ކީރިތި ޤުރްއާނާއި ކީރިތި ރަސޫލާގެ ޙަދީޘްތަކާ ޚިލާފުވާ ގޮތަށް އެކި ފަރާތްތައް މާތްކުރުން ޝިރުކުކުރުމަށް މަގުފަހިވެދާނެ ކަމަށާއި އެހެންކަމުން ހެޔޮ ޢަމަލު ކުރުމުގެ ނަމުގައި އެ ފަދަ ވިޔާނުދާ ޢަމަލުތަކަށް އަރައިނުގަތުމަށް މިއަދުގެ ހުކުރު ހުޠުބާގައި ނަސޭޙަތްތެރިވެ ވަޞިއްޔަތްކޮށްފިއެވެ.
މިއަދުގެ ހުޠުބާ ބިނާކޮށްފައި ވަނީ ޝިރުކުކުރުމުން ދުރުހެލިވުމުގެ މައްޗަށެވެ.
ހުޠުބާގައި ބުނެފއި ވަނީ، الله سبحانه وتعالى ހައްދަވައިފައިވާ މަޚުލޫޤުންކުރެ، އިންސާނާ ކުރާ އެންމެ ބޮޑު ފާފައަކީ އެ އިންސާނާ ހައްދަވައި ބޮޑުކުރައްވައި އޭނާއަށް ބޭނުންވާ އެންމެހައި ކަމެއް ފުރިހަމަ ކޮށްދެއްވި الله سبحانه وتعالىއަށް ޝަރީކު ކުރުމެވެ. ނުވަތަ އެކަލާނގެއާ، އެކަލާނގެ މަޚުލޫޤުންނާ ހަމަހަމަކުރުމެވެ. ނުވަތަ އަޅުކަމުގައި ބައިވެރިކުރުމެވެ. الله سبحانه وتعالى އިންސާނުންގެ ގާތަށް ފޮނުއްވި އެންމެހައި ރަސޫލުން ވެސް ގޮވައިލައްވައިފައި ވަނީ އެކަލާނގެ އެއްކައުވަންތަކަން ޤަބޫލުކުރުމަށާއި، އެކަލާނގެއަށް ޝަރީކު ނުކުރުމަށެވެ.
އެކި ގޮތްގޮތުން ﷲއާ ޝަރީކުކުރާ މީހުން މި ދުނިޔޭގައި މަދެއްނޫނެވެ. އެއް ބަޔަކު ޝަރީކުކުރަނީ އެބައިމީހުންނާއި އެކަލާނގެއާ ދެމެދު ގުޅުންބެހެއްޓުމަށް ޓަކައި ބޭނުންކުރާ ވަސީލަތެއްގެ ގޮތުގައެވެ. އަނެއް ބަޔަކު އެކަލާނގެއަށް ޝަރީކުކުރަނީ އެކަލާނގެ ހެއްދެވި ބައެއް މަޚްލޫޤުންނަކީ އެކަލާނގެއަށް ލިބިވޮޑިގެންވާ ފަދަ ބާރުތަކަކާއި ކުޅަދާނަކަމަކާއި، އިޚުތިޔާރުތަކެއް، ލިބިގެންވާ ފަރާތްތަކެއްކަމަށް ޤަބޫލުކޮށްގެންނެވެ. މި ހުރިހައި ކަމަކީ ވެސް އެބައިމީހުން ކުރާ ދޮގު ދަޢުވާތަކެއްކަން ބަޔާންކުރައްވައި މާތް الله ވަޙީކުރައްވައިފައި ވެއެވެ.
މާތް ﷲ ވަހީ ކުރައްވާފައިވާ އާޔަތެއްގެ މާނައިގައިވެއެވެ. "އެއުރެން الله ފިޔަވައި އަޅުކަން ކުރަނީ، އެއުރެންނަށް ގެއްލުމެއްވެސް ނުދެވޭ، އަދި އެއުރެންނަށް މަންފާއެއް ވެސް ނުދެވޭ ތަކެއްޗަށެވެ. އަދި އެއުރެން ބުނެތެވެ. މި ތަކެއްޗަކީ، الله ގެ ޙަޟްރަތުގައި ތިމަންމެންނަށް ޝަފާޢަތްތެރިވާނޭ ތަކެއްޗެވެ. ކަލޭގެފާނު ވިދާޅުވާށެވެ! އުޑުތަކުގައި ވެސް އަދި ބިމުގައި ވެސް الله ދެނެވޮޑިގެންނުވާ ކަމެއްގެ ވާހަކައިން ތިޔަބައިމީހުން އެކަލާނގެއަށް ޚަބަރު ދެނީހެއްޔެވެ؟ އެއުރެން އެ ޝަރީކުކުރާ ތަކެތިން އެކަލާނގެ ހުސްޠާހިރުވެ މަތިވެރިވެ ވޮޑިގެންވެއެވެ."
