އިސްރަށްވެހިންގެ ދުވަސް ފާހަގަކުރުމުގެ ގޮތުން ދިވެހިރާއްޖޭގެ އިސްލާމީ ޔުނިވަރސިޓީ (އައި.ޔޫ.އެމް)އިން އިސްރަށްވެހިންނާއެކު ވަގުތުކޮޅެއް ހޭދަކޮށްފިއެވެ. މިއީ "އަޅުގަނޑުމެންގެ ލޮބުވެތި އިސްރަށްވެހިންނަށް ޚާއްޞަކޮށްގެން ބޭއްވި، އުފާވެރި އަދި ހަނދާންތަކުން ފުރިގެންވާ ޙަރަކާތެއް" ކަމަށް އައިޔޫއެމްއިން ފާހަގަކުރެއެވެ.
އިސްރަށްވެހިންގެ ނާދީގައި މި ހަރަކާތް ކުރިއަށް ގެންދިޔައީ، އައިޔޫއެމްގެ ކުލިއްޔާ އޮފް އެޑިއުކޭޝަން ކޭ.އީ.ޑީގެ ފަރާތުންނެވެ. މި ޙަރަކާތް ރާވައި، އިންތިޒާމުކޮށް، ފުރިހަމައަށް ކުރިއަށް ގެންދިއުމުގައި އެ ކުލިއްޔާގެ މުޅި ޓީމުން ދެއްކެވި އިޚްލާޞްތެރިކަމާއި، މަސައްކަތުގެ ރޫޙު ވެސް އެ ޔުނިވަރސިޓީން ވަނީ ފާހަގަކޮށްފައެވެ.
އިސްރަށްވެހިންނަށް އެކަކު އަނެކަކާ ބައްދަލުވެ، އެކި ޙަރަކާތްތަކުގައި ބައިވެރިވެ، އުފާވެރި ވަގުތުކޮޅެއް ހޭދަކުރެވޭނެ ފަދަ މާޙައުލެއް ބިނާކުރުމަށްޓަކައި، ކަންކަން ތަރުތީބުކުރުމުން ފެށިގެން ހިންގި ޙަރަކާތްތަކާ ވަރަށް ކާމިޔާބު ކަމަށް ވެސް އައިޔޫއެމްއިން ބުނެއެވެ.
"އުފާވެރިކަމާއި، ހިނިތުންވުމާއި، ގާތްކަމާއެކު ކުރިއަށްދިޔަ މި ޙަރަކާތަކީ މުޖުތަމަޢުގެ އިސްރަށްވެހިންގެ އަގުވަޒަންކޮށް، އެބޭފުޅުންނަށް އިޙްތިރާމް އަދާކުރުމުގެ މުހިންމުކަން ހަނދާންކޮށްދިން، އެކުވެރިކަމުގެ ރީތި ނަމޫނާ" އައިޔޫއެމްގެ ފޭސްބުކް ޕޭޖުގައި ލިޔެފައިވެއެވެ.
މި ޙަރަކާތް ކާމިޔާބުކަމާއެކު ކުރިއަށް ގެންދިއުމުގައި ކުލިއްޔާ އޮފް އެޑިއުކޭޝަނާ ގުޅިގެން މަސައްކަތް ކުރި "އިސްރަށްވެހިންގެ ނާދީ" އަށް އިސްލާމީ ޔުނިވަރސިޓީގެ ފަރާތުން ވަނީ ޚާއްޞަ ޝުކުރެއް ދަންނަވާފައެވެ.
ހަމައެއާއެކު، މި ޙަރަކާތް ފުރިހަމަކުރުމަށް ދީލަތި އެހީތެރިކަން ފޯރުކޮށްދެއްވި ސްޕޮންސަރުން ކަމުގައިވާ މޯލްޑިވްސް އިސްލާމިކް ބޭންކް، ޖަމްޢިއްޔާ ރަޙްމާ، އަދި ރެޕިއުޓް އަށް ނުހަނު އިޚްލާޞްތެރިކަމާއެކު ޝުކުރު ދަންނަވާފައެވެ.
"މިއީ ހަމައެކަނި ޙަރަކާތެއް ނޫނެވެ. މިއީ މުޖުތަމަޢުގެ ބަދަހިކަމާއި، ޝުކުރުވެރިވުމާއި، އުފާވެރިކަން ދައްކުވައިދިން މުހިންމު ހަރަކާތެއް" އައިޔޫއެމްގެ މެސެޖުގައި އިތުރަށް ބުނެފައިވެއެވެ.
advertisment
ހިޔާލު