މަސައްކަތްތެރިކަމާއި ހުނަރު ދަސްކުރުމުގެ ޕްރޮގްރާމްގެ ތެރެއިން އަމީނިއްޔާ ސްކޫލުގެ ދަރިވަރުން ދަސްކުރީ "ސޮފްޓް ޓޯއީސް" ހަދާނެ ގޮތެވެ. ދެ ހަފްތާއަށް ކުރިއަށް ގެންދިޔަ މި ޕްރޮގްރާމުގައި އަމީނިއްޔާ ސްކޫލުގެ "އިންކްލޫސިވް ސަޕޯޓް ޔުނިޓުން އެހީތެރިކަން ފޯރުކޮށްދޭ 14 ދަރިވަރުން ބައިވެރިވެ އެ ދަރިވަރުންގެ ހުނަރު ދައްކާލިއެވެ.
އަމީނިއްޔާ ސްކޫލުން ބުނީ، މި ޕްރޮގްރާމް ކުރިއަށް ގެންދެވުނީ އުފެއްދުންތެރިކަމާއި ގުޅުވައިގެން ތަފާތު ހުނަރާއި މަސައްކަތްތެރިކަން އުނގަންނައި ދިނުމަށެވެ. އަދި ދަރިވަރުންގެ ހުރި ހުނަރުތައް އިތުރަށް ތަރައްޤީ ކުރުމަށާއި އާ ހުނަރެއް ތަޢާރަފްކޮށް ދަރިވަރުންގެ ޤާބިލްކަން އިތުރުކުރުމަށެވެ.
މި ޕްރޮގްރާމްގެ ތެރެއިން ދަރިވަރުންވަނީ، ތަފާތު ބައްޓަންތަކަށް ކަތުރުން ކެފުމާއި، ތިނޯހަށް ރޮދި ލެއްވުން، ސީދާ އަދި ވަށް ރޮނގުމަތީގައި އަތު ތިނޯހުން ރޮދި ޖަހަން ދަސްކޮށްފައެވެ. އަދި މީގެ އިތުރުން ފަހާފައިވާ ތަކެއްޗަށް ކަފަލައްވުމާއި، ބައްޓަން ގެނެސް، ގްލޫ ގަން ބޭނުންކޮށްގެން ތަތްކުރަން ދަސްކުރިއެވެ.
ދަރިވަރުންނަށް މި ޕްރޮގްރާމް ކުރިއަށް ގެންދިޔައީ "ގިފްޓް ބާސްކެޓް ފައުންޑަރ" ޔުމްނާ ރަޝީދެވެ. އަމިއްލަ ޝައުޤުވެރިކަމާއިއެކު އަގުހުރި ވަގުތުތަކެއް ދަރިވަރުންނަށްޓަކައި ޚާއްސަކޮށްދެއްވީތީ ޔުމްނާއަށް ޚާއްޞަ ޝުކުރެއް އަމީނިއްޔާ ސްކޫލުން އަދާކުރެއެވެ. އަދި ބެލެނިވެރިންނާއި މުދައްރިސުން ދެއްވި އެހީތެރިކަމާއި އެއްބާރުލުން އެ ސްކޫލުން ފާހަގަ ކުރެއެވެ.
advertisment
ހިޔާލު