މަރުވުމުގެކުރިން ތައުބާނުވާ ނަމަ الله سبحانه وتعالى ނުފުއްސަވާނެކަމަށް އަންގަވައިފައިވާ ހަމަ އެކަނި ފާފައަކީ އެކަލާނގެއަށް ޝަރީކުކުރުމެވެ.
ކީރިތި ޤުރްއާނާއި ކީރިތި ރަސޫލާގެ ޙަދީޘްފުޅުތަކުގެ މައްޗަށް ބުރަވެ ޢިލްމުވެރީން އެއްބަސްވެ ވަޑައިގެންފައިވަނީ، ކުރާ ހެޔޮ ޢަމަލުތައް ޤަބޫލުކުރެއްވުމުގައި ދެ ޝަރުޠެއް ފުރިހަމަވާން ޖެހޭކަމަށެވެ. އެ ދެ ޝަރުޠު ފުރިހަމަ ނުވާކަމުގައި ވަނީ ނަމަ އެ ޢަމަލެއް ޤަބޫލު ނުކުރެއްވޭނެ ކަމަށެވެ. ފުރަތަމަ ޝަރުޠަކީ، ނިޔަތް الله سبحانه وتعالىއަށް ޚާލިޞްކުރުމެވެ. އެހެން ޢިބާރާތަކުން ބުނާ ނަމަ މާތް ﷲއަށް އިޚުލާޞްތެރިވުމެވެ. އެކަމުގައި އެއްވެސް ކަހަލަ ކަންދެއްކުމެއް އަމިއްލަ އެދުމެއް ނެތުމެވެ. ދެވަނަ ޝަރުޠަކީ، އެ ކަމަކީ ޝަރުޢީ ދަލީލަކުން ޘާބިތުވާ ކަމަކަށްވުމެވެ. މީހަކު ކުރާ ޢަމަލެއްގައި ޝަރީކުކުރުމާއި، ކަންދެއްކުމާއި، އަދި އެނޫން ވެސް އެފަދަ އެހެން ކަންތައް ވާ ނަމަ އެ ޢަމަލެއް الله سبحانه وتعالى ޤަބޫލު ނުކުރައްވާނޭ ކަމެވެ.
މާތް ﷲ ވަހީކުރައްވާފައިވާ އާޔަތެއްގެ މާނައިގައިވެއެވެ. "ކަލޭގެފާނު ވިދާޅުވާށެވެ! ތިމަންކަލޭގެފާނު ވާކަން ކަށަވަރީ ތިޔަބައިމީހުން ކަހަލަ އާދަމުގެ ދަރިޔަކު ކަމުގައެވެ. ތިމަންކަލޭގެފާނަށް ވަޙީ އިއްވަވަނީ ތިޔަބައިމީހުންގެ އިލާހަކީ އެއް އިލާހެއް ކަމުގައެވެ. ފަހެ އެމީހެއްގެ ވެރި ރަސްކަލާނގެއާއި ބައްދަލުވުމަށް އެދޭ މީހާ ދަންނާށެވެ. ފަހެ އެ މީހާ ޞާލިޙު ޢަމަލުން ޢަމަލުކުރާހުށިކަމެވެ. އަދި އެ މީހާގެ ވެރި ރަސްކަލާނގެއަށް އަޅުކަންކުރުމުގައި އެކަކުވެސް ބައިވެރި ނުކުރާހުށިކަމެވެ."
