ހަޔަރ އެޑިޔުކޭޝަން މިނިސްޓްރީން ބުނެފިއެވެ.

89 އިންސައްތަ މަސައްކަތް މިހާރު ނިމިފައިވާ ރ. އަތޮޅު ޓެކްނިކަލް އިންސްޓިޓިއުޓާ ގުޅޭ ގޮތުން އެ މިނިސްޓްރީން ބުނީ، ޓެކްނިކަލް އަދި ވޮކޭޝަނަލް ދާއިރާތަކަށް އިސްކަންދީގެން ހިންގުމަށް ހަމަޖެހިފައިވާ ޓިވެޓް ކޯސްތަކުގައި ކިޔަވާ ދަރިވަރުންނަށް އަމާޒުކޮށްގެން "ޓްރާންސިޝަން 360″ – ޓިވެޓް ސްޓޫޑެންޓް އިންކިއުބޭޝަން ޕްރޮގްރާމަކާއި، ދަރިވަރުން ކިޔަވާ ކޯސްތަކުގެ މޮޑިއުލްތަކުގެ އިތުރުން 30 ގަޑިއިރުގެ ޕްރޮފެޝަނަލް ޑިވެލޮޕްމަންޓް ޕްރޮގްރާމެއް ކުރިއަށް ގެންދަން ރާވާފައިވާ ކަމަށެވެ. މި އިންސްޓިޓިއުޓުގައި ހިންގުމަށް ހަމަޖެހިފައިވާ ކޯސްތަކުގެ ތެރޭގައި ފައިބަރގްލާސް ބޯޓްބިލްޑިންގ، އޮފީސް މެނޭޖްމަންޓް އެންޑް އެޑްމިނިސްޓްރޭޝަން ، އިންފޮމޭޝަން ޓެކްނޮލޮޖީ އަދި ތަފާތު ޓެކްނިކަލް ވޮކޭޝަނަލް ދާއިރާތަކުން ސެޓްފިކެޓް ލެވެލް 3 އިން ފެށިގެން ޑިޕްލޮމާ ލެވެލްގެ ކޯސްތައް ހިމެނެއެވެ.

އެ މިނިސްޓްރީން ބުނީ، ޓިވެޓް ސެންޓަރުގެ އިންސްޓިޓިއުޓް ބްލޮކްގެ އިމާރާތްކުރުމުގެ މަސައްކަތުގެ 95 އިންސައްތަ މިހާރު ނިމިފައިވާއިރު، އެ މަރުކަޒަށް ބޭނުންވާ ފަރުނީޗަރާއި، ވޯކްޝަޕްތަކަށް ބޭނުންވާ އެކިކަހަލަ މެޝިނަރީސް/ޓޫލްސް އަދި އެހެނިހެން ތަޢުލީމީ ވަސީލަތްތައް ހޯދުމުގެ މަސައްކަތް ވެސް މިހާރު ކުރިއަށް ގެންދާ ކަމަށެވެ.