ރަސޫލުﷲ ދުނިޔެއަށް ވަޑައިގަތީ ދުނިޔޭގައި ޝިރުކުގެ ޢަމަލުތައް އިންތިހާއަށް ގޮސްފައިވި ދުވަސްވަރެއްގައެވެ. އިންސާނުން ދިޔައީ އެ މީހުންގެ ވެރި ރަސްކަލާނގެއަށް އަޅުކަންކުރުމުގެ ބަދަލުގައި، އެ މީހުންގެ އަމިއްލަ އަތުން ކޮށައި މަށައިގެން ހަދައިފައިވާ ހިލަތަކަށާއި އެނޫންވެސް ތަކެއްޗަށް އަޅުކަންކުރަމުންނެވެ. އިންސާނުން އެންމެހައި މަޚްލޫޤުންގެ މައްޗަށް މާތްކުރައްވައި ހެޔޮނުބައި ވަކިކޮށް ދެނެގަތުމަށް ޓަކައި ދެއްވި ސިކުނޑީގެ ބޭނުންކުރަމުން ދިޔައީ އެ ތަކެއްޗަށް ސިކުނޑި ދެއްވައިފައި ނުވާ، އެތައް ދަރަޖައެއް ދަށް، ޙައިވާނުންނެކޭ އެއްފަދައިންނެވެ. މާތްވެގެންވާ ކަޢުބާގެ ވަށައިގެން ޠަވާފުކުރަމުން ދިޔައީ ތިމާމެން ދުނިޔެއަށް އުފަންވި އިރު ތިބި ފަދައިން އުނުއޮރިޔާން ނިވައިނުކޮށެވެ. ޢަދުލު އިންސާފަކީ ބާރާއި ނުފޫޒެވެ. ޙައްޤު އޮތީ މުއްސަނދިމީހާގެ އެކަނި އެއްޗެއްކަމުގައި ވެފައެވެ. މި ނޫނަސް ދުނިޔެވަނީ މި ފަދަ ލާއިންސާނިއްޔަތުގެ ކަންތައްތަކުގެ ސަބަބުން އުޅޭން އުނދަގޫ ތަނަކަށް ވެފައެވެ. މިފަދަ ޙާލަތަކަށް ދުނިޔެގޮސްފައި ވަނިކޮށް الله سبحانه وتعالى އިންސާނުންގެ މައްޗަށް އިޙުސާންތެރިވެވޮޑިގެން އެ މީހުންގެ ތެރެއިން ރަސޫލަކު އެ މީހުންގެ ތެރެއަށް ފޮނުއްވިއެވެ.
ކީރިތި ރަސޫލާ، ރަސޫލުކަމާއިގެން ފޮނުއްވުމުން އެކަލޭގެފާނުގެ އެންމެ ފުރަތަމަ މަސައްކަތްޕުޅަކަށްވީ الله سبحانه وتعالى ފިޔަވައި މީސްތަކުން އަޅުކަންކުރަމުން ދިޔަ ފަރާތްތަކަކީ ބާޠިލު ފަރާތްތަކެއްކަން އަންގަވައިދެއްވުމާއި، ޙައްޤުވެގެން އަޅުކަންކުރާން ޖެހެނީ ހަމައެކަނި الله سبحانه وتعالىއަށްކަން މީސްތަކުންނަށް އަންގަވައިދެއްވުމެވެ. އެހެންކަމުން ކީރިތި ރަސޫލާ z މައްކާގައި ހޭދަކުރެއްވި ތޭރަ އަހަރު އެކަލޭގެފާނު ހޭދަކުރައްވައިފައި ވަނީ ހަމައެކަނި މާތް ﷲގެ އެއްކައުވަންތަކަމަށް ހެކިވުމަށާއި، އެކަލާނގެ ރުބޫބިއްޔަތަށް އީމާންވުމަށާއި، އެކަލާނގެ އުލޫހިއްޔަތަށް އީމާންވުމުގެ މައްޗަށް ގޮވައިލެއްވުމުގައެވެ. މި ކަމުން އަންގައިދެނީ ޢަޤީދާގެ މާތްކަމާއި، މި ޢަޤީދާ ވާންޖެހޭނީ ހަރުދަނާ ޢަޤީދާއަކަށް ކަމެވެ. އިންސާނުން އަޅުކަން ކުރާންޖެހޭނީ ދުނިޔެއާއި ދުނިޔޭގައި ވާހައި ތަކެއްޗަކާއި، އެންމެހައި މަޚުލޫޤުން ވެސް ހެއްދެވި الله سبحانه وتعالىއަށް ކަމެވެ.
advertisment
ހިޔާލު